KA BUKE ʻALUA NO NĀ ALIʻI 21 - Ka Baibala Hemolele

1 Hewa ko Manase aliʻi ʻana; 19 a me ko ʻAmona kāna keiki; 23 a pepehi ʻia ihola ʻo ia e kāna mau kauā; a noho aliʻi ihola ʻo Iosia kāna keiki.

MOKUNA XXI.

¹ ¶ He ʻumikumamālua nā makahiki o Manase, i kona wā i lilo ai i aliʻi, a he kanalimakumamālima nā makahiki āna i aliʻi ai ma Ierusalema. A ʻo Hepeziba ka inoa o kona makuahine.

² A hana ʻino akula ia i mua o Iēhova, e like me nā mea haumia o nā lāhui kanaka a Iēhova i kipaku aʻe mai ke alo aku o nā mamo a ʻIseraʻela.

³ A hana hou akula ia i nā heiau a Hezekia a kona makua kāne i wāwahi ai; a kūkulu ihola ia i nā kuahu no Baʻala, a hana hoʻi i kiʻi o ʻAseterota, e like me ka hana a ʻAhaba, ke aliʻi o kā ʻIseraʻela; a hoʻomana akula i nā pūʻali a pau o ka lani, a mālama iā lākou.

⁴ A hana akula ia i nā kuahu i loko o ka hale o Iēhova, kahi a Iēhova i ʻī mai ai, “Ma Ierusalema e waiho ai au i koʻu inoa.”

⁵ Hana akula hoʻi ia i nā kuahu no nā pūʻali a pau o ka lani ma nā pā hale ʻelua o ka hale o Iēhova.

⁶ A kaumaha akula ia i kāna keiki kāne i ke ahi, a nānā i ke ao, a hoʻokilokilo, a nīnau i nā ʻuhane ʻino, a i nā kupua; ua nui kāna hana hewa ʻana i mua o Iēhova e hoʻonāukiuki iā ia.

⁷ A kūkulu ihola nō ia i kiʻi kālai ʻia no ʻAseterota, ka mea āna i hana ai, ma ka hale, kahi a Iēhova i ʻī mai ai iā Dāvida a iā Solomona kāna keiki, “Ma kēia hale, a ma Ierusalema, ka mea aʻu i wae ai mai loko mai o nā ʻohana a pau o kā ʻIseraʻela, e waiho mau loa ai au i koʻu inoa.

⁸ “ʻAʻole hoʻi au e hoʻoneʻe hou aku i ka wāwae o kā ʻIseraʻela mai ka ʻāina aku aʻu i hāʻawi aku ai i ko lākou poʻe kūpuna, ke makaʻala ʻiʻo lākou e hana, e like me nā mea a pau aʻu i kauoha aku ai iā lākou, a me ke kānāwai a pau a Mose kaʻu kauā i kauoha aku ai iā lākou.”

⁹ ʻAʻole hoʻi lākou i lohe; akā, hoʻowalewale aʻela ʻo Manase iā lākou e hoʻokela aku i ka hana hewa ʻana ma mua o ko nā lāhui kanaka a Iēhova i luku ai i mua o ka poʻe mamo a ʻIseraʻela.

¹⁰ ¶ A ʻōlelo mai ʻo Iēhova ma kāna poʻe kauā ma nā kāula, ʻī maila,

¹¹ “No ka mea, ua hana aku ʻo Manase i kēia mau mea haumia, i ka hewa ʻoi aku i mua o nā mea a pau a kā ʻAmora i hana ai ma mua ona, a ua hoʻolilo i kā Iuda i ka hewa ma kona mau kiʻi;

¹² no ia mea, ke ʻōlelo mai nei ʻo Iēhova ke Akua o kā ʻIseraʻela, ‘Aia hoʻi, e lawe mai ana au i ka ʻino ma luna o Ierusalema, a ʻo kā Iuda, i ka mea e kani ai nā pepeiao ʻelua o nā mea a pau i lohe.

¹³ ‘A e kau aku au ma luna o Ierusalema i ke kaula ana o Samaria, a me ka mea kaupaona o ko ka hale o ʻAhaba; a e holoi maloʻo aku au iā Ierusalema, e like me ka mea nāna e holoi maloʻo ke kīʻaha, holoi nō ia, a huli iā ia i lalo ke alo.

¹⁴ ‘A e haʻalele au i ke koena o koʻu hoʻoilina, a e hāʻawi aku au iā lākou i loko o ka lima o ko lākou poʻe ʻenemi; a e lilo lākou i poʻe pio, a i waiwai pio no ko lākou poʻe ʻenemi;

¹⁵ no ka mea, ua hana hewa lākou i mua oʻu, a ua hoʻonāukiuki lākou iaʻu mai ka manawa mai a ko lākou poʻe kūpuna i puka aʻe mai ʻAigupita mai a hiki i kēia wā.’”

¹⁶ ¶ I hoʻokahe aʻela ʻo Manase i ke koko hala ʻole he nui loa, a hoʻopiha ihola ʻo ia iā Ierusalema mai kēlā ʻaoʻao a hiki i kēia ʻaoʻao; he ʻokoʻa kona hewa, ʻo ka hoʻolilo ʻana i kā Iuda i ka hewa e hana hewa i mua o Iēhova.

¹⁷ A ʻo nā hana i koe a Manase, a ʻo nā mea a pau āna i hana ai, a ʻo kona hewa āna i hewa ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

¹⁸ A hiamoe ihola ʻo Manase me kona poʻe kūpuna, a kanu ʻia ʻo ia ma ke kīhāpai o kona hale, ma ke kīhāpai o ʻUza: a noho aliʻi ihola ʻo ʻAmona kāna keiki ma kona hakahaka.

¹⁹ ¶ He iwakāluakumamālua nā makahiki o ʻAmona i kona wā i lilo ai i aliʻi; a ʻelua makahiki o kona noho aliʻi ʻana ma Ierusalema. A ʻo Mesulemeta ka inoa o kona makuahine, ke kaikamahine a Haruza no Ioteba.

²⁰ A hana ʻino akula ia i mua o Iēhova e like me kā Manase, kā kona makua kāne i hana ai.

²¹ A hele aku ia ma nā ʻaoʻao a pau a kona makua kāne i hele ai, a mālama aku i nā kiʻi a kona makua kāne i mālama ai, a hoʻomana akula iā lākou.

²² Haʻalele nō ʻo ia iā Iēhova ke Akua o kona poʻe kūpuna, ʻaʻole ia i hele ma ka ʻaoʻao o Iēhova.

²³ A kipi aʻela nā kauā a ʻAmona iā ia, a pepehi ihola i ke aliʻi ma loko o kona hale iho.

²⁴ A pepehi akula nā kānaka o ka ʻāina i ka poʻe a pau i kipi i ke aliʻi iā ʻAmona; a hoʻoaliʻi akula nā kānaka o ka ʻāina iā Iosia kāna keiki ma kona hakahaka.

²⁵ A ʻo nā mea i koe a ʻAmona i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

²⁶ A kanu lākou iā ia i loko o kona hale lua iho ma ke kīhāpai o ʻUza; a noho aliʻi ihola ʻo Iosia kāna keiki ma kona hakahaka.