KA BUKE ʻALUA NO NĀ ALIʻI 19 - Ka Baibala Hemolele

1 Kiʻi akula ʻo Hezekia iā ʻIsaia e pule no lākou. 9 ʻO ka palapala kūamuamu a Senakeriba iā Hezekia. 35 No ka luku ʻia ʻo ko ʻAsuria poʻe kaua.

MOKUNA XIX.

¹ ¶ A lohe aʻela ʻo Hezekia ke aliʻi, haehae ihola ia i kona ʻaʻahu, a hoʻouhi iā ia iho i ke kapa ʻinoʻino, a komo akula ia i ka hale o Iēhova.

² Hoʻouna akula ia iā ʻEliakima ka luna o ko ka hale, a me Sebena, ke kākau ʻōlelo, a me ka poʻe kahiko o nā kāhuna i hoʻouhi ʻia i nā kapa ʻinoʻino, i o ʻIsaia lā ke kāula, ke keiki a ʻAmoza.

³ ʻĪ akula lākou iā ia, “Ke ʻōlelo mai nei ʻo Hezekia, pēnēia, ‘ʻO kēia lā, he lā pilikia, pōʻino a me ka hoʻowahāwahā; no ka mea, ua hiki mai ka manawa e hānau ai nā keiki, ʻaʻohe ikaika e hānau mai ai.

⁴ ‘Malia paha e hoʻolohe mai ʻo Iēhova kou Akua i nā ʻōlelo a pau a Rabesake, ka mea a ke aliʻi o ʻAsuria kona haku i hoʻouna mai ai e hōʻino i ke Akua ola; a e ʻāhewa aku i nā ʻōlelo a Iēhova kou Akua i lohe ai; no laila e pule aku ʻoe no ka poʻe i koe i loaʻa.’”

⁵ A hiki aku nā kauā a Hezekia ke aliʻi i o ʻIsaia lā.

⁶ ʻĪ maila ʻo ʻIsaia iā lākou, “Penei ʻoukou e ʻōlelo aku ai i ko ʻoukou haku, ‘Ke ʻōlelo mai nei ʻo Iēhova pēnēia, “Mai makaʻu ʻoe i nā ʻōlelo āu i lohe ai, i ka mea a nā kauā a ke aliʻi o ʻAsuria i hoʻohiki ʻino mai ai iaʻu.

⁷ “Aia hoʻi, e hoʻouna au i makani i ona lā, a e lohe nō ia i ka lono, a hoʻi aku i kona ʻāina; a e hoʻohāʻule iho au iā ia i ka pahi kaua ma kona ʻāina iho.”’”

⁸ ¶ A hoʻi aku ʻo Rabesake, a loaʻa iā ia ke aliʻi o ʻAsuria e kaua ana i ko Lebena; no ka mea, ua lohe ia, ua haʻalele ʻo ia i Lakisa.

⁹ A lohe ia no Tirehaka ke aliʻi o ʻAitiopa, i ka ʻī ʻana aʻe, “Aia hoʻi, ua hele mai ia e kaua mai iā ʻoe”; a hoʻouna hou akula ia i nā ʻelele i o Hezekia lā, ʻī akula,

¹⁰ “Penei ʻoukou e ʻōlelo aku ai iā Hezekia ke aliʻi o kā Iuda, e ʻī aku, ‘E mālama o hoʻopunipuni ʻia ʻoe e kou Akua āu i hilinaʻi ai, i ka ʻī ʻana aʻe, “ʻAʻole e hāʻawi ʻia ʻo Ierusalema i loko o ka lima o ke aliʻi o ko ʻAsuria.”

¹¹ ‘Aia hoʻi, ua lohe nō ʻoe i ka mea a nā aliʻi o ʻAsuria i hana aku ai i nā ʻāina a pau, ma ka luku loa ʻana iā lākou; a e hoʻopakele ʻia anei ʻoe?

¹² ‘Ua hoʻopakele anei nā akua o nā lāhui kanaka iā lākou, i nā mea a koʻu mau mākua i luku ai: i Gozana, i Harama, i Rezepa, a me nā kānaka o ʻEdena, ka poʻe ma Telasara?

¹³ ‘ʻAuhea ke aliʻi o Hamata, a me ke aliʻi o ʻArepada, a me ke aliʻi no nā kūlanakauhale ʻo Separevaima, ʻo Hena, a me ʻIva?’”

¹⁴ ¶ A lawe aʻela ʻo Hezekia i nā palapala mai ka lima mai o nā ʻelele, a heluhelu ihola ia mau mea; a piʻi aʻela ʻo Hezekia i ka hale o Iēhova, a hohola akula ia mau mea i mua o Iēhova.

¹⁵ Pule akula ʻo Hezekia i mua o Iēhova, ʻī akula, “E Iēhova ke Akua o kā ʻIseraʻela, ka mea e noho ana ma luna o nā keruba, ʻo ʻoe nō ke Akua, ʻo ʻoe wale nō, o nā aupuni a pau o ka honua; ʻo ʻoe kai hana i ka lani a me ka honua.

¹⁶ “E Iēhova, e hāliu mai kou pepeiao, a e lohe; e Iēhova, e wehe aʻe i kou maka, a ʻike; a lohe i nā ʻōlelo a Senakeriba, āna i hoʻouna mai ai e hōʻino aku i ke Akua ola.

¹⁷ “He ʻoiaʻiʻo nō, e Iēhova, ua luku aku nā aliʻi o ʻAsuria i nā lāhui kanaka a me ko lākou ʻāina;

¹⁸ “A ua hāʻawi aku i ko lākou mau akua i ke ahi; no ka mea, ʻaʻole lākou he akua, akā, he hana a nā lima kanaka, he lāʻau, a he pōhaku; no laila, ua luku aku lākou iā lākou lā.

¹⁹ “ʻĀnō hoʻi, e Iēhova ko mākou Akua, ke nonoi aku nei au iā ʻoe, e hoʻopakele mai ʻoe iā mākou mai loko mai o kona lima, i ʻike ai nā aupuni a pau o ka honua, ʻo ʻoe nō ʻo Iēhova ke Akua, ʻo ʻoe wale nō.”

²⁰ ¶ A hoʻouna akula ʻo ʻIsaia ke keiki a ʻAmoza i o Hezekia lā, ʻī akula, “Ke ʻōlelo mai nei ʻo Iēhova ke Akua o kā ʻIseraʻela pēnēia, ‘Ua lohe au i ka mea āu i pule mai ai iaʻu no Senakeriba ke aliʻi o ʻAsuria.’

²¹ “Eia ka ʻōlelo a Iēhova i ʻōlelo mai ai nona: ‘ʻO ka wahine puʻupaʻa, ke kaikamahine a Ziona, Ua hoʻowahāwahā mai ia iā ʻoe, a ua ʻakaʻaka mai iā ʻoe; ʻO ke kaikamahine a Ierusalema Ua hoʻoluli mai ia i kona poʻo ma hope ou!

²² ‘ʻO wai lā kāu i hōʻino ai, a i hoʻohiki ʻino ai? Ma luna o wai kāu i hoʻokiʻekiʻe ai i ka leo, A hāpai ai i kou maka i luna? Ma luna o ka Mea Hemolele o kā ʻIseraʻela.

²³ ‘Ma kou poʻe ʻelele ua hōʻino ʻoe iā Iēhova, A ua ʻī mai, “Me nā hale kaʻa oʻu a nui Ua piʻi mai au i kahi kiʻekiʻe o nā mauna, I nā ʻaoʻao hoʻi o Lebanona; A e kua aku au i kona mau lāʻau kedera loloa A me kona mau lāʻau paina maikaʻi; A e komo aku au i ka hale kipa o kona mokuna, I ka ulu lāʻau o kona kīhāpai ulu.

²⁴ “Ua ʻeli iho au, a ua inu i ka wai malihini, A me ka poho o kuʻu wāwae, Ua hoʻomaloʻo au i nā muliwai o ʻAigupita.”

²⁵ ¶ ‘ʻAʻole anei ʻoe i lohe i ka manawa ma mua Naʻu nō ia i hana, A i nā wā kahiko, naʻu nō ia i hoʻokumu? ʻĀnō, ua hoʻokō nō au, I lilo ai ʻoe I mea e luku ai i nā kūlanakauhale i hoʻopaʻa ʻia, a lilo i mau puʻu ʻōpala.

²⁶ ‘No laila ua nāwaliwali ko lākou poʻe kānaka; A ua weliweli a pīhoihoi; Ua like lākou me ka lau nahele o ke kula A me ka lāʻau uliuli, Me ka weuweu ma luna o ka hale A me ka palaoa ʻeleʻele ma mua o ka ʻōpuʻu ʻana.

²⁷ ‘Akā, ua ʻike au i kou noho ʻana, A me kou hele ʻana i waho, a me kou komo ʻana i loko, A me kou inaina ʻana iaʻu.

²⁸ ‘No kou inaina ʻana mai iaʻu A no ka piʻi ʻana mai o kou haʻaheo i loko o koʻu pepeiao, No laila, e hoʻokomo au i koʻu lou i kou ihu A me koʻu kaula waha i kou lehelehe, A e hoʻihoʻi aku au iā ʻoe Ma ke ala āu i hele mai nei.

²⁹ ¶ ‘ʻO kēia ka hōʻailona iā ʻoe, e ʻai ʻoukou i kēia makahiki i ka ʻai ulu wale, a ia makahiki aku i ka mea ulu wale; a i ke kolu o ka makahiki e lūlū ʻoukou, a e hōʻiliʻili, a e kanu i nā māla waina, a e ʻai i kona hua.

³⁰ ‘A ʻo ke koena i pakele o ka ʻohana o Iuda e kolo leʻa ke aʻa ma lalo, a e hua mai i ka hua ma luna.

³¹ ‘No ka mea, e puka aku auaneʻi ke koena mai Ierusalema aku, a me ka poʻe i pakele mai ka mauna ʻo Ziona aku. ʻO ka ikaika o Iēhova e hana mai i kēia.’

³² “No ia mea, ke ʻōlelo mai nei ʻo Iēhova penei no ke aliʻi o ʻAsuria, ‘ʻAʻole ia e komo ma loko o kēia kūlanakauhale, ʻaʻole hoʻi e pana aku i ka pua ma laila, ʻaʻole hoʻi e hele mai i mua ona me ka pale kaua, ʻaʻole e hoʻāhu i puʻu e kū pono ana iā ia.

³³ ‘Ma ke ala āna i hele mai ai, ma laila ʻo ia e hoʻi aku ai; ʻaʻole ia e komo i loko o kēia kūlanakauhale,’ wahi a Iēhova.

³⁴ ‘No ka mea, e mālama nō wau i kēia kūlanakauhale e hoʻōla nō iā ia noʻu, a no Dāvida kaʻu kauā.’”

³⁵ ¶ A ia pō iho, hele akula ka ʻānela o Iēhova, a luku akula, ma kahi hoʻomoana o ko ʻAsuria, i hoʻokahi haneri a me kanawalukumamālima tausani; a ala aʻela lākou i kakahiaka nui, aia hoʻi, he poʻe kupapaʻu make lākou a pau.

³⁶ A haʻalele akula ʻo Senakeriba ke aliʻi o ʻAsuria, hele aku a hoʻi akula, a noho ihola ma Nineva.

³⁷ A i kona hoʻomana ʻana ma ka hale o Niseroka kona akua, ʻo ʻAderameleka, a me Sarezera, kāna mau keiki, pepehi akula lāua iā ia me ka pahi kaua, a holo lāua i ka ʻāina ʻo ʻArarata. A noho aliʻi ihola ʻo ʻEsarehadona, kāna keiki, ma kona hakahaka.