KA BUKE ʻALUA NO NĀ ALIʻI 12 - Ka Baibala Hemolele

1 Pono ko Iehoasa aliʻi ʻana i ka wā i ola ai ʻo Iehoiada. 4 No ka hana hou ʻana i ka luakini o Iēhova. 7 Hāʻawi akula ia i ka waiwai i hoʻolaʻa ʻia no ka luakini, iā Hazaʻela ke aliʻi o Suria. 20 Pepehi ʻia ʻo ia e kāna mau kauā. Lilo kona aupuni i kāna keiki iā ʻAmazia.

MOKUNA XII.

¹ ¶ A i ka hiku o ka makahiki o Iehu, i lilo ai ʻo Iehoasa i aliʻi, a he kanahā nā makahiki o kona aliʻi ʻana ma Ierusalema; a ʻo Zibia ka inoa o kona makuahine no Beʻereseba.

² A hana pono akula ʻo Iehoasa i mua o Iēhova i kona mau lā a pau a Iehoiada a ke kahuna i aʻo mai ai iā ia.

³ Akā hoʻi, ʻaʻole i lawe ʻia aku nā heiau; kaumaha akula nā kānaka, a kuni hoʻi i ka mea ʻala ma nā heiau.

⁴ ¶ ʻŌlelo akula ʻo Iehoasa i nā kāhuna, “ʻO ke kālā a pau o nā mea i laʻa, ka mea i lawe ʻia mai i loko o ka hale o Iēhova, ʻo ke kālā pono o kēlā kanaka kēia kanaka, ʻo ke kālā o nā kānaka ma ka ʻauhau ʻana, ʻo ke kālā a pau a kēlā kanaka kēia kanaka i manaʻo ai e lawe mai i loko o ka hale o Iēhova,

⁵ “E lawe nā kāhuna, ʻo kēlā kanaka kēia kanaka ia mea no lākou, no kona hoalauna; a e hana hou lākou i kahi nahā o ka hale, i nā wahi nahā a pau i loaʻa ma laila.”

⁶ ¶ A i ka makahiki iwakāluakumamākolu o Iehoasa, ʻaʻole i hoʻopaʻa nā kāhuna i nā wahi nahā o ka hale.

⁷ A laila kāhea akula ʻo Iehoasa ke aliʻi iā Iehoiada ke kahuna a me nā kāhuna, ʻī akula iā lākou, “No ke aha ʻoukou i hoʻopaʻa ʻole ai i kahi nahā o ka hale? ʻĀnō hoʻi, mai lawe hou ʻoukou i ke kālā o ko ʻoukou hoalauna, akā, e hāʻawi aku ia mea no kahi nahā o ka hale.”

⁸ ʻAe maila nā kāhuna, ʻaʻole e lawe hou lākou i ke kālā o nā kānaka, ʻaʻole hoʻi e hana hou i kahi nahā o ka hale.

⁹ ¶ Akā, lawe akula ʻo Iehoiada ke kahuna i kahi pahu, a wili ihola i puka ma kona pani, a waiho ihola ia mea kokoke i ke kuahu ma ka ʻaoʻao ʻākau i ka hele ʻana a ke kanaka i loko o ka hale o Iēhova; a ʻo nā kāhuna, nāna i mālama i ka paepae puka, hahao lākou i loko i ke kālā a pau i lawe ʻia mai i ka hale o Iēhova.

¹⁰ A ʻike lākou, ua nui ke kālā i loko o ka pahu, piʻi maila ke kākau ʻōlelo o ke aliʻi a me ke kahuna nui, a nākiʻi ihola, a helu i ke kālā i loaʻa i loko o ka hale o Iēhova.

¹¹ A hāʻawi lākou i ke kālā i kaupaona ʻia ma ka lima o ka poʻe nāna i hana ka hana, i nā luna hoʻi o ka hale o Iēhova; a na lākou i lawe aʻe i nā kamanā, a i ka poʻe paʻahana nāna i hana ka hale o Iēhova.

¹² A i ka poʻe hahao pōhaku a i nā kālai pōhaku, a no ke kūʻai i ka lāʻau, a me nā pōhaku i kālai ʻia, e hana hou i kahi nahā o ka hale o Iēhova, a no nā mea a pau i lilo aku no ka hale o Iēhova i ka hana hou ʻana.

¹³ ʻAʻole naʻe i hana ʻia no ka hale o Iēhova nā kīʻaha kālā, nā ʻūpā koli kukui, nā kīʻaha, nā pū, a me kekahi kīʻaha gula, a me nā kīʻaha kālā, no ke kālā i lawe ʻia mai i ka hale o Iēhova.

¹⁴ No ka mea, ua hāʻawi aku lākou ia mea no ka poʻe paʻahana, a hana hou aku lākou me ia i ka hale o Iēhova.

¹⁵ ʻAʻole lākou i hoʻokolokolo me nā kānaka, nāna i lawe ke kālā e hāʻawi aku i ka poʻe paʻahana; no ka mea, ma ka pono kā lākou hana ʻana.

¹⁶ ʻO ke kālā o ka mōhai lawehala a me ke kālā o ka mōhai hala, ʻaʻole i lawe ʻia mai i loko o ka hale o Iēhova; na nā kāhuna nō ia.

¹⁷ ¶ A hele mai ʻo Hazaʻela ke aliʻi o Suria, a kaua mai i Gata, a hoʻopio ihola ia; a manaʻo ihola ʻo Hazaʻela e piʻi i Ierusalema.

¹⁸ A lawe akula ʻo Iehoasa ke aliʻi o kā Iuda i nā mea a pau i hoʻolaʻa ʻia, a Iehosapata, a me Iehorama, a me ʻAhazia, a kona mau mākua, nā aliʻi o kā Iuda i hoʻolaʻa ai, a me kona mau mea i hoʻolaʻa ʻia, a me ke gula a pau i loaʻa ma loko o ka waihona kālā ma ka hale o Iēhova, a me ka hale o ke aliʻi, a hoʻouna akula iā Hazaʻela ke aliʻi o Suria; a hele aku ia mai Ierusalema aku.

¹⁹ ¶ A ʻo nā hana i koe a Ioasa, a ʻo nā mea a pau āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā Iuda?

²⁰ A kū maila kāna mau kauā, a kipi aʻela, a pepehi akula iā Ioasa ma Betemilo, e iho ana i Sila.

²¹ No ka mea, ʻo Iozakara ke keiki a Simeata, a ʻo Iehozabada ke keiki a Somera, kāna mau kauwā, pepehi aku lāua iā ia, a make ihola ia; a kanu lākou iā ia me kona mau kūpuna ma ke kūlanakauhale o Dāvida: a noho aliʻi ihola ʻo ʻAmazia kāna keiki ma kona hakahaka.