KA BUKE ʻALUA NO NĀ ALIʻI 23 - Ka Baibala Hemolele

1 Heluhelu akula ʻo Iosia i ke kānāwai i nā kānaka. 3 Hoʻohiki i ka hoʻohiki ʻana. 5 Luku akula i nā kiʻi. 21 Mālama nō i ka Mōliaola. 29 No ke kaua ʻana.

MOKUNA XXIII.

¹ ¶ A hoʻouna akula ke aliʻi, a hoʻākoakoa lākou i ona lā i nā lunakahiko a pau o kā Iuda a me Ierusalema.

² A piʻi aʻela ke aliʻi i ka hale o Iēhova, a ʻo nā kānaka a pau o kā Iuda, a me nā kānaka a pau o Ierusalema me ia, ʻo nā kāhuna, a me nā kāula, a me nā kānaka a pau, ka mea ʻuʻuku, a me ka mea nui; a heluhelu nō ia i loko o ko lākou pepeiao i nā ʻōlelo a pau o ka Buke o ke Kānāwai i loaʻa ma ka hale o Iēhova.

³ A kū ihola ke aliʻi ma luna o ka ʻāwai, a hana nō ia i berita i mua o Iēhova, e hahai ma muli o Iēhova, a e mālama i kāna mau kauoha, a me kāna ʻōlelo hōʻike, a me kona mau kānāwai, me ka naʻau a pau, a me ka ʻuhane a pau, e hoʻokūpaʻa i ka ʻōlelo o kēia berita i kākau ʻia ma kēia buke. A kūpaʻa nā kānaka a pau ma ka berita.

⁴ ¶ A kauoha akula ke aliʻi iā Hilekia ke kahuna nui a me nā kāhuna no ka lua o ka papa, a me nā kiaʻi puka, e lawe mai i waho o ka luakini o Iēhova i nā kīʻaha i hana ʻia no Baʻala, a no ʻAseterota, a no nā pūʻali o ka lani; a puhi akula ʻo ia iā lākou ma waho o Ierusalema a ma nā kīhāpai o Kederona, a lawe akula i ka lehu o lākou i Betela.

⁵ A hoʻōki ihola ia i nā kāhuna hoʻomana kiʻi a nā aliʻi o kā Iuda i hoʻonoho ai, i mea e kuni ai i ka mea ʻala ma nā heiau ma nā kūlanakauhale o kā Iuda, a ma nā wahi e puni ana i Ierusalema; i ka poʻe kuni i ka mea ʻala iā Baʻala, i ka lā, i ka mahina, a i ka poʻe hōkū o ke kāʻei, a i nā pūʻali a pau o ka lani.

⁶ A lawe akula ia i nā kiʻi o ʻAseterota mai ka hale o Iēhova aku ma waho o Ierusalema ma ke kahawai ʻo Kederona, a puhi akula ia mea ma ke kahawai ʻo Kederona, a kuʻi ihola a ʻaeʻae me he lepo lā, a hoʻolei akula i kona lepo ma luna o nā lua kupapaʻu o nā kānaka.

⁷ A wāwahi ihola ia i nā hale o ka poʻe sodomi e kokoke ana ma ka hale o Iēhova, kahi a ka poʻe wāhine hana lole i hana ai i nā halelewa no nā kiʻi o ʻAseterota.

⁸ A lawe mai nō ia i nā kāhuna a pau mai nā kūlanakauhale o kā Iuda mai, a hoʻohaumia i nā heiau kahi a nā kāhuna i kuni ai i ka mea ʻala, mai Geba mai a i Beʻereseba, a wāwahi akula i nā heiau o nā ʻīpuka ma ke komo ʻana o ka ʻĪpuka o Iehosua, ka luna o ke kūlanakauhale, i nā mea ma ka lima hema o ka ʻīpuka o ke kūlanakauhale.

⁹ Akā, ʻaʻole i piʻi mai nā kāhuna o nā heiau i ke kuahu o Iēhova, akā, ʻai nō lākou i ka berena hū ʻole me ko lākou poʻe hoahānau.

¹⁰ A hoʻohaumia nō ia i Topeta, aia nō ia ma ke Awāwa o nā Keiki a Hinoma, i ʻole ai e hoʻohele aku kekahi kanaka i kāna keiki kāne a i kāna kaikamahine i loko o ke ahi no Moleka.

¹¹ A lawe aku ia i nā lio, i nā mea a nā aliʻi o kā Iuda i kūkulu ai no ka lā, ma ke komo ʻana i ka hale o Iēhova ma ke keʻena ma luna o Natana-Meleka, ka luna hele, ka mea ma nā wahi e pili ana, a puhi akula i ke ahi i nā hale kaʻa no ka lā.

¹² A ʻo nā kuahu ma luna ma ke keʻena i luna o ka hale o ʻAhaza, nā mea a nā aliʻi o kā Iuda i hana ai, a me nā kuahu a Manase i hana ai ma nā kahua ʻelua o ka hale o Iēhova, ʻo ia kā ke aliʻi i luku ai, a wāwahi iho mai laila mai, a hoʻolei akula i ko lākou lepo i loko o ke kahawai ʻo Kederona.

¹³ A ʻo nā heiau i mua o Ierusalema, ma ka lima ʻākau o ka Mauna Make, nā mea a Solomona ke aliʻi o kā ʻIseraʻela i hana ai no ʻAseterota, ka mea hoʻopailua o ko Zidona, a no Kemosa, ka mea hoʻopailua o kā Moaba, a no Milekoma, ka mea hoʻopailua o nā mamo a ʻAmona, ʻo ia kā ke aliʻi i hoʻohaumia ai.

¹⁴ A wāwahi ihola ia i nā kiʻi, a kua i lalo i nā kiʻi o ʻAseterota, a hoʻopiha i ko lākou mau wahi i nā iwi kanaka.

¹⁵ ¶ A ʻo ke kuahu hoʻi ma Betela, a ʻo ka heiau a Ieroboama i hana ai, a ke keiki a Nebata, nāna i hoʻolilo kā ʻIseraʻela i ka hewa, ʻo ua kuahu lā, a me ka heiau, ʻo ia kāna i wāwahi ai, a puhi aku i ka heiau, a kuʻi ihola a ʻaeʻae me he lepo lā, a puhi akula i nā kiʻi o ʻAseterota.

¹⁶ Huli aʻela ʻo Iosia, a ʻike akula i nā hale lua ma laila ma ka puʻu, a hoʻouna akula, a lawe mai i nā iwi mai nā hale lua mai, a puhi akula ma luna o ke kuahu, a hoʻohaumia ihola ia mea e like me ka ʻōlelo a Iēhova, ka mea a ke kanaka o ke Akua i haʻi mai, nāna i haʻi mai kēia mau ʻōlelo.

¹⁷ A nīnau akula ia, “He aha kēia kia aʻu e ʻike nei?” ʻĪ maila nā kānaka o ke kūlanakauhale iā ia, “ʻO ka hale lua ia o ke kanaka o ke Akua, ka mea i hele mai Iuda mai, a haʻi mai i kēia mau mea āu i hana ai i ke kuahu o Betela.”

¹⁸ A ʻī akula ia, “E waiho mālie iā ia, mai lawelawe kekahi kanaka i kona mau iwi.” A hoʻopakele lākou i kona mau iwi me nā iwi o ke kāula, ka mea i hele aʻe mai Samaria mai.

¹⁹ A ʻo nā hale a pau o nā heiau ma nā kūlanakauhale o Samaria, nā mea a nā aliʻi o kā ʻIseraʻela i hana ai e hoʻonāukiuki aku, ʻo ia kā Iosia i lawe aku ai, a hana iā lākou e like me nā hana a pau āna i hana aku ai ma Betela.

²⁰ A kaumaha akula ia i nā kāhuna o nā heiau, i ka poʻe ma laila, ma luna o nā kuahu, a puhi akula i nā iwi kanaka ma luna o lākou, a hoʻi akula i Ierusalema.

²¹ ¶ Kauoha akula ke aliʻi i nā kānaka a pau, ʻī akula, “E mālama ʻoukou i ka Mōliaola no Iēhova ko ʻoukou Akua, e like me ka mea i kākau ʻia ma ka Buke o kēia Kānāwai.”

²² No ia mea, ʻaʻole i mālama ʻia ka Mōliaola e like me kēia mai ka manawa mai o nā luna kānāwai, nāna i hoʻoponopono kā ʻIseraʻela, ʻaʻole hoʻi i ka manawa a pau o nā aliʻi o kā ʻIseraʻela, a me nā aliʻi o kā Iuda.

²³ I ka makahiki ʻumikumamāwalu o Iosia ke aliʻi, ua mālama ʻia kēia Mōliaola no Iēhova ma Ierusalema.

²⁴ ¶ A ʻo nā wāhine nīnau i nā ʻuhane ʻino, a me ka poʻe ʻanāʻanā, a me nā kiʻi, a me nā kiʻi lāʻau, a ʻo nā mea hoʻopailua a pau, nā mea i ʻike ʻia ma ka ʻāina o kā Iuda, a ma Ierusalema, ʻo ia mau mea kā Iosia i lawe aku, i hoʻokō ai ʻo ia i nā ʻōlelo o ke kānāwai i kākau ʻia ma ka buke i loaʻa iā Hilekia ke kahuna ma ka hale o Iēhova.

²⁵ ʻAʻohe aliʻi ma mua ona e like ai me ia, nāna i huli aʻe iā Iēhova me kona naʻau a pau, a me kona ʻuhane a pau, a me kona ikaika a pau ma muli o ke Kānāwai a pau o Mose; a ma hope mai ona, ʻaʻole i kū mai kekahi e like me ia.

²⁶ ¶ Akā, ʻaʻole ʻo Iēhova i huli aʻe mai kona inaina nui, āna i inaina ai i kā Iuda, no nā hoʻonāukiuki a pau a Manase i hoʻonāukiuki aku ai iā ia.

²⁷ A ʻī maila ʻo Iēhova, “E lawe aku hoʻi au i kā Iuda mai koʻu alo aku, e like me kaʻu i lawe aku ai i kā ʻIseraʻela, a e hoʻowahāwahā aku au i kēia kūlanakauhale ʻo Ierusalema, kahi aʻu i wae ai, a me ka hale aʻu i ʻōlelo ai, ‘Ma laila koʻu inoa.’”

²⁸ ¶ A ʻo nā hana i koe a Iosia, a ʻo nā mea a pau āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

²⁹ I kona manawa, piʻi aʻela ʻo Paraʻo Neko, ke aliʻi o ʻAigupita, e kūʻē i ke aliʻi o ʻAsuria ma ka muliwai ʻo ʻEuperate; a hele kūʻē akula ʻo Iosia iā ia; a pepehi mai kēlā iā ia ma Megido, i kona manawa i ʻike ai iā ia.

³⁰ A lawe akula kāna poʻe kauā iā ia ua make ma ka hale kaʻa mai Megido mai, a hali mai iā ia i Ierusalema, a kanu ihola iā ia i loko o kona hale lua. A lawe akula nā kānaka o ka ʻāina iā Iehoahaza ke keiki a Iosia, a poni iā ia, a hoʻoaliʻi iā ia ma ka hakahaka o kona makua kāne.

³¹ ¶ He iwakāluakumamākolu nā makahiki o Iehoahaza i kona wā i lilo ai i aliʻi; a ʻekolu malama āna i noho aliʻi ai ma Ierusalema. A ʻo Hamutela ka inoa o kona makuahine, ke kaikamahine a Ieremia no Libena.

³² A hana hewa akula ia i mua o Iēhova, e like me nā mea a pau a kona poʻe kūpuna i hana ai.

³³ A hoʻopaʻa akula ʻo Paraʻo Neko iā ia ma Ribela i ka ʻāina ʻo Hamata, no kona noho aliʻi ʻana ma Ierusalema; a ʻauhau akula i ka ʻāina i hoʻokahi haneri tālena kālā, a i hoʻokahi tālena gula.

³⁴ A hoʻoaliʻi akula ʻo Paraʻo Neko iā ʻEliakima ke keiki a Iosia ma ka hakahaka o Iosia kona makua kāne, a hoʻololi aʻela i kona inoa i Iehoiakima, a lālau akula ʻo ia iā Iehoahaza, a lawe akula i ʻAigupita, a make ihola ia i laila.

³⁵ A hāʻawi akula ʻo Iehoiakima i ke kālā a me ke gula iā Paraʻo; a ʻauhau akula ʻo ia i ka ʻāina e hāʻawi aku ia e like me ke kauoha a Paraʻo; ʻauhau akula ia i ke kālā a me ke gula o nā kānaka o ka ʻāina, i kēlā kanaka kēia kanaka, e like me kona ʻauhau ʻia ʻana, e hāʻawi aku ia no Paraʻo Neko.

³⁶ ¶ He iwakāluakumamālima nā makahiki o Iehoiakima i kona wā i lilo ai i aliʻi, a he ʻumikumamākahi nā makahiki āna i noho aliʻi ai ma Ierusalema. A ʻo Zebuda ka inoa o kona makuahine, ke kaikamahine a Pedaia no Ruma.

³⁷ A hana ʻino akula ia i mua o Iēhova, e like me nā mea a pau a kona poʻe kūpuna i hana ai.