KA BUKE ʻALUA NO NĀ ALIʻI 2 - Ka Baibala Hemolele

1 No ka lawe ola ʻia ʻana o ʻElia i ka lani. 12 No nā hana mana a ʻElia a me ʻElisai. 23 No ka make ʻana o nā kamaliʻi kūamuamu.

MOKUNA II.

¹ ¶ A i ke kokoke e lawe aku ʻo Iēhova iā ʻElia i ka lani ma ka puahiohio, hele pū akula ʻo ʻElia me ʻElisai mai Gilegala aku.

² ʻĪ akula ʻo ʻElia iā ʻElisai, “Ke nonoi aku nei au iā ʻoe, e noho ʻoe i ʻaneʻi; no ka mea, ua hoʻouna ʻo Iēhova iaʻu i Betela.” ʻĪ maila ʻo ʻElisai, “Ma ke ola o Iēhova, a ma ke ola o kou ʻuhane, ʻaʻole au e haʻalele iā ʻoe!” A hele pū lāua i Betela.

³ A hele mai nā haumāna a ka poʻe kāula ma Betela i o ʻElisai lā, ʻī maila iā ia, “Ua ʻike anei ʻoe e lawe auaneʻi ʻo Iēhova i kēia lā i kou haku mai kou poʻo aku?” ʻĪ maila ia, “ʻAe, ua ʻike au; e hāmau ʻoukou!”

⁴ ʻĪ akula ʻo ʻElia iā ia, “E ʻElisai ē, ke nonoi aku nei au iā ʻoe, e noho ʻoe ma ʻaneʻi; no ka mea, ua hoʻouna mai ʻo Iēhova iaʻu i Ieriko.” ʻĪ maila kēlā, “Ma ke ola o Iēhova a ma ke ola o kou ʻuhane, ʻaʻole au e haʻalele iā ʻoe!” A hele pū lāua i Ieriko.

⁵ A hele maila nā haumāna a ka poʻe kāula ma Ieriko i o ʻElisai lā, ʻī maila iā ia, “Ua ʻike anei ʻoe, e lawe auaneʻi ʻo Iēhova i kēia lā i kou haku mai kou poʻo aku?” ʻĪ akula kēlā, “ʻAe, ua ʻike au; e hāmau ʻoukou!”

⁶ ʻĪ akula ʻo ʻElia iā ia, “Ke nonoi aku nei au iā ʻoe, e noho ʻoe ma ʻaneʻi; no ka mea, ua hoʻouna mai ʻo Iēhova iaʻu i Ioredane.” ʻĪ maila kēlā, “Ma ke ola o Iēhova a ma ke ola o kou ʻuhane, ʻaʻole au e haʻalele iā ʻoe!” A hele akula lāua a ʻelua.

⁷ ¶ A hele akula nā kānaka he kanalima no nā haumāna a ka poʻe kāula, a kū mai ma kahi lōʻihi aku; a kū nō lāua a ʻelua ma Ioredane.

⁸ A lawe akula ʻo ʻElia i kona ʻaʻahu, a ʻopiʻopi ihola, a hahau ihola i ka wai, a hoʻokaʻawale ʻia aʻela ia, ma ʻō a ma ʻō; a hele aku lāua a ʻelua i kēlā kapa ma ka ʻāina maloʻo.

⁹ A hiki akula lāua ma kēlā ʻaoʻao, ʻī akula ʻo ʻElia iā ʻElisai, “E nonoi mai ʻoe i ka mea aʻu e hana aku ai nou, ma mua o kuʻu lawe ʻia ʻana mai ou aku lā.” ʻĪ maila ʻo ʻElisai, “Ke nonoi aku nei au iā ʻoe, i pāpālua o kou ʻuhane ma luna oʻu.”

¹⁰ ʻĪ akula ia, “He mea paʻakikī kāu i noi mai nei; inā e ʻike ʻoe iaʻu i kuʻu lawe ʻia ʻana mai ou aku lā, pēlā e hana ʻia mai ai nou, akā i ʻole, ʻaʻole e hana ʻia mai.”

¹¹ A i ko lāua hele ʻana aku, e kamaʻilio pū ana, aia hoʻi, he hale kaʻa ahi, a me nā lio ahi, a hoʻokaʻawale ʻia lāua a ʻelua, a piʻi aʻela ʻo ʻElia i loko o ka puahiohio i ka lani.

¹² ʻIke akula ʻo ʻElisai, auē akula, “E kuʻu makua, e kuʻu makua, ʻo ka hale kaʻa o kā ʻIseraʻela, a me nā hoʻoholo lio ona!” ʻAʻole ia i ʻike hou aku iā ia, a lālau ikaika ihola i kona ʻaʻahu, a nahae iā ia i nā ʻāpana ʻelua.

¹³ A lawe akula ia i ka ʻaʻahu o ʻElia, ka mea i hāʻule iho mai ona iho lā, a hoʻi akula, a kū ma kapa o Ioredane.

¹⁴ Lawe akula ia i ka ʻaʻahu o ʻElia, ka mea i hāʻule mai ona mai lā, a hahau ihola i ka wai, ʻī akula, “ʻAuhea lā ʻo Iēhova ke Akua o ʻElia?” A i kona hahau ʻana i ka wai, hoʻokaʻawale ʻia aʻela ia ma ʻō a ma ʻō; a hele mai ʻo ʻElisai ma kēia ʻaoʻao.

¹⁵ ¶ A ʻo nā haumāna a ka poʻe kāula ma Ieriko, i kū maila, ʻike akula lākou iā ia, ʻī aʻela, “Ua kau mai ka ʻuhane o ʻElia ma luna o ʻElisai.” A hele akula lākou e hālāwai me ia, a kūlou ihola lākou ma ka honua i mua ona.

¹⁶ A ʻī akula lākou iā ia, “Aia hoʻi, eia nō me kāu poʻe kauā he kanalima nā kānaka ikaika; ke nonoi aku nei mākou iā ʻoe, e hele lākou e ʻimi i kou haku; malia paha ua lawe aku ka makani o Iēhova iā ia, a ua hoʻolei iā ia ma kekahi mauna, a ma kekahi awāwa paha.” ʻĪ maila ia, “Mai hoʻouna aku ʻoukou.”

¹⁷ A koi akula lākou iā ia a hilahila ʻo ia, ʻī maila ia, “E hoʻouna aku ʻoukou!” A hoʻouna akula lākou i kanalima kānaka; a ʻimi lākou iā ia i nā lā ʻekolu, ʻaʻole i loaʻa.

¹⁸ A hoʻi hou maila lākou iā ia; (no ka mea, e noho ana nō ia ma Ieriko), ʻī akula ia iā lākou, “ʻAʻole anei au i ʻōlelo aku iā ʻoukou, ‘Mai hele ʻoukou’?”

¹⁹ ¶ ʻĪ akula nā kānaka o ke kūlanakauhale iā ʻElisai, “Aia hoʻi, ua maikaʻi ke kahua o ke kūlanakauhale, e like me kuʻu haku e ʻike nei; akā, ua ʻino ka wai, a he ʻāina hoʻohānau hapa.”

²⁰ ʻĪ akula ia, “E lawe mai iaʻu i kīʻaha hou, a hahao i paʻakai ma loko”; a lawe mai lākou i ona lā.

²¹ A hele aku ia i ke kumu o nā wai, a hoʻolei ihola i ka paʻakai ma loko, ʻī akula, “Ke ʻōlelo mai nei ʻo Iēhova pēnēia, ‘Ua hoʻomaikaʻi au i kēia wai; ʻaʻole he make hou mai laila mai, ʻaʻole hoʻi he hoʻohānau hapa.’”

²² Pēlā i hoʻomaikaʻi ʻia aʻe ka wai a hiki i kēia lā, e like me ka ʻōlelo a ʻElisai āna i ʻōlelo ai.

²³ ¶ Piʻi aʻela ia mai laila aku i Betela; a i kona hele ʻana ma ke ala, hele nā kamaliʻi mai loko aʻe o ke kūlanakauhale, a hoʻomāʻewaʻewa akula iā ia, ʻī akula iā ia, “E piʻi ʻoe i luna, e ka ʻōhule; e piʻi ʻoe i luna, e ka ʻōhule!”

²⁴ Hāliu aʻela ia, a nānā maila iā lākou, a hōʻino maila iā lākou ma ka inoa ʻo Iēhova; a hele mai nā bea wahine ʻelua, mai ka ulu lāʻau mai, a haehae i nā kamaliʻi, he kanahākumamālua o lākou.

²⁵ Hele akula ia mai laila aku i ka mauna ʻo Karemela; a mai laila aku, hoʻi akula ia i Samaria.