KA BUKE ʻALUA NO NĀ ALIʻI 5 - Ka Baibala Hemolele

1 No Naʻamana ka lēpero. 8 Ua hoʻōla ʻia ʻo ia i ka ʻauʻau ʻana i loko o Ioredane. 20 No ka hoʻopunipuni ʻana o Gehazi, a lilo ia i lēpero.

MOKUNA V.

¹ ¶ ʻO Naʻamana ka luna o ka poʻe kauā o ke aliʻi o Suria, he kanaka koʻikoʻi ia i mua o kona haku, a he hanohano o kona maka; no ka mea, ma ona lā, ua hoʻolanakila mai ʻo Iēhova i ko Suria; he kanaka koa nui nō hoʻi ia, a ua lēpera.

² A ua hele aku ka poʻe koa hao wale, no ko Suria, a ua lawe pio mai lākou i kekahi kaikamahine ʻōpiopio mai ka ʻāina o kā ʻIseraʻela mai; a ua lawelawe ia na ka wahine a Naʻamana.

³ ʻĪ akula ia i kona haku wahine, “Inā ʻo kuʻu haku ma ke alo o ke kāula ma Samaria, inā ua hoʻōla mai kēlā iā ia i kona lēpera.”

⁴ A hele aku kekahi, a haʻi akula i kona haku, ʻī akula, “Penei a penei ka ʻōlelo ʻana a ke kaikamahine no ka ʻāina o kā ʻIseraʻela.”

⁵ ʻĪ maila ke aliʻi o Suria, “Ō hele, ō hele, a e hoʻouna aku au i palapala na ke aliʻi o kā ʻIseraʻela.” A hele akula ia, a lawe akula ia ma kona lima i ʻumi tālena kālā, a me nā ʻāpana gula ʻeono tausani, a me nā lole ʻaʻahu he ʻumi.

⁶ A lawe akula ia i ka palapala i ke aliʻi o kā ʻIseraʻela, ʻī akula, “ʻĀnō, i ka hiki ʻana aku o kēia palapala iā ʻoe, aia hoʻi, ua hoʻouna aku au i ou lā iā Naʻamana i kuʻu kauā, i hoʻōla mai ai ʻoe iā ia i kona lēpera.”

⁷ A pau ka heluhelu ʻana a ke aliʻi o kā ʻIseraʻela i ka palapala, haehae ihola ia i kona ʻaʻahu, ʻī akula, “He Akua anei wau e pepehi aku a e hoʻōla, i hoʻouna mai ai kēia kanaka i oʻu nei, e hoʻōla i ke kanaka i kona lēpera? No ia mea, ke noi aku nei au, e noʻonoʻo, a ʻike, ke ʻimi mai nei paha i mea noʻu e hewa ai.”

⁸ ¶ A i ka manawa i lohe ai ʻo ʻElisai ke kanaka o ke Akua ua haehae ke aliʻi i kona ʻaʻahu, hoʻouna akula ia i ke aliʻi, ʻī akula, “No ke aha lā ʻoe i haehae ai i kou ʻaʻahu? E hele mai ia ʻānō i oʻu nei, a e ʻike auaneʻi ia, he kāula nō i loko o kā ʻIseraʻela.”

⁹ A hele mai ʻo Naʻamana me kona mau lio, a me kona hale kaʻa, a kū ma ka puka o ka hale o ʻElisai.

¹⁰ Hoʻouna akula ʻo ʻElisai i ʻelele i ona lā, ʻī akula, “E hele ʻoe e ʻauʻau i loko o Ioredane, ʻehiku ʻauʻau ʻana, a e hoʻi hou mai nō kou ʻiʻo iā ʻoe, a e maʻemaʻe ʻoe.”

¹¹ Huhū ihola ʻo Naʻamana, a hele akula, ʻī ihola, “Aia hoʻi, ua ʻī iho au iaʻu iho, ‘E hele ʻiʻo mai auaneʻi ia i waho, a e kū, a e kāhea aku i ka inoa ʻo Iēhova ʻo kona Akua, a hāpai i kona lima ma luna o ka wahi, a e hoʻōla i ka lēpera.’

¹² “ʻAʻole anei e ʻoi aku ka pono o ʻAbana, a me Parepara, nā muliwai o Damaseko, ma mua o ko nā wai a pau o kā ʻIseraʻela? ʻAʻole anei e pono iaʻu ke holoi i loko o ia mau mea, a maʻemaʻe?” A huli aʻela ia a hele akula me ka huhū.

¹³ Hele mai kāna poʻe kauā a kokoke, ʻōlelo akula iā ia, ʻī akula, “E kuʻu makua, inā i ʻōlelo mai ke kāula iā ʻoe i kekahi mea nui, ʻaʻole anei ʻoe i hana? ʻOiaʻiʻo hoʻi, i kāna ʻī ʻana mai iā ʻoe, ‘E ʻauʻau ʻoe, a e maʻemaʻe’?”

¹⁴ A laila hele akula ia i lalo, a lū ihola i loko o Ioredane, ʻehiku lū ʻana, e like me ka ʻōlelo a ke kanaka o ke Akua; a hoʻi hou mai kona ʻiʻo e like me ka ʻiʻo o ke keiki ʻuʻuku, a ua maʻemaʻe ia.

¹⁵ ¶ A hoʻi hou akula ia i ke kanaka o ke Akua, ʻo ia a me kona poʻe a pau, a hiki akula, a kū i mua ona; ʻī akula, “Aia hoʻi, ʻānō ua ʻike au, ʻaʻole he Akua ma ka honua a pau, ma loko o kā ʻIseraʻela wale nō; ʻānō hoʻi, ke noi aku nei au iā ʻoe, e lawe ʻoe i ka makana a kāu kauā.”

¹⁶ ʻĪ maila ia, “Ma ke ola o Iēhova, i mua ona aʻu e kū nei, ʻaʻole au e lawe.” Koi akula kēlā iā ia; akā, hōʻole maila ia.

¹⁷ ʻĪ akula ʻo Naʻamana, “Ke noi aku nei au iā ʻoe, ʻaʻole anei e hāʻawi ʻia mai i kāu kauā ka lepo e kaumaha ai nā hoki ʻelua ke hali? No ka mea, ma kēia hope aku ʻaʻole kāu kauā e kaumaha aku i ka mōhai kuni, a me ka ʻālana i nā akua ʻē, akā, iā Iēhova wale nō.

¹⁸ “E kala mai ʻo Iēhova i kēia mea i kāu kauā, i ka hele ʻana o kuʻu haku i loko o ka hale o Rimona e hoʻomana ma laila, a e hilinaʻi ia ma luna o kuʻu lima, a e hoʻomana au ma ka hale o Rimona; i kuʻu hoʻomana ʻana ma ka hale o Rimona, e kala mai ʻo Iēhova i kēia mea i kāu kauā.”

¹⁹ ʻĪ maila kēlā iā ia, “E hele ʻoe me ke aloha.” A hele ia mai ona aku lā, ʻaʻole lōʻihi.

²⁰ ¶ ʻĪ ihola ʻo Gehazi ke kauā a ʻElisai ke kanaka no ke Akua, “Aia hoʻi, ua hōʻole kuʻu haku iā Naʻamana i kēia kanaka no Suria, ʻaʻole i lawe mai kona lima mai i ka mea āna i lawe mai ai; akā, ma ke ola o Iēhova e holo nō au ma hope ona, a e lawe i kekahi mea mai ona mai lā.”

²¹ A hahai akula ʻo Gehazi ma hope o Naʻamana; a ʻike aʻela ʻo Naʻamana iā ia e holo mai ana ma hope ona, iho i lalo ia mai ka hale kaʻa mai e hālāwai me ia, ʻī maila, “Ua pono anei?”

²² ʻĪ akula ia, “Ua pono. Ua hoʻouna mai kuʻu haku iaʻu, ʻī maila, ‘Aia hoʻi, i kēia manawa, ua hiki mai iaʻu nei ʻelua kānaka uʻi mai ka mauna ʻo ʻEperaima mai, he mau haumāna a ka poʻe kāula; ke noi aku nei au iā ʻoe, e hāʻawi mai ʻoe no lāua i hoʻokahi tālena kālā, a i ʻelua lole ʻaʻahu.’”

²³ ʻĪ maila ʻo Naʻamana, “E ʻoluʻolu mai ʻoe i ka lawe i nā tālena ʻelua.” Koi maila ʻo ia iā ia, a hoʻopaʻa ihola ia i nā tālena ʻelua i loko o nā ʻaʻa ʻelua, a me nā lole ʻaʻahu ʻelua, a hāʻawi akula i nā kauā āna ʻelua; a lawe akula lāua i mua ona.

²⁴ A hiki akula ma ʻOpela, lawe aʻela ʻo ia ia mau mea, mai ko lāua lima mai, a waiho ihola i loko o ka hale; a kuʻu akula i nā kānaka, a hoʻi akula lāua.

²⁵ Komo akula ia ma loko, a kū i mua o kona haku; nīnau maila ʻo ʻElisai iā ia, “Mai hea mai ʻoe, e Gehazi?” ʻĪ akula ia, “ʻAʻole i hele kāu kauā i ʻō, a i ʻaneʻi.”

²⁶ ʻĪ maila kēlā iā ia, “ʻAʻole anei i hele kuʻu naʻau, i ka manawa i huli aʻe ke kanaka mai kona hale kaʻa mai e hālāwai me ʻoe? He manawa anei kēia e lawe i ke kālā, a e lawe i nā ʻaʻahu, me nā ʻoliva, a me nā pā waina, a me nā hipa, a me nā bipi, a me nā kauā kāne a me nā kauā wahine?

²⁷ “No laila e pili mau loa mai ko Naʻamana lēpera iā ʻoe, a me kou hua.” A hele ia mai kona alo aku me ka maʻi lēpera e like me ka hau.