KA BUKE ʻALUA NO NĀ ALIʻI 14 - Ka Baibala Hemolele

1 Pono ko ʻAmazia aliʻi ʻana. Lanakila ia ma luna o kā ʻEdoma. 7 Lanakila ʻo Iehoasa ma luna o ʻAmazia, a hoʻohiolo i ka pā pōhaku o Ierusalema; a lawe aku i ka waiwai a pau o ka hale o Iēhova a me ka hale o ke aliʻi. 17 Pepehi ʻia ʻo ʻAmazia e ka poʻe kipi.

MOKUNA XIV.

¹ ¶ I ka makahiki ʻelua o Ioasa ke keiki a Iehoahaza, ke aliʻi o kā ʻIseraʻela, i noho aliʻi ai ʻo ʻAmazia ke keiki a Ioasa ke aliʻi o kā Iuda.

² I ka makahiki ona he iwakāluakumamālima, i lilo ai ia i aliʻi, a he iwakāluakumamāiwa nā makahiki āna i aliʻi ai ma Ierusalema. A ʻo Iehoadana ka inoa o kona makuahine no Ierusalema.

³ A hana pono aku nō ia i mua o Iēhova; ʻaʻole naʻe i like me kā Dāvida kona kupuna; hana aku nō ia e like me nā mea a pau a Ioasa a kona makua kāne i hana ai.

⁴ Akā hoʻi, ʻaʻole i lawe ʻia aku nā heiau; kaumaha aku nō nā kānaka, a kuni hoʻi i ka mea ʻala ma nā heiau.

⁵ A i ka manawa i hoʻokūpaʻa ʻia ai ke aupuni ma kona lima, pepehi akula nō ia i kāna poʻe kauā, nāna i pepehi aku ke aliʻi kona makua kāne.

⁶ Akā, ʻaʻole ia i pepehi aku i nā keiki a ka poʻe pepehi kanaka: e like me ka palapala ma ka Buke o ke Kānāwai o Mose, ka mea a Iēhova i kauoha ai, ʻī maila, “ʻAʻole e pepehi ʻia nā mākua no nā keiki, ʻaʻole hoʻi e pepehi ʻia nā keiki no nā mākua; akā, e pepehi ʻia kēlā kanaka kēia kanaka no kona hewa iho.”

⁷ Pepehi akula ia i kā ʻEdoma ma ke Awāwa Paʻakai i nā tausani he ʻumi, a hoʻopio akula i Sela ma ke kaua ʻana, a kapa akula i kona inoa, ʻo Ioketeʻela, a hiki i kēia lā.

⁸ Ia manawa hoʻouna akula ʻo ʻAmazia i nā ʻelele i o Iehoasa, ke keiki a Iehoahaza, ke keiki a Iehu ke aliʻi o kā ʻIseraʻela, ʻī akula, “ʻEā, e ʻike nā maka o kaua.”

⁹ A hoʻouna maila ʻo Iehoasa ke aliʻi o kā ʻIseraʻela i o ʻAmazia lā, ke aliʻi o kā Iuda, ʻī maila, “Hoʻouna akula ka pua kala ma Lebanona i ka lāʻau kedara ma Lebanona, ʻī akula, ‘E hāʻawi mai ʻoe i kāu kaikamahine i wahine na kaʻu keiki kāne!’ A hele aʻela ka holoholona o Lebanona, a hehi ihola i ka pua kala.

¹⁰ “Ua pepehi nō naʻe ʻoe i kā ʻEdoma, a ua hoʻokiʻekiʻe kou naʻau iā ʻoe iho; e hoʻonani ʻoe i laila, a e noho ma kou hale; no ke aha lā ʻoe e kaua pū me ka hewa, i hāʻule iho ai ʻoe, ʻo ʻoe, a me kā Iuda me ʻoe?”

¹¹ ¶ Akā, ʻaʻole i hoʻolohe ʻo ʻAmazia; no ia mea, piʻi aʻela ʻo Iehoasa ke aliʻi o kā ʻIseraʻela; a ʻike nā maka o lāua me ʻAmazia, ke aliʻi o kā Iuda ma Bete Semesa, no kā Iuda.

¹² A pepehi ʻia akula ʻo kā Iuda i mua o kā ʻIseraʻela, holo lākou ʻo kēlā kanaka kēia kanaka i kona halelewa.

¹³ A ʻo Iehoasa ke aliʻi o kā ʻIseraʻela, lawe pio akula ʻo ia iā ʻAmazia, i ke aliʻi o kā Iuda, ke keiki a Iehoasa, ke keiki a ʻAhazia ma Bete Semesa, a hele mai i Ierusalema, a hoʻohiolo i ka pā pōhaku o Ierusalema, mai ka ʻĪpuka o ʻEperaima, a hiki i ka ʻĪpuka Kihi, ʻehā haneri haʻilima.

¹⁴ A lawe akula ia i ke gula a pau a me ke kālā, a me nā kīʻaha a pau i loaʻa ma ka hale o Iēhova, a ma nā waihona waiwai o ka hale o ke aliʻi, a i nā mea pani hakahaka, a hoʻi akula i Samaria.

¹⁵ ¶ A ʻo nā hana i koe a Iehoasa āna i hana ai, a me kona ikaika a me kona kaua ʻana me ʻAmazia ke aliʻi o kā Iuda, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?

¹⁶ A hiamoe ihola ʻo Iehoasa me kona poʻe kūpuna, a kanu ʻia ihola ia ma Samaria me nā aliʻi o kā ʻIseraʻela; a noho aliʻi ihola ʻo Ieroboama kāna keiki ma kona wahi.

¹⁷ ¶ A ola ihola ʻo ʻAmazia ke keiki a Ioasa ke aliʻi o kā Iuda i nā makahiki he ʻumikumamālima, ma hope iho o ka make ʻana o Iehoasa ke keiki a Iehoahaza, ke aliʻi o kā ʻIseraʻela.

¹⁸ A ʻo nā hana i koe a ʻAmazia ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

¹⁹ A kipi akula lākou iā ia ma Ierusalema, a holo akula ia i Lakisa, a hoʻouna akula lākou ma hope ona i Lakisa; a pepehi akula iā ia ma laila.

²⁰ A lawe mai lākou iā ia ma luna o nā lio; a kanu ʻia ʻo ia ma Ierusalema me kona poʻe kūpuna ma ke kūlanakauhale o Dāvida.

²¹ A lawe nā kānaka a pau o kā Iuda iā ʻAzaria, he ʻumikumamāono kona mau makahiki, a hoʻoaliʻi akula lākou iā ia i hope no ʻAmazia kona makua kāne.

²² A hana akula ia i ʻElata, a hoʻihoʻi akula ia wahi no kā Iuda, ma hope o ka hiamoe ʻana o ke aliʻi me kona poʻe kūpuna.

²³ ¶ I ka makahiki ʻumikumamālima o ʻAmazia ke keiki a Ioasa, ke aliʻi o kā Iuda, i lilo ai ʻo Ieroboama, ke keiki a Ioasa ke aliʻi o kā ʻIseraʻela, i aliʻi ma Samaria, he kanahākumamākahi nā makahiki o kona aliʻi ʻana.

²⁴ Hana ʻino akula ia i mua o Iēhova: ʻaʻole ia i haʻalele i nā hewa a pau o Ieroboama ke keiki a Nebata, nāna i hoʻolilo kā ʻIseraʻela i ka hewa.

²⁵ Hoʻihoʻi aku nō ia i ka mokuna o kā ʻIseraʻela, mai ke komo ʻana i Hamata, a hiki i ke kai o ka pāpū, e like me ka ʻōlelo a Iēhova ke Akua o kā ʻIseraʻela āna i ʻōlelo ai ma kāna kauā, ma Iona ke keiki a ʻAmetai, ke kāula no Gata Hepera.

²⁶ No ka mea, ua ʻike nō ʻo Iēhova i ka mea kaumaha o kā ʻIseraʻela, he ʻawaʻawa nui; no ka mea, ʻaʻohe mea i paʻa, ʻaʻohe mea i paʻa ʻole, ʻaʻohe mea nāna e kōkua kā ʻIseraʻela.

²⁷ ʻAʻole ʻo Iēhova i ʻōlelo mai e hoʻokae aku ia i ka inoa o kā ʻIseraʻela ma lalo aʻe o ka lani; akā, hoʻopakele nō ia iā lākou ma ka lima o Ieroboama ke keiki a Ioasa.

²⁸ ¶ A ʻo nā hana i koe a Ieroboama, a ʻo nā mea a pau āna i hana ai, a ʻo kona ikaika āna i kaua aku ai, a me kona loaʻa ʻana o Damaseko, a me Hamata no kā Iuda, i kā ʻIseraʻela, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?

²⁹ A hiamoe ihola ʻo Ieroboama me kona poʻe kūpuna, me nā aliʻi o kā ʻIseraʻela; a noho aliʻi ihola ʻo Zekaria kāna keiki ma kona hakahaka.