ʻO KA ʻEPISETOLE LUA A PAULO KA LUNAʻŌLELO I KO TESALONIKE 3 - Ka Baibala Hemolele

1 No ka pule, a me ka hoʻoikaika ʻana.

MOKUNA III.

¹ ¶ No nā mea i koe, e pule ʻoukou, e nā hoahānau, no mākou, i holo leʻa ai ka ʻōlelo a ka Haku, a i hoʻonani ʻia ai hoʻi, e like me ia i waena o ʻoukou;

² a i hoʻopakele ʻia aʻe ai hoʻi mākou i kānaka haihaiā a me ka hana hewa; no ka mea, ʻaʻole pau nā kānaka i ka manaʻoʻiʻo.

³ Akā, he ʻoiaʻiʻo ka Haku, nāna ʻoukou e hoʻokūpaʻa mai, a e hoʻopakele hoʻi i ka mea hewa.

⁴ He manaʻo ko mākou i loko o ka Haku iā ʻoukou ē, ke hana mai nei nō ʻoukou, a e hana nō i nā mea a mākou e kauoha aku nei iā ʻoukou.

⁵ Na ka Haku hoʻi e alakaʻi i ko ʻoukou naʻau i loko o ke aloha o ke Akua, a me ke ahonui o Kristo.

⁶ ¶ Ke kauoha aku nei hoʻi mākou iā ʻoukou, e nā hoahānau, ma ka inoa o ko kākou Haku, ʻo Iesū Kristo, e hoʻokaʻawale iā ʻoukou iho, mai kēlā hoahānau a me kēia hoahānau e hele hōkai ana, ʻaʻole ma muli o ka haʻawina i kauoha ʻia aku ai e mākou.

⁷ Ua ʻike nō hoʻi ʻoukou, e pono ʻoukou e hoʻohālike me mākou; no ka mea, ʻaʻole mākou i hele hōkai i waena o ʻoukou.

⁸ ʻAʻole hoʻi mākou i ʻai i ka berena a kekahi me ka uku ʻole aku; akā, ua hoʻoikaika nō mākou ma ka hana, a me ka luhi i ka pō a me ke ao, i ʻole ai mākou e lilo i mea e luhi ai kekahi o ʻoukou.

⁹ ʻAʻole no ka pono ʻole iā mākou; akā, no ka hoʻolilo ʻana iā mākou iho i kumu hoʻohālike, i hahai mai ai ʻoukou ma muli o mākou.

¹⁰ No ka mea hoʻi, iā mākou i noho ai me ʻoukou, ua ʻōlelo aku mākou iā ʻoukou pēnēia, “Inā ʻaʻole e hana kekahi, ʻaʻole hoʻi ia e pono ke ʻai.”

¹¹ Ua lohe hoʻi mākou, ē, aia hoʻi i waena o ʻoukou kekahi poʻe e hele hōkai ana, ʻaʻole e hana maoli ana; akā, he poʻe hana lapuwale.

¹² A o ia poʻe, ʻo kā mākou ia e kauoha aku nei me ka hoʻoikaika aku, ma ko kākou Haku, ma o Iesū Kristo lā, e hana maoli lākou me ka noho mālie, a e ʻai hoʻi i kā lākou ʻai ponoʻī iho.

¹³ ʻO ʻoukou hoʻi, e nā hoahānau, mai hoʻonāwaliwali i ka hana pono ʻana.

¹⁴ A inā hoʻolohe ʻole mai kekahi i kā mākou ʻōlelo ma kēia ʻepisetole, e hōʻailona ʻoukou iā ia, ʻaʻole hoʻi e hoʻolauna pū me ia, i hilahila ia.

¹⁵ Mai kapa hoʻi ʻoukou iā ia he ʻenemi; akā, e aʻo aku iā ia me he hoahānau lā.

¹⁶ ¶ Na ka Haku nona ka malu e hoʻomalu mau mai iā ʻoukou, i nā mea a pau. ʻO ka Haku pū kekahi me ʻoukou a pau loa!

¹⁷ ¶ ʻO ke aloha oʻu o Paulo na koʻu lima nō ia, ʻo ia ka hōʻailona i nā ʻepisetole a pau; pēlā wau e palapala aku nei.

¹⁸ A iā ʻoukou a pau ke aloha o ko kākou Haku ʻo Iesū Kristo. ʻĀmene.