KA BUKE ʻALUA NO NĀ ALIʻI 16 - Ka Baibala Hemolele

1 No ka hewa o ko ʻAhaza aliʻi ʻana. 5 Kaua mai ʻo Rezina a me Peka iā ia. 17 Hana ʻino akula i ka luakini o Iēhova no ke aliʻi o ʻAsuria. 20 Make ihola ia, a noho aliʻi ihola ʻo Hezekia kāna keiki.

MOKUNA XVI.

¹ ¶ I ka makahiki ʻumikumamāhiku o Peka ke keiki a Remalia, i lilo ai ʻo ʻAhaza, ke keiki a Iotama, ke aliʻi o kā Iuda, i aliʻi.

² He iwakālua nā makahiki o ʻAhaza i kona wā i lilo ai i aliʻi, a he ʻumikumamāono nā makahiki āna i aliʻi ai ma Ierusalema; ʻaʻole ia i hana pono i mua o Iēhova kona Akua, e like me Dāvida kona kupuna.

³ Akā, hele nō ia ma ka ʻaoʻao o nā aliʻi o kā ʻIseraʻela, a hoʻohele aku hoʻi i kāna keiki i loko o ke ahi, e like me nā mea hoʻowahāwahā ʻia o nā lāhui kanaka a Iēhova i kipaku aʻe mai ke alo aku o nā mamo a ʻIseraʻela.

⁴ A kaumaha aku nō hoʻi a kuni i ka mea ʻala ma nā heiau, a ma nā puʻu, a ma lalo o nā lāʻau uliuli a pau.

⁵ ¶ A laila hele mai ʻo Rezina, ke aliʻi o Suria, a me Peka ke keiki a Remalia, ke aliʻi o kā ʻIseraʻela, i Ierusalema i ke kaua; a hoʻopilikia lākou iā ʻAhaza, ʻaʻole e hiki iā lākou ke hoʻopio iā ia.

⁶ Ia manawa, hoʻihoʻi akula ʻo Rezina, ke aliʻi o Suria, iā ʻElata no Suria, a kipaku akula i nā Iudaio mai ʻElata aku; a hele mai ko Suria i ʻElata, a noho i laila a hiki i kēia manawa.

⁷ ¶ A hoʻouna akula ʻo ʻAhaza i nā ʻelele iā Tigelata-Pilesera ke aliʻi o ʻAsuria, ʻī akula, “ʻO wau nō kāu kauā, a ʻo kāu keiki hoʻi; e piʻi mai ʻoe, a e hoʻopakele iaʻu mai ka lima mai o ke aliʻi o Suria, a mai ka lima mai o ke aliʻi o kā ʻIseraʻela, e kūʻē mai ana iaʻu.”

⁸ A lawe akula ʻo ʻAhaza i ke kālā a me ke gula i loaʻa ma ka hale o Iēhova, a ma ka waihona kālā o ka hale o ke aliʻi, a hoʻouna akula i makana no ke aliʻi o ʻAsuria.

⁹ A hoʻolohe mai ke aliʻi o ʻAsuria iā ia; a hele akula ke aliʻi o ʻAsuria i Damaseko, a hoʻopio akula ia, a lawe pio akula i ko laila ma Kira, a pepehi akula iā Rezina.

¹⁰ ¶ A hele akula ʻo ʻAhaza ke aliʻi e hālāwai me Tigelata-Pilesera ke aliʻi o ʻAsuria ma Damaseko; a ʻike akula ia i kekahi kuahu ma Damaseko; a hoʻouna akula ʻo ʻAhaza ke aliʻi i o ʻUriia lā ke kahuna i ke ʻano o ke kuahu a me kāna kiʻi, e like me ka hana ʻana o ia mea a pau.

¹¹ A hana akula ʻo ʻUriia ke kahuna i ke kuahu e like me ka mea a pau a ʻAhaza ke aliʻi i hoʻouna aku ai mai Damaseko aku; pēlā ʻo ʻUriia ke kahuna i hana ai i ka hoʻi ʻana mai o ʻAhaza ke aliʻi mai Damaseko mai.

¹² A hiki mai ke aliʻi mai Damaseko mai, ʻike akula ke aliʻi i ke kuahu, a hele akula a kokoke i ke kuahu, a kaumaha aku ma luna ona.

¹³ A puhi akula i ka mōhai kuni, a me kāna mōhai ʻai, a ninini ihola i kāna mōhai inu, a kāpīpī i ke koko o kāna mau mōhai hoʻomalu ma luna o ke kuahu.

¹⁴ A lawe mai nō hoʻi ia i ke kuahu keleawe i mua o Iēhova mai ke alo mai o ka hale, mai waena mai o ke kuahu a ʻo ka hale o Iēhova, a waiho akula ia mea ma ka ʻaoʻao ʻākau o ke kuahu.

¹⁵ A kauoha akula ʻo ʻAhaza ke aliʻi iā ʻUriia ke kahuna, ʻī akula, “Ma luna o ke kuahu nui e puhi aku i ka mōhai kuni kakahiaka, a me ka mōhai ʻai o ke ahiahi, a me ka mōhai kuni a ke aliʻi, a me kāna mōhai ʻai, me ka mōhai kuni a nā kānaka a pau o ka ʻāina, a me kā lākou mōhai ʻai, a me kā lākou mōhai inu; a e kāpīpī ma luna ona i ke koko a pau o ka mōhai kuni, a me ke koko a pau o ka mōhai; a noʻu ke kuahu keleawe e nīnau aku ai.”

¹⁶ A hana ihola ʻo ʻUriia ke kahuna e like me nā mea a pau a ke aliʻi, a ʻAhaza i kauoha aku ai.

¹⁷ ¶ A ʻoki iho ʻo ʻAhaza ke aliʻi i nā kihi o nā kumu, a lawe aku i ka ipu holoi mai o lākou aku; a lawe aʻela ia i ka ipu nui mai nā bipi keleawe mai ma lalo iho ona, a kau ihola ia mea ma luna o nā pōhaku i hoʻonoho ʻia.

¹⁸ A ʻo ka lānai no ka Sābati a lākou i kūkulu ai ma ka hale, a ʻo ke keʻena komo a ke aliʻi ma waho, hoʻohuli aʻela ia mai ka hale o Iēhova aku no ke aliʻi o ʻAsuria.

¹⁹ A ʻo nā hana i koe a ʻAhaza, ʻo nā mea āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

²⁰ A hiamoe ihola ʻo ʻAhaza me kona poʻe kūpuna, a ua kanu ʻia ʻo ia me kona poʻe kūpuna ma ke kūlanakauhale o Dāvida; a noho aliʻi ihola ʻo Hezekia kāna keiki ma kona hakahaka.