KA BUKE ʻALUA NO NĀ ALIʻI 15 - Ka Baibala Hemolele

1 Pono ko ʻAzaria aliʻi ʻana. 5 ʻO Iotama kāna keiki, ʻo ia ke aliʻi ma hope ona. 13 Pepehi ʻia ʻo Saluma e Menahema. 34 Pono ko Iotama aliʻi ʻana.

MOKUNA XV.

¹ ¶ I ka makahiki iwakāluakumamāhiku o Ieroboama ke aliʻi o kā ʻIseraʻela, i lilo ai ʻo ʻAzaria ke keiki a ʻAmazia ke aliʻi o kā Iuda, i aliʻi.

² He ʻumikumamāono kona mau makahiki i ka wā i lilo ai ia i aliʻi, a he kanalimakumamālua nā makahiki āna i aliʻi ai ma Ierusalema. A ʻo Iekolia ka inoa o kona makuahine no Ierusalema.

³ A hana pono akula nō ia i mua o Iēhova e like me nā mea a pau a ʻAmazia kona makua kāne i hana ai.

⁴ Akā hoʻi, ʻaʻole i lawe ʻia aku nā heiau; kaumaha aku nō nā kānaka, a kuni hoʻi i ka mea ʻala ma nā heiau.

⁵ A hahau mai ʻo Iēhova i ke aliʻi, a lilo ia i lēpero, a hiki i ka lā o kona make ʻana, a noho ia ma ka hale no ka poʻe maʻi; a ʻo Iotama ke keiki a ke aliʻi, ma luna o ka hale nō ʻo ia e hoʻoponopono ana i nā kānaka o ka ʻāina.

⁶ A ʻo nā hana i koe a ʻAzaria, a me nā mea a pau āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

⁷ A hiamoe ihola ʻo ʻAzaria me kona poʻe kūpuna; a kanu ihola lākou iā ia me kona poʻe kūpuna ma ke kūlanakauhale o Dāvida; a noho aliʻi ihola ʻo Iotama, kāna keiki, ma kona hakahaka.

⁸ ¶ I ka makahiki kanakolukumamāwalu o ʻAzaria ke aliʻi o kā Iuda, i noho aliʻi ai ʻo Zekaria ke keiki a Ieroboama ma luna o kā ʻIseraʻela ma Samaria i nā malama ʻeono.

⁹ Hana ʻino akula ia i mua o Iēhova, e like me ka mea a kona mau kūpuna i hana ai; ʻaʻole ia i haʻalele i nā hewa o Ieroboama ke keiki a Nebata, nāna i hoʻolilo kā ʻIseraʻela i ka hewa.

¹⁰ A ʻo Saluma, ke keiki a Iabesa, kipi aʻela ʻo ia iā ia, a pepehi akula iā ia i mua o nā kānaka, a make ihola ia, a lilo ia i aliʻi ma kona hakahaka.

¹¹ A ʻo nā hana i koe a Zekaria, aia hoʻi, ua kākau ʻia lākou i loko o ka buke ʻoihana aliʻi a nā aliʻi o kā ʻIseraʻela.

¹² ʻO ia ka ʻōlelo a Iēhova āna i ʻōlelo mai ai iā Iehu, ʻī maila, “E noho kāu poʻe keiki ma luna o ka noho aliʻi o kā ʻIseraʻela, a hiki i ke kualua.” A pēlā ʻiʻo nō.

¹³ ¶ ʻO Saluma, ke keiki a Iabesa, noho aliʻi ihola ia i ka makahiki kanakolukumamāiwa o ʻUzia ke aliʻi o kā Iuda; a ʻo nā lā āna i noho aliʻi ai ma Samaria, hoʻokahi ia malama.

¹⁴ No ka mea, piʻi aʻela ʻo Menahema, ke keiki a Gadi mai Tireza aku, a hele mai i Samaria, a pepehi akula iā Saluma ke keiki a Iabesa ma Samaria a make, a noho aliʻi ihola ia ma kona hakahaka.

¹⁵ A ʻo nā hana i koe a Saluma, a me kona kipi āna i kipi ai, aia hoʻi, ua kākau ʻia lākou i loko o ka buke ʻoihana aliʻi a nā aliʻi o kā ʻIseraʻela.

¹⁶ Ia manawa luku akula ʻo Menahema i Tipesa, a me nā mea a pau i loko ona, a me ko laila mau mokuna mai Tireza mai; no ka mea, ʻaʻole lākou i wehe aʻe, no ia mea, luku akula ia; a kaha akula ia i ko laila poʻe wāhine hāpai a pau.

¹⁷ ¶ I ka makahiki kanakolukumamāiwa o ʻAzaria ke aliʻi o kā Iuda, i lilo ai ʻo Menahema ke keiki a Gadi i aliʻi ma luna o kā ʻIseraʻela, he ʻumi makahiki āna i noho aliʻi ai ma Samaria.

¹⁸ A hana ʻino akula ia i mua o Iēhova; i kona mau lā a pau, ʻaʻole ia i haʻalele i nā hewa o Ieroboama ke keiki a Nebata, nāna i hoʻolilo kā ʻIseraʻela i ka hewa.

¹⁹ ¶ Hele mai ʻo Pula ke aliʻi o ʻAsuria i ka ʻāina; a hāʻawi akula ʻo Menahema iā Pula i hoʻokahi tausani tālena kālā, i kōkua mai ai kēlā iā ia e hoʻokūpaʻa i ke aupuni i loko o kona lima.

²⁰ A ʻauhau akula ʻo Menahema i ke kālā i kā ʻIseraʻela, i ka poʻe mea waiwai nui, i kēlā kanaka kēia kanaka he kanalima sekela e hāʻawi aku i ke aliʻi o ʻAsuria; a hoʻi akula ke aliʻi o ʻAsuria, ʻaʻole ia i hoʻokaʻulua ma laila i loko o ka ʻāina.

²¹ A ʻo nā hana i koe a Menahema, a me nā mea a pau āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?

²² A hiamoe ihola ʻo Menahema me kona poʻe kūpuna; a noho aliʻi ihola ʻo Pekahia kāna keiki ma kona hakahaka.

²³ ¶ I ka makahiki kanalima o ʻAzaria ke aliʻi o kā Iuda, i lilo ai ʻo Pekahia ke keiki a Menahema i aliʻi ma luna o kā ʻIseraʻela, ma Samaria, ʻelua makahiki āna i aliʻi ai.

²⁴ Hana ʻino akula ia i mua o Iēhova; ʻaʻole ia i haʻalele i nā hewa o Ieroboama ke keiki a Nebata nāna i hoʻolilo kā ʻIseraʻela i ka hewa.

²⁵ A ʻo Peka ke keiki a Remalia, he luna koa nona, kipi maila ʻo ia iā ia, a pepehi ihola iā ia ma Samaria i loko o kahi paʻa o ka hale aliʻi, a me ʻAregoba, a me ʻArie, a i nā kānaka he kanalima me ia no Gileada; a make ihola ia, a lilo kēlā i aliʻi ma kona hakahaka.

²⁶ A ʻo nā hana i koe a Pekahia, a ʻo nā mea a pau āna i hana ai, aia hoʻi, ua kākau ʻia lākou i loko o ka buke ʻoihana aliʻi a nā aliʻi o kā ʻIseraʻela.

²⁷ ¶ I ka makahiki kanalimakumamālua o ʻAzaria ke aliʻi o kā Iuda, i lilo ai ʻo Peka ke keiki a Remalia i aliʻi ma luna o kā ʻIseraʻela ma Samaria, he iwakālua nā makahiki āna i aliʻi ai.

²⁸ A hana ʻino akula ia i mua o Iēhova; ʻaʻole ia i haʻalele i nā hewa a Ieroboama ke keiki a Nebata, nāna i hoʻolilo kā ʻIseraʻela i ka hewa.

²⁹ ¶ I ka manawa iā Peka ke aliʻi o kā ʻIseraʻela, hele mai ʻo Tigelata-Pilesera ke aliʻi o ʻAsuria, a hoʻopio i ko ʻIiona, a me ko ʻAbele Bete Maʻaka, a me ko Ianoa, a me ko Kadesa, a me ko Hazora, a me ko Gileada, a me ko Galilaia, i ko ka ʻāina a pau o Napetali, a lawe pio akula iā lākou i ʻAsuria.

³⁰ A kipi aʻela ʻo Hosea, ke keiki a ʻEla, iā Peka, ke keiki a Remalia, a pepehi akula iā ia, a noho aliʻi ihola ia ma kona wahi, i ka makahiki iwakālua o Iotama, ke keiki a ʻUzia.

³¹ A ʻo nā hana i koe a Peka, a ʻo nā mea a pau āna i hana ai, aia hoʻi, ua kākau ʻia lākou i loko o ka buke ʻoihana aliʻi a nā aliʻi o kā ʻIseraʻela.

³² ¶ I ka lua o ka makahiki o Peka ke keiki a Remalia ke aliʻi o kā ʻIseraʻela, i lilo ai ʻo Iotama, ke keiki a ʻUzia, ke aliʻi o kā Iuda i aliʻi.

³³ He iwakāluakumamālima nā makahiki ona i kona manawa i lilo ai i aliʻi, a he ʻumikumamāono nā makahiki āna i aliʻi ai ma Ierusalema. A ʻo Ierusa ka inoa o kona makuahine, ke kaikamahine ia na Zadoka.

³⁴ A hana pono akula ia i mua o Iēhova, e like me nā mea a pau a ʻUzia kona makua kāne i hana ai.

³⁵ Akā hoʻi, ʻaʻole i lawe ʻia aku nā heiau; kaumaha aku nō nā kānaka, a kuni hoʻi i ka mea ʻala ma nā heiau. Hana aku nō ia i ka Puka Kiʻekiʻe o ka hale o Iēhova.

³⁶ A ʻo nā hana i koe a Iotama, a ʻo nā mea a pau āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

³⁷ Ia mau lā hoʻomaka ihola ʻo Iēhova e hoʻouna aku iā Rezina ke aliʻi o Suria, a me Peka ke keiki a Remalia e kūʻē i kā Iuda.

³⁸ A hiamoe ihola o Iotama me kona poʻe kūpuna, a kanu ʻia ʻo ia me kona poʻe kūpuna ma ke kūlanakauhale o Dāvida kona kupuna; a noho aliʻi ihola ʻo ʻAhaza kāna keiki ma kona wahi.