KA BUKE ʻALUA NO NĀ ALIʻI 6 - Ka Baibala Hemolele

1 No nā hana mana a ʻElisai. 6 Hoʻolana i ke koʻi lipi i poholo i loko o ka wai. 18 Hoʻomakapō i ko Suria poʻe kaua. 24 Kaua mai Bene-Hadada i ko Samaria. 25 He wī nui ma Samaria.

MOKUNA VI.

¹ ¶ ʻŌlelo akula nā haumāna a ka poʻe kāula iā ʻElisai, “Aia hoʻi, ʻānō ʻo kahi a kākou e noho pū nei me ʻoe, ua pilikia iā kākou.

² “Ke noi aku nei, e ʻae mai ʻoe, e hele mākou i Ioredane, a e lawe kēlā kanaka kēia kanaka, mai laila mai, i kahi lāʻau, a e hana kākou ma laila i wahi no kākou e noho ai.” ʻĪ maila kēlā, “E hele ʻoukou.”

³ A ʻī akula kekahi, “Ke noi aku nei au iā ʻoe, e ʻae mai ʻoe i ka hele pū me mākou.” ʻĪ maila ia, “E hele nō wau.”

⁴ A hele pū akula ia me lākou. A hiki lākou ma Ioredane, a kua lāʻau lākou.

⁵ A i ke kua lāʻau ʻana a kekahi, poholo akula ke koʻi i loko o ka wai; auē ihola ia, ʻī akula, “Auē, e ka haku! No ka mea, no haʻi ia mea.”

⁶ Nīnau akula ke kanaka o ke Akua, “Ma hea i poholo ai?” Hōʻike maila ia i kahi. A ʻoki ihola ia i kahi lāʻau, a hoʻolei ihola ma laila, a lana mai ke koʻi.

⁷ ʻĪ akula iā ia, “E lawe mai ia nou.” Kīkoʻo akula kona lima, a lawe mai ia mea.

⁸ ¶ A kaua mai ke aliʻi o Suria i kā ʻIseraʻela, a ʻōlelo pū ia me kāna poʻe kauā, ʻī akula, “Ma kēlā wahi kaʻu e hoʻomoana ai.”

⁹ A hoʻouna akula ke kanaka o ke Akua i ke aliʻi o kā ʻIseraʻela, ʻī akula, “E mālama ʻoe, mai hele ʻoe ma kēlā wahi; no ka mea, ua iho mai ko Suria ma laila.”

¹⁰ Hoʻouna akula ke aliʻi o kā ʻIseraʻela i kēlā wahi a ke kanaka o ke Akua i haʻi mai ai iā ia, a i hoʻākāka mai ai iā ia, a mālama kēlā iā ia iho ma laila, ʻaʻole i kekahi manawa, ʻaʻole hoʻi i ʻelua wale nō.

¹¹ A pīhoihoi ka naʻau o ke aliʻi o Suria no kēia mea; a kāhea akula ia i kāna poʻe kauā, ʻī akula iā lākou, “ʻAʻole anei ʻoukou e haʻi mai iaʻu, ʻo wai ka mea o kākou i launa pū me ke aliʻi o kā ʻIseraʻela?”

¹² ʻĪ maila kekahi o nā kauā, “ʻAʻole, e kuʻu haku e ke aliʻi; akā, ʻo ʻElisai ke kāula i loko o kā ʻIseraʻela, ka mea nāna e haʻi aku i ke aliʻi o kā ʻIseraʻela i nā mea āu i ʻōlelo ai ma loko o kou keʻena moe.”

¹³ ʻĪ akula ia, “E hele ʻoukou a ʻike i kona wahi, i hoʻouna aku ai au e kiʻi iā ia.” A haʻi ʻia mai iā ia, “Aia nō ia ma Dotana.”

¹⁴ Hoʻouna akula ia ma laila i nā lio, a me nā hale kaʻa, a me ka poʻe koa, he nui; a hele aku lākou i ka pō, a hoʻopuni aʻela i ke kūlanakauhale.

¹⁵ ¶ A i ke ala ʻana o ke kauā a ke kanaka o ke Akua i kakahiaka nui, a hele i waho, aia hoʻi, ua puni ke kūlanakauhale i ka poʻe kaua, i nā lio, a me nā hale kaʻa; ʻī akula kāna kauā iā ia, “Auē, e kuʻu haku! Pehea lā e hana ʻia ai?”

¹⁶ ʻĪ maila ia, “Mai makaʻu ʻoe; no ka mea, ua ʻoi aku ka poʻe me kākou, ma mua o ka poʻe me lākou.”

¹⁷ A pule akula ʻo ʻElisai, ʻī akula, “E Iēhova, ke noi aku nei au iā ʻoe, e wehe aʻe ʻoe i kona maka, i ʻike ia.” A wehe aʻela ʻo Iēhova i nā maka o ke kanaka ʻōpiopio, a ʻike akula ia, aia hoʻi, ua paʻapū ka mauna i nā lio, a me nā hale kaʻa ahi, a puni ʻo ʻElisai.

¹⁸ A iho mai lākou i ona lā, pule akula ʻo ʻElisai iā Iēhova, ʻī akula, “Ke noi aku nei au iā ʻoe, e hahau mai ʻoe i kēia poʻe kānaka i ka makapō.” A hahau maila ia iā lākou i ka makapō, e like me ka ʻōlelo a ʻElisai.

¹⁹ ʻĪ akula ʻo ʻElisai iā lākou, “ʻAʻole kēia ke ala, ʻaʻole hoʻi kēia ke kūlanakauhale; e hahai ʻoukou iaʻu, a e alakaʻi aku au iā ʻoukou i ke kanaka a ʻoukou e ʻimi nei”; akā, alakaʻi nō ia iā lākou i Samaria.

²⁰ ¶ A hiki lākou i Samaria, ʻī akula ʻo ʻElisai, “E Iēhova, e hoʻokaʻakaʻa aʻe ʻoe i ko lākou nei maka, i ʻike ai lākou.” A hoʻokaʻakaʻa aʻela ʻo Iēhova i ko lākou maka, a ʻike lākou, aia hoʻi lākou i waenakonu o Samaria!

²¹ ʻĪ maila ke aliʻi o kā ʻIseraʻela iā ʻElisai, i kona ʻike ʻana iā lākou, “E kuʻu makua, e pepehi anei au? E pepehi anei au iā lākou?”

²² ʻĪ akula ia, “Mai pepehi ʻoe; e pono anei e pepehi i nā mea āu i lawe pio ai me kāu pahi kaua a me kou kakaka? E kau i ka ʻai, a me ka wai i mua o lākou, i ʻai ai lākou, a i inu hoʻi, a hoʻi aku i ko lākou haku.”

²³ A hoʻomākaukau ihola ia i ʻahaʻaina nui na lākou, a pau ko lākou ʻai ʻana, a me ka inu ʻana, hoʻokuʻu akula ia iā lākou, a hele akula lākou i ko lākou haku. ʻAʻole i hele hou mai ka poʻe hao wale o Suria i ka ʻāina o kā ʻIseraʻela.

²⁴ ¶ A ma hope iho hoʻākoakoa aʻela ʻo Bene-Hadada, ke aliʻi o Suria, i kona poʻe kaua a pau, a piʻi maila e hoʻopilikia i Samaria.

²⁵ A ua wī nui i loko o Samaria; aia hoʻi hoʻopilikia lākou ia, a kūʻai ʻia ke poʻo o ka hoki i kanawalu sekela kālā, a hoʻokahi hapahā o ke kaba lepo manu nūnū i nā sekela kālā ʻelima.

²⁶ A i ka hele ʻana aʻe o ke aliʻi o kā ʻIseraʻela ma luna o ka pā pōhaku, kāhea maila kekahi wahine iā ia, ʻī maila, “E kōkua mai, e kuʻu haku, e ke aliʻi!”

²⁷ ʻĪ akula ia, “A i ʻole ʻo Iēhova e kōkua mai iā ʻoe, ma ka mea hea anei e kōkua aku ai au iā ʻoe? Ma kahi e hehi ai i ka palaoa anei, a ma kahi e kaomi ai i ka waina anei?”

²⁸ Nīnau aku ke aliʻi iā ia, “He aha kāu?” ʻĪ maila kēlā, “Ua ʻī mai kēia wahine iaʻu, ‘E hāʻawi mai i kāu keiki, i ʻai iho ai kāua i kēia lā, a e ʻai iho kāua i kaʻu keiki i ka lā ʻapōpō.’

²⁹ “Hoʻolapalapa ihola māua i kaʻu keiki, a ua ʻai iho, a ʻī akula au iā ia i kekahi lā, ‘E hāʻawi mai ʻoe i kāu keiki’; a ua hūnā ia i kāna keiki.”

³⁰ A lohe aʻela ke aliʻi i ka ʻōlelo a ka wahine, haehae ihola ia i kona ʻaʻahu; a hele aʻela ia ma luna o ka pā pōhaku, a nānā maila nā kānaka, aia hoʻi, he kapa ʻinoʻino ma luna o kona kino ma loko.

³¹ ʻĪ akula ia, “E hana mai ke Akua iaʻu pēlā, a e ʻoi aku hoʻi, ke waiho ʻia ke poʻo o ʻElisai, ke keiki a Sapata, ma luna ona i kēia lā!”

³² ¶ A e noho ana ʻo ʻElisai i loko o kona hale, a e noho pū ana me ia nā lunakahiko; a hoʻouna aku ke aliʻi i ke kanaka mai kona alo aku; akā, ma mua o ka hiki ʻana aku o ke ʻelele i ona lā, ʻī maila ia i nā lunakahiko, “E nānā ʻoukou ua hoʻouna mai nei kēia keiki a ka mea pepehi kanaka e lawe i kuʻu poʻo; e nānā, i ka manawa e hele mai ai ke ʻelele, e pani aku i ka puka, a e hoʻopaʻa aku ʻoukou iā ia ma ka puka; ʻaʻole anei e kani ana nā wāwae o kona haku ma hope ona?”

³³ A i kāna kamaʻilio ʻana me lākou, aia hoʻi, hiki mai ke ʻelele i ona lā, ʻī maila, “Aia hoʻi, no Iēhova mai kēia ʻino; no ke aha lā au e kali hou aku ai iā Iēhova?”