KA BUKE ʻALUA NO NĀ ALIʻI 13 - Ka Baibala Hemolele

1 No ka hewa o ko Iehoahaza aliʻi ʻana, a make ihola ia. 10 Hewa nō hoʻi ko Ioasa aliʻi ʻana, kāna keiki, a make akula ia, a lilo ke aupuni iā Ieroboama, kāna keiki. 14 No ka maʻi a me ka make ʻana o ʻElisai. 22 Hoʻokaumaha ʻo Hazaʻela i kā ʻIseraʻela, a make ihola ia, a noho aliʻi ihola ʻo Bene-Hadada kāna keiki.

MOKUNA XIII.

¹ ¶ I ka makahiki iwakāluakumamākolu o Ioasa ke keiki a ʻAhazia ke aliʻi o kā Iuda, i lilo ai ʻo Iehoahaza, ke keiki a Iehu, i aliʻi ma luna o kā ʻIseraʻela ma Samaria, he ʻumikumamāhiku nā makahiki o kona aliʻi ʻana.

² A hana ʻino akula ia i mua o Iēhova, a hele akula ia ma muli o ka hewa o Ieroboama ke keiki a Nebata, nāna i hoʻolilo kā ʻIseraʻela i ka hewa; ʻaʻole ia i haʻalele ia mea.

³ A hoʻā ʻia ka inaina o Iēhova i kā ʻIseraʻela, a hāʻawi akula ia iā lākou i loko o ka lima o Hazaʻela, ke aliʻi o Suria, a i loko o ka lima o Bene-Hadada, he keiki a Hazaʻela i nā lā a pau.

⁴ A nonoi akula ʻo Iehoahaza iā Iēhova, a hoʻolohe mai ʻo Iēhova iā ia; no kona ʻike ʻana i ke kaumaha o kā ʻIseraʻela; no ka mea, ua hoʻokaumaha ke aliʻi o Suria iā lākou.

⁵ (A hāʻawi maila ʻo Iēhova i kā ʻIseraʻela i mea e pakele ai, a puka aku lākou mai lalo mai o ka lima o ko Suria; a noho ihola nā mamo a ʻIseraʻela ma ko lākou halelewa, e like me ka manawa ma mua.

⁶ Akā, ʻaʻole lākou i huli mai mai ka hewa mai o ko ka hale o Ieroboama, nāna i hoʻolilo kā ʻIseraʻela i ka hewa, akā, hahai nō lākou ma laila; a e waiho ana hoʻi ʻo ʻAsetarota ma Samaria.)

⁷ A i waiho ihola ia i nā kānaka no Iehoahaza, he kanalima hoʻoholo lio, he ʻumi nā hale kaʻa, a he ʻumi tausani koa hele wāwae wale nō; no ka mea, ua luku aku ke aliʻi o Suria iā lākou, a ua hoʻolike aku iā lākou me ka lepo no ka hehi ʻana.

⁸ A ʻo nā hana i koe a Iehoahaza, a ʻo nā mea a pau āna i hana ai, a me kona ikaika, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?

⁹ A hiamoe ihola ʻo Iehoahaza me kona poʻe kūpuna; a kanu ihola lākou iā ia ma Samaria; a ʻo Ioasa kāna keiki, noho aliʻi ihola ia ma kona wahi.

¹⁰ ¶ I ka makahiki kanakolukumamāhiku o Ioasa ke aliʻi o kā Iuda, i lilo ai ʻo Iehoasa, ke keiki a Iehoahaza, i aliʻi ma luna o kā ʻIseraʻela ma Samaria, a he ʻumikumamāono nā makahiki o kona aliʻi ʻana.

¹¹ A hana ʻino akula ia i mua o Iēhova, ʻaʻole ia i haʻalele i nā hewa a pau o Ieroboama ke keiki a Nebata, nāna i hoʻolilo kā ʻIseraʻela i ka hewa; akā, hele nō ia ma laila.

¹² A ʻo nā hana i koe o Ioasa, a ʻo nā mea a pau āna i hana ai, a me kona ikaika āna i kaua aku ai iā ʻAmazia ke aliʻi o kā Iuda, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?

¹³ A hiamoe ihola ʻo Ioasa me kona poʻe kūpuna; a noho ihola ʻo Ieroboama ma luna o kona noho aliʻi; a kanu ʻia ihola ʻo Ioasa ma Samaria me nā aliʻi o kā ʻIseraʻela.

¹⁴ ¶ A maʻi ihola ʻo ʻElisai, ʻo kona maʻi ia i make ai. A iho mai ʻo Ioasa, ke aliʻi o kā ʻIseraʻela i ona lā, a auē ihola ma luna o kona maka, ʻī akula, “E kuʻu makua, e kuʻu makua, ʻo ka hale kaʻa o kā ʻIseraʻela a me nā hoʻoholo lio ona!”

¹⁵ ʻĪ akula ʻo ʻElisai iā ia, “E lawe i kīkoʻo a me nā pua.” A lawe aʻela ia nona i kīkoʻo a me nā pua.

¹⁶ ʻĪ akula ia i ke aliʻi o kā ʻIseraʻela, “E kau aku i kou lima ma luna o ke kīkoʻo.” A kau ihola ia i kona lima; a kau akula ʻo ʻElisai i kona mau lima ma luna o nā lima o ke aliʻi.

¹⁷ ʻĪ akula ia, “E wehe aʻe i ka puka makani ma ka hikina.” A wehe aʻela ia. A laila ʻī akula ʻo ʻElisai, “E pana aku”; a pana akula ia. ʻĪ akula ia, “ʻO ka pua hoʻōla no Iēhova, a ʻo ka pua hoʻōla mai ko Suria mai; no ka mea, e pepehi auaneʻi ʻoe i ko Suria ma ʻApeka, a pau i ka luku ʻia.”

¹⁸ ʻĪ akula ia, “E lawe i nā pua.” A lawe ihola nō ia. ʻĪ akula ia i ke aliʻi o kā ʻIseraʻela, “E hahau i ka honua.” A hahau ihola ia, ʻekolu hahau ʻana, a oki.

¹⁹ A huhū akula ke kanaka o ke Akua iā ia, ʻī akula, “ʻO kāu pono nō, i ʻelima, a i ʻeono paha hahau ʻana, a laila ua hahau iho ʻoe i ko Suria, a pau i ka luku ʻia; akā, ʻānō, e hahau aku ʻoe i ko Suria i ʻekolu hahau ʻana wale nō.”

²⁰ ¶ A make ihola ʻo ʻElisai, a kanu ihola lākou iā ia. A hele mai ka poʻe hao wale o kā Moaba i ka ʻāina, i ka hiki ʻana mai o ka makahiki.

²¹ A i ko lākou kanu ʻana i kekahi kanaka, aia hoʻi, ʻike akula lākou i ka poʻe hao wale, hoʻolei akula lākou i ke kanaka i loko o ka hale lua o ʻElisai; a i ka iho ʻana o ke kanaka a pili i nā iwi o ʻElisai, ola maila ia, a kū ma luna o kona wāwae.

²² ¶ A ʻo Hazaʻela ke aliʻi o Suria, hoʻokaumaha akula ia i kā ʻIseraʻela i nā lā a pau o Iehoahaza.

²³ A manaʻo mai ʻo Iēhova iā lākou, a ahonui mai iā lākou, a nānā mai iā lākou no kāna berita iā ʻAberahama, iā ʻIsaʻaka, a me Iakoba, ʻaʻole ona makemake e luku aku iā lākou, ʻaʻole hoʻi e hoʻokuke aku iā lākou mai kona alo aku i kēia manawa.

²⁴ A make akula ʻo Hazaʻela ke aliʻi o Suria; a noho aliʻi ihola ʻo Bene-Hadada, kāna keiki, ma kona hakahaka.

²⁵ A hoʻi akula ʻo Iehoaza ke keiki a Iehoahaza a lawe akula i nā kūlanakauhale mai ka lima aku o Bene-Hadada, ke keiki a Hazaʻela, i ka mea āna i lawe aʻe mai ka lima aku o Iehoahaza kona makua kāne ma ke kaua ʻana. Lanakila akula ʻo Ioasa ma luna ona, ʻekolu nō lanakila ʻana, a hoʻihoʻi mai ia i nā kūlanakauhale o kā ʻIseraʻela.