KA BUKE ʻALUA NO NĀ ALIʻI 20 - Ka Baibala Hemolele

1 No ka maʻi o Hezekia a me kāna pule, a me kona hoʻōla ʻia. 12 Hōʻike aku nō ia i nā ʻelele o ke aliʻi o Babulona i kona waiwai a pau. 14 Ka wānana a ʻIsaia.

MOKUNA XX.

¹ ¶ Ia mau lā he maʻi make ko Hezekia. A hele akula ‘o ʻIsaia ke kāula, ke keiki a ʻAmoza, i ona lā, ʻī akula iā ia, “Pēnēia ka ʻōlelo a Iēhova, ‘E kauoha aku ʻoe i ko ka hale ou, no ka mea, e make nō ʻoe, ʻaʻole e ola.’”

² A laila hāliu aʻela ia i kona maka ma ka paia, a pule akula iā Iēhova, ʻī akula,

³ “Ke noi aku nei au iā ʻoe, e Iēhova, ʻānō e hoʻomanaʻo mai ʻoe i kuʻu hele ʻana i mua ou me ka ʻoiaʻiʻo, a me ka naʻau kūpono, a ua hana pono aku au i mua o kou maka.” Auē nui ihola ʻo Hezekia.

⁴ A ma mua o ka hiki ʻana aku o ʻIsaia i waenakonu o ke kūlanakauhale, hiki maila ka ʻōlelo a Iēhova iā ia, ʻī maila,

⁵ “E hoʻi hou, a e ʻōlelo aku ʻoe iā Hezekia, i ke aliʻi o kuʻu poʻe kānaka, ‘Penei ka ʻōlelo a Iēhova ke Akua o Dāvida, ʻo kou kupuna, “Ua lohe au i kāu pule, ua ʻike au i kou waimaka; ʻo wau nō kou kahuna lapaʻau; i ke kolu o ka lā e piʻi aku ʻoe i ka hale o Iēhova.

⁶ “A e hoʻolōʻihi aku au i kou mau lā i nā makahiki he ʻumikumamālima; a e hoʻopakele au iā ʻoe a me kēia kūlanakauhale mai loko mai o ka lima o ke aliʻi o ʻAsuria; a e mālama nō au i kēia kūlanakauhale noʻu, a no Dāvida kaʻu kauā.”’”

⁷ ʻĪ akula ʻo ʻIsaia, “E lawe i wahi paʻi fiku”; a lawe lākou ia a kau ma luna o ka maʻi hēhē, a ola ia.

⁸ ¶ Nīnau maila ʻo Hezekia iā ʻIsaia, “He aha ka hōʻailona, e hoʻōla mai ai ʻo Iēhova iaʻu, a e piʻi aku ai au i ka hale o Iēhova i ke kolu o ka lā?”

⁹ ʻĪ akula ʻo ʻIsaia, “Eia ka hōʻailona na Iēhova mai nou, e hana mai ia i ka mea āna i ʻōlelo ai: e hele ma mua anei ke aka i nā degere he ʻumi, a e hoʻi hope anei i nā degere he ʻumi?”

¹⁰ ʻĪ maila ia, “He mea ʻuʻuku ke hele ma mua ke aka i nā degere he ʻumi; ʻaʻole ia, akā, e hoʻi i hope ke aka i nā degere he ʻumi.”

¹¹ A kāhea akula ʻo ʻIsaia iā Iēhova, a hoʻihoʻi aku ia i ke aka i hope, i nā degere he ʻumi, ʻo nā ʻumi degere āna i iho ai ma ka mea hōʻike degere o ʻAhaza.

¹² ¶ Ia manawa, ʻo Merodaka-Baladana, ke keiki a Baladana, ke aliʻi o Babulona, hoʻouna mai ia i nā palapala a me ka makana iā Hezekia, no kona lohe, ua maʻi ʻo Hezekia.

¹³ A hoʻolohe nō ʻo Hezekia iā lākou, a hōʻike aku iā lākou i ko ka hale papaʻa a pau, i ke kālā, i ke gula, a i nā mea ʻala, a me ka ʻaila ʻala, a me ko ka hale a pau o kāna mea kaua, a me nā mea a pau i loaʻa ma kona waihona kālā, ʻaʻohe mea e koe i loko o kona hale, a ma loko o kona aupuni a pau, āna i hōʻike ʻole ai iā lākou.

¹⁴ A laila hele mai ʻo ʻIsaia ke kāula iā Hezekia ke aliʻi, nīnau mai iā ia, “He aha kā kēia poʻe kānaka i ʻōlelo ai? A no hea lākou i hele mai nei i ou lā?” ʻĪ akula ʻo Hezekia, “No ka ʻāina lōʻihi aku lākou i hele mai nei, no Babulona.”

¹⁵ Nīnau maila kēlā, “He aha kā lākou i ʻike ai ma loko o kou hale?” ʻĪ akula ʻo Hezekia, “Ua ʻike lākou i nā mea a pau, ma loko o koʻu hale; ʻaʻole he mea i koe ma koʻu waihona kālā aʻu i hōʻike ʻole ai iā lākou.”

¹⁶ ¶ ʻĪ maila ʻo ʻIsaia iā Hezekia, “E hoʻolohe ʻoe i ka ʻōlelo a Iēhova.”

¹⁷ ‘Aia hoʻi, e hiki mai auaneʻi nā lā e lawe ʻia aku ai, ma Babulona, nā mea a pau i loko o kou hale, a me nā mea a kou poʻe kūpuna i hōʻiliʻili ai, a hiki i kēia lā; ʻaʻole e waiho ʻia kekahi mea, wahi a Iēhova.

¹⁸ ‘A e lawe aku lākou i kāu poʻe keiki kāne e puka ana mai ou mai lā, i nā mea āu e hoʻohānau ai, a e lilo lākou i poʻe luna i poʻa ʻia ma ka hale aliʻi o ke aliʻi o Babulona.’”

¹⁹ ʻĪ akula ʻo Hezekia iā ʻIsaia, “Ua pono ka ʻōlelo a Iēhova āu i ʻōlelo mai nei.” A ʻī akula hoʻi, “ʻAʻole anei e mau ana ka malu i kuʻu mau lā?”

²⁰ A ʻo nā hana i koe a Hezekia, a me kona ikaika a pau, a me ka loko, a me ka ʻauwai āna i hana ai, a hoʻokahe i ka wai i loko o ke kūlanakauhale, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

²¹ A hiamoe ihola ʻo Hezekia me kona poʻe kūpuna; a noho aliʻi ihola ʻo Manase kāna keiki ma kona hakahaka.