KA BUKE ʻALUA NO NĀ ALIʻI 3 - Ka Baibala Hemolele

1 No ka hana ʻana a Iorama. 4 Kipi mai ke aliʻi o Moaba. 6 No ke kaua ʻana; pilikia ka poʻe kaua i ka wai ʻole. 20 Ka hana mana a ʻElisai, a nui maila ka wai, a pio kā Moaba.

MOKUNA III.

¹ ¶ A lilo ihola ʻo Iorama ke keiki a ʻAhaba i aliʻi ma luna o kā ʻIseraʻela ma Samaria, i ka makahiki he ʻumikumamāwalu o Iehosapata, ke aliʻi o kā Iuda, a he ʻumikumamālua nā makahiki ona i aliʻi ai.

² Hana ʻino akula ia i mua o Iēhova, ʻaʻole naʻe i like me kā kona makua kāne a me kā kona makuahine; no ka mea, lawe akula ia i ke kiʻi ʻo Baʻala, ka mea a kona makua kāne i hana ai.

³ Akā, hoʻopili akula ia i nā hewa o Ieroboama ke keiki a Nebata, nāna i hoʻolilo kā ʻIseraʻela i ka hewa; ʻaʻole ia i haʻalele ia mau mea.

⁴ ¶ A ʻo Mesa ke aliʻi o kā Moaba, he mea mālama holoholona, a hoʻokupu akula ia no ke aliʻi o kā ʻIseraʻela, i hoʻokahi haneri tausani hipa keiki, a i hoʻokahi haneri tausani hipa kāne me ka hulu.

⁵ A i ka wā i make ai ʻo ʻAhaba, kipi maila ke aliʻi o kā Moaba i ke aliʻi o kā ʻIseraʻela.

⁶ A hele akula ʻo Iorama ke aliʻi mai Samaria aku, a helu aku i kā ʻIseraʻela a pau.

⁷ Hele akula ia, a hoʻouna aku i o Iehosapata lā ke aliʻi o kā Iuda, ʻī akula, “Ua kipi mai ke aliʻi o kā Moaba iaʻu; e hele pū anei ʻoe me aʻu e kaua aku i kā Moaba?” ʻĪ maila ia, “E hele nō wau; ua like au me ʻoe, ua like koʻu kānaka me kou kānaka, ua like koʻu mau lio me kou mau lio.”

⁸ A nīnau maila ia, “Ma ke ala hea kāua e piʻi aku ai?” ʻĪ akula ia, “Ma ke ala o ka wao nahele ʻo ʻEdoma.”

⁹ A hele akula ke aliʻi o kā ʻIseraʻela, a me ke aliʻi o kā Iuda, a me ke aliʻi o kā ʻEdoma; a hele pōʻai lākou i ka hele ʻana i nā lā ʻehiku, ʻaʻohe wai no ka poʻe kaua, a no nā holoholona ma hope o lākou.

¹⁰ ʻĪ ihola ke aliʻi o kā ʻIseraʻela, “Auē! No ka mea, ua hoʻākoakoa mai ʻo Iēhova i kēia mau aliʻi ʻekolu e hoʻolilo iā lākou i loko o ka lima o kā Moaba!”

¹¹ ʻĪ mai ʻo Iehosapata, “ʻAʻole anei he kāula a Iēhova ma ʻaneʻi, i nīnau aku ai kākou iā Iēhova ma ona lā?” ʻŌlelo akula kekahi o nā kauā a ke aliʻi o kā ʻIseraʻela, ʻī akula, “Eia nō ʻo ʻElisai, ke keiki a Sapata, ka mea i ninini i ka wai ma luna o nā lima o ʻElia.”

¹² ʻĪ maila ʻo Iehosapata, “Iā ia nō ka ʻōlelo a Iēhova.” A hele akula ke aliʻi o kā ʻIseraʻela, a me Iehosapata, a me ke aliʻi o kā ʻEdoma, i ona lā.

¹³ ¶ Nīnau maila ʻo ʻElisai i ke aliʻi o kā ʻIseraʻela, “He aha kaʻu iā ʻoe? E hele ʻoe i nā kāula a kou makua kāne, a me nā kāula a kou makuahine.” ʻĪ akula ke aliʻi o kā ʻIseraʻela iā ia, “ʻAʻole; no ka mea, ua hoʻākoakoa mai ʻo Iēhova i kēia mau aliʻi ʻekolu, e hoʻolilo iā lākou i loko o ka lima o kā Moaba.”

¹⁴ ʻĪ maila ʻo ʻElisai, “Ma ke ola o Iēhova o nā kaua, i mua ona aʻu e kū nei, inā i manaʻo ʻole au iā Iehosapata ke aliʻi o kā Iuda, ʻaʻole au e nānā aku iā ʻoe, ʻaʻole hoʻi e ʻike iā ʻoe.

¹⁵ “E lawe mai i oʻu nei i ka mea nāna e hoʻokani.” A i kāna hoʻokani ʻana, ma luna ona ka lima o Iēhova.

¹⁶ ʻĪ maila ia, “Ke ʻōlelo mai nei ʻo Iēhova pēnēia, ‘E hana i nā luawai a paʻapū kēia awāwa.’

¹⁷ “No ka mea, ke ʻōlelo mai nei ʻo Iēhova pēnēia, ‘ʻAʻole ʻoukou e ʻike i ka makani, ʻaʻole hoʻi ʻoukou e ʻike i ka ua; akā, e hoʻopiha ʻia auaneʻi kēia awāwa i ka wai i inu ai ʻoukou, a me nā bipi a ʻoukou, a me nā holoholona a ʻoukou.’

¹⁸ “A he mea ʻuʻuku kēia i nā maka o Iēhova; e hāʻawi nō hoʻi ia i kā Moaba i loko o ko ʻoukou lima.

¹⁹ “A e luku aku ʻoukou i nā kūlanakauhale a pau i paʻa i ka pā pōhaku, a me nā kūlanakauhale maikaʻi a pau, a e kua aku ʻoukou i nā lāʻau maikaʻi a pau, a e pani aku i nā pūnāwai a pau, e luku aku hoʻi i nā kīhāpai maikaʻi a pau i ka pōhaku.”

²⁰ A i kakahiaka, i ka manawa i kaumaha ʻia aku ai ka mōhai ʻai, aia hoʻi, kahe maila ka wai mai ka ʻaoʻao o ʻEdoma mai, a hoʻopiha ʻia ka ʻāina i ka wai.

²¹ ¶ A lohe kā Moaba a pau, ua hele mai nā aliʻi e kaua me lākou, hoʻākoakoa aʻela lākou i nā mea a pau e kāʻei ana i ke kāʻei kaua, a keu aku, a kū lākou ma ka mokuna.

²² Ala aʻela lākou i kakahiaka nui, a puka mai ka lā ma luna o ka wai, a ʻike akula kā Moaba i ka wai mai o lākou aku, he ʻulaʻula e like me ke koko.

²³ ʻĪ aʻela lākou, “He koko kēia; ua luku ʻia nā aliʻi, ua pepehi kekahi i kekahi; inā kākou i ka waiwai pio, e kā Moaba!”

²⁴ A hiki aku lākou i kahi hoʻomoana o kā ʻIseraʻela, kū maila kā ʻIseraʻela, a pepehi maila i kā Moaba, a heʻe akula i mua o lākou; a komo akula lākou i loko, a pepehi akula i kā Moaba.

²⁵ A wāwahi akula lākou i nā kūlanakauhale, a hoʻolei akula kēlā kanaka kēia kanaka i kona pōhaku ma nā kīhāpai maikaʻi a pau a hoʻopiha ihola; a pani akula lākou i nā pūnāwai a pau, a kua akula i nā lāʻau maikaʻi a pau, a koe akula nā pōhaku i loko o Kira Hareseta; akā, hoʻopuni akula naʻe nā mea maʻa, a luku akula ia.

²⁶ A ʻike akula ke aliʻi o kā Moaba, ua ikaika mai ke kaua iā ia, lawe akula ia i ʻehiku haneri kānaka mea pahi kaua, a hoʻoikaika e hiki aku i ke aliʻi o kā ʻEdoma, ʻaʻole naʻe lākou i hiki.

²⁷ A laila lawe akula ia i kāna keiki hiapo, i ka mea nona ke aupuni ma hope ona, a kaumaha aku iā ia i mōhai kuni ma luna o ka pā pōhaku. A ua nui ka inaina i kā ʻIseraʻela; a haʻalele lākou iā ia, a hoʻi akula i ka ʻāina.