KA BUKE ʻALUA NO NĀ ALIʻI 9 - Ka Baibala Hemolele

1 No ka hoʻoaliʻi ʻana iā Iehu. 14 Hele kūʻē akula ia iā Iorama, a pepehi akula iā ia, a me ʻAhazia. 30 Pepehi ʻia ihola ʻo Iezebela, a ʻai ʻia ʻo ia e nā ʻīlio, e like me ka ʻōlelo a ʻElia.

MOKUNA IX.

¹ ¶ A kāhea akula ʻo ʻElisai ke kāula i kekahi o nā haumāna a ka poʻe kāula, ʻī akula iā ia, “E kāʻei ʻoe i kou pūhaka, a lawe i kēia hue ʻaila ma kou lima, a e hele aku i Ramota Gileada.

² “A hiki ʻoe i laila, e ʻimi aku ʻoe i laila iā Iehu, ke keiki a Iehosapata, ke keiki a Nimesi, a komo aku ʻoe, a hoʻokū iā ia mai waena mai o kona poʻe hoahānau, a hoʻokomo iā ia i ke keʻena ma loko.

³ “A laila e lawe ʻoe i ka hue ʻaila, a e ninini ma luna o kona poʻo, a e ʻī aku, ‘Ke ʻōlelo mai nei ʻo Iēhova pēnēia, “Ua poni aku au iā ʻoe i aliʻi ma luna o kā ʻIseraʻela.”’ A laila e wehe aʻe ʻoe i ka puka, a holo aku, mai kali ʻoe.”

⁴ A hele akula ke kanaka uʻi i Ramota Gileada, he kāula hoʻi ua kanaka uʻi lā.

⁵ A hiki aku ia, aia hoʻi, e noho ana nā luna o ke kaua; ʻī akula ia, “He wahi ʻōlelo kaʻu iā ʻoe, e ka luna.” ʻĪ maila ʻo Iehu, “Iā wai o mākou a pau?” ʻĪ akula ia, “Iā ʻoe, e ka luna.”

⁶ Kū aʻela ia a komo i loko o ka hale; a ninini ihola ia i ka ʻaila ma luna o kona poʻo, a ʻī akula iā ia, “Ke ʻōlelo mai nei ʻo Iēhova ke Akua o kā ʻIseraʻela, ‘Ua poni aku au iā ʻoe i aliʻi ma luna o nā kānaka o Iēhova, ma luna o kā ʻIseraʻela.

⁷ ‘A e pepehi aku ʻoe i ko ka hale o ʻAhaba kou haku, i hoʻopaʻi aku ai au i ke koko o kaʻu poʻe kauā, ʻo nā kāula, a me ke koko o nā kauā a pau a Iēhova ma ka lima o Iezebela.

⁸ ‘A e pau auaneʻi ko ka hale a pau o ʻAhaba; a ʻoki aku au i nā kāne a pau no ʻAhaba, a ʻo ka mea i paʻa, a me ka mea i paʻa ʻole i loko o kā ʻIseraʻela.

⁹ ‘A e hana like aku au i ko ka hale o ʻAhaba me ko ka hale o Ieroboama ke keiki a Nebata, a me ko ka hale o Baʻasa, ke keiki a ʻAhiia.

¹⁰ ‘A e ʻai nā ʻīlio iā Iezebela ma ka ʻāina i Iezereʻela, ʻaʻohe mea nāna ia e kanu.’” A wehe aʻela ia i ka puka, a holo akula.

¹¹ ¶ A laila puka i waho ʻo Iehu i nā kauā a kona haku, a nīnau mai kekahi iā ia, “He pono anei? No ke aha lā i hele mai ai kēia hehena i ou lā?” ʻĪ akula ia iā lākou, “Ua ʻike ʻoukou i ke kanaka, a me kāna ʻōlelo.”

¹² ʻĪ akula lākou iā ia, “He wahaheʻe; e haʻi mai ʻoe iā mākou ʻānō.” ʻĪ maila ia, “Me nēia, me nēia kāna i ʻōlelo mai ai iaʻu, ʻī maila, ‘Ke ʻī mai nei ʻo Iēhova pēnēia, “Ua poni aku au iā ʻoe i aliʻi ma luna o kā ʻIseraʻela.”’”

¹³ A laila wikiwiki lākou, a lawe aʻela kēlā kanaka kēia kanaka i kona ʻaʻahu, a waiho ma lalo iho ona ma luna o ke alapiʻi, a puhi i nā pū, ʻī akula, “E aliʻi ana ʻo Iehu!”

¹⁴ ¶ A kipi ihola ʻo Iehu ke keiki a Iehosapata, ke keiki a Nimesi, iā Iorama. (A ʻo Iorama e kiaʻi ana ia ma Ramota Gileada, ʻo ia a me kā ʻIseraʻela a pau, no Hazaʻela ke aliʻi o Suria.

¹⁵ A ua hoʻi aku ʻo Iorama ke aliʻi ma Iezereʻela e hoʻōla ʻia i kona ʻeha a ko Suria i hana ʻeha ai iā ia, i kona manawa i kaua aku ai iā Hazaʻela ke aliʻi o Suria.) A ʻī akula ʻo Iehu, “Inā ʻoukou e manaʻo, mai puka aku e pakele kekahi mai ke kūlanakauhale aku e hele ia e haʻi aku ma Iezereʻela.”

¹⁶ A holo akula ʻo Iehu ma ka hale kaʻa, a hele akula i Iezereʻela; no ka mea, e waiho ana ʻo Iorama ma laila. A ua iho mai ʻo ʻAhazia, ke aliʻi o kā Iuda, e ʻike iā Iorama.

¹⁷ ¶ A e kū ana ke kanaka kiaʻi ma luna o ka hale kiaʻi ma Iezereʻela, a ʻike akula ia i ka poʻe nui o Iehu i kona hele ʻana mai, ʻī akula ia, “Ke ʻike nei au i ka poʻe nui.” ʻĪ maila ʻo Iorama, “E lawe ʻoe i ka hoʻoholo lio, a e hoʻouna aku e hālāwai me lākou, a e nīnau aku ia, ‘He aloha anei?’”

¹⁸ A holo akula kekahi ma luna o ka lio e hālāwai me ia, a ʻī akula, “Ke ʻōlelo mai nei ke aliʻi pēnēia, ‘He aloha anei?’” ʻĪ akula ʻo Iehu, “He aha kāu i ke aloha? E huli aʻe ʻoe ma hope oʻu.” A haʻi akula ke kanaka kiaʻi, ʻī akula, “Hele akula ka ʻelele i o lākou lā, ʻaʻole i hoʻi hou mai.”

¹⁹ A hoʻouna hou akula ia i ka lua ma luna o ka lio a hiki akula ia i o lākou lā, ʻī akula, “Ke ʻōlelo mai nei ke aliʻi pēnēia, ‘He aloha anei?’” ʻĪ akula ʻo Iehu, “He aha kāu i ke aloha? E huli aʻe ʻoe ma hope oʻu.”

²⁰ A haʻi akula ke kiaʻi, ʻī akula, “Ua hele aku ia i o lākou lā, ʻaʻole i hoʻi hou mai; a ʻo ka holo ʻana, ua like me ka holo ʻana o Iehu ke keiki a Nimesi; no ka mea, ke holo lā ia e like me ka hehena huhū!”

²¹ ¶ ʻĪ aku ʻo Iorama, “E hoʻomākaukau”; a hoʻomākaukau ʻia ihola kona hale kaʻa. A hele akula ʻo Iorama ke aliʻi o kā ʻIseraʻela, a ʻo ʻAhazia ke aliʻi o kā Iuda, ʻo kēlā kēia ma kona hale kaʻa iho, a hele aku e hālāwai me Iehu, a loaʻa iā lākou ia ma ka ʻāina ʻo Nabota no Iezereʻela.

²² A i ka manawa i ʻike ai ʻo Iorama iā Iehu, ʻī akula ia, “He aloha anei, e Iehu?” Nīnau maila ia, “He aha ke aloha i ka manawa i nui loa ai nā hoʻomana kiʻi o Iezebela kou makuahine, a me ka ʻanāʻanā ʻana?”

²³ A huli aʻela ʻo Iorama, a holo akula, a ʻī akula iā ʻAhazia, “He kipi, e ʻAhazia!”

²⁴ A lawe ʻo Iehu i ke kīkoʻo ma kona lima, a pana akula iā Iorama ma waena o kona mau lima, a puka akula ka pua ma kona puʻuwai, a hāʻule ihola ia ma loko o kona hale kaʻa.

²⁵ A laila ʻī akula ʻo ia iā Bidekara i kona luna, “E kaʻikaʻi, a hoʻolei aku iā ia i loko o ka ʻāina kīhāpai o Nabota no Iezereʻela; no ka mea, e hoʻomanaʻo ʻoe i ka wā a kāua ʻelua i holo pū ai, ma muli o ʻAhaba kona makua kāne, ua kau mai ʻo Iēhova i kēia mea kaumaha ma luna iho ona.

²⁶ ‘Ua ʻike ʻiʻo nō au i nehinei i ke koko o Nabota, a me ke koko o kāna mau keiki,’ wahi a Iēhova; ‘a e hoʻopaʻi aku au iā ʻoe ma kēia ʻāina,’ wahi a Iēhova. ʻĀnō hoʻi, e lawe, a e hoʻolei aku iā ia i loko o ua ʻāina lā, e like me ka ʻōlelo a Iēhova.”

²⁷ ¶ A ʻike akula ʻo ʻAhazia ke aliʻi o kā Iuda, a laila holo akula ia ma ke ala o ka hale ma ke kīhāpai. A hahai akula ʻo Iehu ma hope ona, a ʻī akula ia, “E pepehi aku iā ia hoʻi ma ka hale kaʻa i ka piʻi ʻana ma Gura, e kokoke ana i ʻIbeleama.” A holo akula ia i Megido, a make ihola i laila.

²⁸ A lawe akula kāna poʻe kauwā iā ia ma loko o ka hale kaʻa i Ierusalema, a kanu ihola iā ia i loko o ka hale lua me kona poʻe kūpuna ma ke kūlanakauhale o Dāvida.

²⁹ ¶ I ka ʻumikumamākahi o ka makahiki o Iorama ke keiki a ʻAhaba, hoʻomaka ihola ʻo ʻAhazia e noho aliʻi ma luna o kā Iuda.

³⁰ ¶ A hiki akula ʻo Iehu i Iezereʻela, lohe aʻela ʻo Iezebela; a pena ihola ia i kona maka, a hoʻoponopono i kona poʻo, a nānā maila ma ka puka makani.

³¹ A komo akula ʻo Iehu ma ka puka pā, nīnau maila kēlā, “I maluhia anei ʻo Zimeri, nāna i pepehi kona haku?”

³² A nānā akula ia i luna ma ka puka makani, ʻī akula, “ʻO wai ka mea ma oʻu nei? ʻO wai?” A nānā maila iā ia ʻelua a ʻekolu paha mau luna hale.

³³ ʻĪ akula ia, “E hoʻolei mai iā ia i lalo.” A hoʻolei ihola lākou iā ia i lalo, a heleleʻi iho kekahi o kona koko ma ka pā pōhaku, a ma luna o nā lio; a hehi ʻia ihola ia ma lalo o nā wāwae.

³⁴ A komo akula ia ma loko, a ʻai ihola ia, a inu hoʻi, a ʻī akula, “E hele, e nānā aku ʻānō i kēia mea i hōʻino ʻia, a e kanu aku iā ia, no ka mea, he kaikamahine ia a kekahi aliʻi.”

³⁵ A hele akula lākou e kanu iā ia, ʻaʻole i loaʻa iā lākou kekahi mea ona, ʻo ka pūniu wale nō, a me nā wāwae, a me nā poho lima.

³⁶ No ia mea, hoʻi mai lākou, haʻi aku iā ia. ʻĪ maila ia, “ʻO kēia ka ʻōlelo a Iēhova āna i ʻōlelo mai ai, ma kāna kauā, ma ʻElia no Tiseba, i ka ʻī ʻana aʻe, ‘Ma ka ʻāina i Iezereʻela e ʻai iho ai nā ʻīlio i ka ʻiʻo o Iezebela.

³⁷ ‘A e like auaneʻi ke kupapaʻu o Iezebela me ka lepo ma luna o ke kula o ka ʻāina i Iezereʻela; no laila, ʻaʻole lākou e ʻōlelo aʻe, “ʻO Iezebela kēia.”’”