KA BUKE ʻALUA NO NĀ ALIʻI 22 - Ka Baibala Hemolele

1 Pono ko Iosia aliʻi ʻana. 3 Hoʻomākaukau nō ia e hana hou i ka hale o Iēhova. 8 No ka loaʻa ʻana iā Hilekia ka Buke o ke Kānāwai, a heluhelu ʻia ʻo ia i ke aliʻi, a makaʻu ihola ia; 14 a hoʻouna aku e nīnau iā Huleda ke kāula wahine.

MOKUNA XXII.

¹ ¶ ʻEwalu nā makahiki o Iosia, i kona lilo ʻana i aliʻi, a he kanakolukumamākahi nā makahiki āna i noho aliʻi ai ma Ierusalema. A ʻo Iedida ka inoa o kona makuahine, he kaikamahine a ʻAdaia no Bosekata.

² A hana pono akula ia i mua o Iēhova, a hele nō ia ma nā ʻaoʻao o Dāvida kona kupuna, ʻaʻole ia i huli aʻe ma ka ʻākau, ʻaʻole ma ka hema.

³ ¶ A i ka makahiki ʻumikumamāwalu o Iosia ke aliʻi, hoʻouna akula ke aliʻi iā Sapana ke keiki a ʻAzalia, ke keiki a Mesulama, ke kākau ʻōlelo, i ka hale o Iēhova, ʻī akula,

⁴ “E piʻi aku ʻoe iā Hilekia ke kahuna nui, a nāna e helu ke kālā i lawe ʻia mai i loko o ka hale o Iēhova, ka mea a ka poʻe kiaʻi i ka paepae puka i hōʻiliʻili aʻe na nā kānaka mai.

⁵ “A e hāʻawi aku lākou ia mea i ka lima o ka poʻe hana i ka hana, i ka poʻe luna hoʻi o ka hale o Iēhova, a e hāʻawi aku hoʻi lākou i ka poʻe hana i ka hana ma loko o ka hale o Iēhova, no ka hana hou i kahi nahā o ka hale.

⁶ “A i nā kamanā, a i ka poʻe kūkulu, a i ka poʻe hahao pōhaku, a me ke kūʻai lāʻau a me nā pōhaku i kālai ʻia no ka hana hou i ka hale.

⁷ “Akā, ʻaʻole i helu pū ʻia me lākou ke kālā i hāʻawi ʻia i ko lākou lima; no ka mea, ma ka pono kā lākou hana ʻana.”

⁸ ¶ ʻĪ akula ʻo Hilekia ke kahuna nui iā Sapana ke kākau ʻōlelo, “Ua loaʻa iaʻu ka Buke o ke Kānāwai ma ka hale o Iēhova.” A hāʻawi akula ʻo Hilekia i ka buke iā Sapana, a heluhelu nō kēlā ia mea.

⁹ A hele akula ʻo Sapana ke kākau ʻōlelo i ke aliʻi, a haʻi aku i ka ʻōlelo i ke aliʻi, ʻī akula, “Ua ninini kāu mau kauā i ke kālā i loaʻa i loko o ka hale, a ua hāʻawi aku ia mea i ka poʻe hana i ka hana, i nā luna o ka hale o Iēhova.”

¹⁰ A haʻi akula ʻo Sapana, ke kākau ʻōlelo i ke aliʻi, ʻī akula, “ʻO Hilekia ke kahuna, ua hāʻawi mai iaʻu i buke.” A heluhelu ihola ʻo Sapana ia mea i mua o ke aliʻi.

¹¹ A lohe ke aliʻi i ka ʻōlelo a ka Buke o ke Kānāwai, haehae ihola ia i kona ʻaʻahu.

¹² A kauoha akula ke aliʻi iā Hilekia ke kahuna, a iā ʻAhikama, ke keiki a Sapana, a iā ʻAkebora ke keiki a Mikaia, a iā Sapana ke kākau ʻōlelo, a iā ʻAsakia, ke kauā a ke aliʻi, ʻī akula,

¹³ “E hele ʻoukou, a e nīnau aku iā Iēhova noʻu, a no nā kānaka, a no kā Iuda a pau, i nā ʻōlelo o kēia buke i loaʻa; no ka mea, ua nui ka inaina o Iēhova i hoʻā ʻia no kākou, i ka hoʻolohe ʻole o ko kākou poʻe mākua i nā ʻōlelo o kēia buke, e hana like me nā mea a pau i kākau ʻia no kākou.”

¹⁴ ¶ A hele akula ʻo Hilekia ke kahuna, a me ʻAhikama, a me ʻAkebora, a me Sapana, a me ʻAsakia, i o Huleda lā ke kāula wahine, ka wahine a Saluma, ke keiki a Tikeva, ke keiki a Harehasa, nāna i mālama i nā ʻaʻahu; (a e noho ana ua wahine lā ma Ierusalema, ma kekahi hapa,) a kamaʻilio pū lākou me ia.

¹⁵ ʻĪ maila kēlā iā lākou, “Ke ʻōlelo mai nei ʻo Iēhova ke Akua o kā ʻIseraʻela pēnēia, ‘E ʻōlelo aku ʻoukou i ke kanaka, nāna ʻoukou i hoʻouna mai i oʻu nei,

¹⁶ “Ke ʻōlelo mai nei ʻo Iēhova pēnēia, ‘Aia hoʻi, e lawe mai ana au i ka ʻino ma luna o kēia wahi, a ma luna o kona poʻe kānaka, i nā mea a pau o ka buke a ke aliʻi o kā Iuda i heluhelu ai;

¹⁷ no ka mea, ua haʻalele lākou iaʻu, a ua kuni i ka mea ʻala i nā akua ʻē, i hoʻonāukiuki ai lākou iaʻu, ma nā hana a pau a ko lākou lima; no laila, e hoʻā ʻia koʻu inaina i kēia wahi, ʻaʻole ia e pio.’”’

¹⁸ “Akā, i ke aliʻi o kā Iuda, nāna ʻoukou i hoʻouna mai nei e nīnau iā Iēhova, pēnēia ʻoukou e ʻōlelo aku ai iā ia, ‘Ke ʻōlelo mai nei ʻo Iēhova ke Akua o kā ʻIseraʻela pēnēia, “No nā ʻōlelo āu i lohe ai;

¹⁹ no ka mea, ua akahai kou naʻau, a ua hoʻohaʻahaʻa ʻoe iā ʻoe iho i mua o Iēhova i ka wā i lohe ai ʻoe i ka mea aʻu i ʻōlelo ai no kēia wahi, a me kona poʻe kānaka, i lilo ai lākou i mea kāhāhā ʻia, a i mea hōʻino ʻia, a ua haehae ʻoe i kou ʻaʻahu, a ua auē ʻoe i mua oʻu; ʻo wau hoʻi kai hoʻolohe,” wahi a Iēhova.

²⁰ “No laila hoʻi e hui pū aku au iā ʻoe me kou poʻe kūpuna, a ma kou hale lua ʻoe e hui ʻia ai me ka malu; ʻaʻole hoʻi e ʻike kou mau maka i ka ʻino a pau aʻu e lawe mai ai ma luna o kēia wahi.”’” A haʻi akula lākou i ke aliʻi i ka ʻōlelo.