KA BUKE ʻALUA NO NĀ ALIʻI 7 - Ka Baibala Hemolele

1 Haʻi mai ʻo ʻElisai i ka ʻai nui ma Samaria, a me ka make ʻana o kekahi haku hoʻomaloka. 3 No nā kānaka lēpera. 6 Holo akula ko Suria i ka makaʻu na ke Akua mai. 16 Hele aku nā kānaka a hao i ko kahi hoʻomoana o ko Suria; a nui loa ka ʻai; a make ihola ua haku lā i ka hehi ʻia e nā kānaka.

MOKUNA VII.

¹ ¶ ʻĪ maila ʻo ʻElisai, “E hoʻolohe ʻoukou i ka ʻōlelo a Iēhova, ke ʻōlelo mai nei ʻo Iēhova pēnēia, ‘Ma kēia manawa i ka lā ʻapōpō, e lilo kekahi bākeke palaoa no ka sekela hoʻokahi, a ʻelua bākeke bale no ka sekela hoʻokahi ma ka ʻīpuka o Samaria.’”

² A laila kekahi luna kiaʻi no ke aliʻi ka mea āna i hilinaʻi ai ma kona lima, ʻōlelo maila ia i ke kanaka o ke Akua, ʻī maila, “Aia hoʻi, inā e hana mai ʻo Iēhova i nā puka ma ka lani, e hiki mai anei kēia mea?” ʻĪ akula ia, “E ʻike auaneʻi kou mau maka, akā, ʻaʻole ʻoe e ʻai ia mea.”

³ ¶ A ʻehā kānaka lēpera ma ke komo ʻana o ka ʻīpuka; a ʻī aʻela lākou i kekahi i kekahi, “No ke aha lā kākou e noho ma ʻaneʻi, a make kākou?

⁴ “A i ʻōlelo kākou, ‘E komo i loko o ke kūlanakauhale,’ aia hoʻi, ma loko o ke kūlanakauhale ka wī, a e make auaneʻi kākou ma laila; a i noho kākou ma ʻaneʻi, e make kākou. ʻĀnō hoʻi, ʻeā, e hāʻule kākou i ka poʻe kaua o ko Suria, inā e hoʻōla lākou iā kākou, ua ola; akā, inā e pepehi mai lākou iā kākou, ua make nō hoʻi.”

⁵ Kū aʻela lākou i ka wanaʻao e hele aku i kahi hoʻomoana o ko Suria; a hiki lākou ma ka palena o kahi hoʻomoana o ko Suria, aia hoʻi, ʻaʻohe kanaka ma laila.

⁶ No ka mea, ua hāʻawi mai ʻo Iēhova i ka poʻe kaua o ko Suria i ka lohe i ka halulu o nā hale kaʻa, a me ka halulu o nā lio, ka halulu o ke kaua nui; ʻī aʻela lākou i kekahi i kekahi, “Aia hoʻi, ua hoʻolimalima ke aliʻi o kā ʻIseraʻela i nā aliʻi o kā Heta e kūʻē mai iā kākou, a me nā aliʻi o ʻAigupita e hele mai ma luna o kākou!”

⁷ No ia mea, kū aʻela lākou, a holo i ka wanaʻao, a haʻalele akula lākou i ko lākou mau halelewa, a me ko lākou lio, a me nā hoki o lākou, a i kahi hoʻomoana pēlā, a holo akula lākou, i ola.

⁸ A hiki akula nā lēpero ma ka palena o kahi hoʻomoana, komo akula lākou i loko o kekahi halelewa, a ʻai ihola lākou, a inu hoʻi, a lawe aku lākou i ke kālā a me ke gula, a me nā ʻaʻahu mai laila aku, hele aku, a hūnā; a hoʻi mai a komo aku i loko o kekahi halelewa ʻē aʻe, a lawe aku nō hoʻi mai laila aku, a hele aku, a hūnā.

⁹ ¶ ʻĪ aʻela lākou i kekahi i kekahi, “ʻAʻole pono kā kākou hana ʻana; ʻo kēia lā, he lā pōmaikaʻi, a ke noho mālie nei kākou; a i noho a hiki i ka mālamalama o ke ao, e loaʻa uaneʻi iā kākou ka hewa; ʻānō hoʻi e hele aku kākou, a e haʻi aku i ko ka hale o ke aliʻi.”

¹⁰ A hele lākou, a kāhea aku i ke kiaʻi puka o ke kūlanakauhale; a haʻi aku iā lākou, ʻī akula, “Hele aku mākou i kahi hoʻomoana o ko Suria, aia hoʻi, ʻaʻohe kanaka ma laila, ʻaʻohe leo o ke kanaka, ʻo nā lio wale nō i nākiʻi ʻia, a me nā hoki i nākiʻi ʻia, a me nā halelewa e waiho ana pēlā.”

¹¹ Kāhea akula ia i nā kiaʻi puka, a haʻi akula lākou i ko ka hale o ke aliʻi ma loko.

¹² Ala mai ke aliʻi i ka pō, ʻī akula i kāna poʻe kauā, “ʻĀnō e hōʻike aku au iā ʻoukou i ka mea a ko Suria i hana mai ai iā kākou. Ua ʻike lākou i ko kākou pōloli ʻana; no laila, ua hele aku lākou mai ko lākou wahi hoʻomoana aku e peʻe ma ke kula, i ka ʻī ʻana aʻe, ‘Aia puka lākou mai loko mai o ke kūlanakauhale, a laila lawe pio kākou iā lākou e ola ana, a komo i loko o ke kūlanakauhale.’”

¹³ ʻŌlelo mai kekahi o nā kauā āna, ʻī maila, “Ke noi aku nei au iā ʻoe, e lawe lākou i ʻelima o nā lio e koe ana, nā mea i koe i loko o laila, (aiʻa, ua like lākou me kā ʻIseraʻela a pau e koe ana; aia hoʻi, ua like lākou me ka poʻe nui o kā ʻIseraʻela i make,) a hoʻouna aku kākou, a ʻike.”

¹⁴ A lawe lākou i ʻelua kaulua lio, a hoʻouna akula ke aliʻi ma hope o ka poʻe kaua o ko Suria, ʻī akula, “E hele aku a ʻike.”

¹⁵ A hele aku lākou ma hope o lākou lā, a Ioredane; aia hoʻi, ua paʻapū ke alanui a pau i nā ʻaʻahu, a me nā mea kaua a ko Suria i hoʻolei ai i ko lākou holo kikī ʻana. A hoʻi mai nā ʻelele, a haʻi mai i ke aliʻi.

¹⁶ ¶ A hele aku nā kānaka, a hao lākou i ko kahi hoʻomoana o ko Suria. No ia mea, ua lilo ka bākeke palaoa no ka sekela hoʻokahi, a ʻelua bākeke bale no ka sekela hoʻokahi, e like me ka ʻōlelo a Iēhova.

¹⁷ A hoʻonoho akula ke aliʻi i ka luna kiaʻi, i ka mea āna i hilinaʻi ai ma kona lima, e mālama i ka ʻīpuka; a hehi ihola nā kānaka ma luna ona, a make ihola ia, e like me ka ʻōlelo a ke kanaka o ke Akua, āna i ʻōlelo ai i ka hele ʻana o ke aliʻi i ona lā.

¹⁸ E like nō me ka ʻōlelo a ke kanaka o ke Akua i ke aliʻi, i ka ʻī ʻana aʻe, “ʻElua bākeke bale no ka sekela hoʻokahi, a hoʻokahi bākeke palaoa no ka sekela hoʻokahi, i kēia manawa i ka lā ʻapōpō ma ka ʻīpuka o Samaria.”

¹⁹ A ʻōlelo mai ua luna kiaʻi lā i ke kanaka o ke Akua, ʻī maila, “Aia hoʻi, inā e hana mai ʻo Iēhova i nā puka ma ka lani, e hiki mai anei kēia mea?” ʻĪ akula ia, “Aia hoʻi, e ʻike auaneʻi kou mau maka, akā, ʻaʻole ʻoe e ʻai ia mea.”

²⁰ A pēlā i hana ʻia mai ai iā ia; no ka mea, hehi ihola nā kānaka ma luna ona ma ka ʻīpuka, a make ihola ia.