KA BUKE ʻALUA NO NĀ ALIʻI 11 - Ka Baibala Hemolele

1 No ka pepehi ʻana o ʻAtalia i ko ka hale aliʻi a pau, ʻo Ioasa wale nō i koe, a lilo ia i aliʻi. 16 Ua pepehi ʻia hoʻi ʻo ʻAtalia. 18 ʻĀnai nā kānaka iā Baʻala, me kona mau kuahu. 20 Maluhia ko Ioasa aliʻi ʻana, a ʻoliʻoli nā kānaka.

MOKUNA XI.

¹ ¶ A ʻike akula ʻo ʻAtalia, ka makuahine o ʻAhazia, ua make kāna keiki, kū aʻela ia, a pepehi akula i ko ka hale aliʻi a pau.

² Akā ʻo Iehoseba, ke kaikamahine a Iehorama ke aliʻi, ke kaikuahine o ʻAhazia, lawe malū akula ʻo ia iā Ioasa, ke keiki a ʻAhazia, mai waena mai o nā keiki a ke aliʻi i pepehi ʻia; a hūnā lākou iā ia, iā ia a me kona kahu i loko o ke keʻena moe, mai ʻAtalia aku, ʻaʻole ia i make.

³ A noho hūnā ʻia ʻo ia me ia ma ka hale o Iēhova i nā makahiki ʻeono. A noho aliʻi ihola ʻo ʻAtalia ma luna o ka ʻāina.

⁴ ¶ A i ka hiku o ka makahiki, hoʻouna akula ʻo Iehoiada e kiʻi i nā luna haneri, a me nā kāpena, a me ka poʻe kiaʻi, a lawe mai iā lākou i ona lā i loko o ka hale o Iēhova, a hana ihola ia me lākou i kuʻikahi, a hoʻohiki akula iā lākou ma loko o ka hale o Iēhova, a hōʻike aku ʻo ia iā lākou i ke keiki a ke aliʻi.

⁵ Kauoha akula ʻo ia iā lākou, ʻī akula, “ʻO kēia kā ʻoukou e hana ai: ʻO ka hapakolu o ʻoukou, nā mea i hele i ka Sābati e lilo i poʻe kiaʻi e kiaʻi ai i ka hale o ke aliʻi.

⁶ “A he hapakolu ma ka ʻīpuka o Sura, a he hapakolu ma ka puka ma hope o ka poʻe kiaʻi; a e mālama ʻoukou i ke kiaʻi ʻana no ka hale, o wāwahi ʻia.

⁷ “A ʻelua poʻe o ʻoukou a pau i hele aku i ka lā Sābati, e mālama lākou i ke kiaʻi o ka hale o Iēhova no ke aliʻi.

⁸ “A e noho ʻoukou a puni i ke aliʻi, ʻo kēlā kanaka kēia kanaka me ka mea kaua ma kona lima; a ʻo ka mea e komo i waena o nā papa koa, e pepehi ʻia ʻo ia: a ʻo ʻoukou pū me ke aliʻi i kona hele ʻana i waho, a me kona komo ʻana i loko.”

⁹ ¶ A hana akula nā luna haneri, e like me nā mea a pau a Iehoiada ke kahuna i kauoha mai ai; a lawe akula kēlā mea kēia mea i kona poʻe kānaka e komo ana i loko i ka Sābati, me ka poʻe e hele ana i waho i ka Sābati, a hele mai lākou i o Iehoiada lā ke kahuna.

¹⁰ A hāʻawi akula ʻo Iehoiada ke kahuna na nā luna haneri i nā ihe a me nā pale kaua a Dāvida ke aliʻi, nā mea ma loko o ka hale o Iēhova.

¹¹ A kū aʻela ka poʻe kiaʻi, ʻo kēlā kanaka kēia kanaka me kāna mea kaua ma kona lima, a puni ke aliʻi, mai ka ʻaoʻao ʻākau o ka hale, a hiki i ka ʻaoʻao hema o ka hale, ma ke kuahu, a ma ka hale.

¹² A lawe maila ia i ke keiki a ke aliʻi i waho, a hāʻawi iā ia i ka pāpale aliʻi, a me ke Kānāwai; a hoʻoaliʻi iā ia, a poni iā ia; a paʻipaʻi lākou i nā lima, ʻī akula, “E ola ke aliʻi!”

¹³ ¶ A lohe ʻo ʻAtalia i ka leo o ka poʻe kiaʻi, a me nā kānaka, hele mai nō ia i nā kānaka i loko o ka hale o Iēhova.

¹⁴ A nānā akula ia, aia hoʻi, e kū ana ke aliʻi ma luna o ka ʻāwai, e like ka hana ʻana, a ʻo nā luna, a ʻo nā pupuhi me ke aliʻi; a ʻoliʻoli nā kānaka o ka ʻāina, a puhi i nā pū; a haehae ihola ʻo ʻAtalia i kona ʻaʻahu, a kāhea akula, “He kipi, he kipi!”

¹⁵ Kauoha akula ʻo Iehoiada ke kahuna i nā luna haneri, a me nā luna o ke kaua, a ʻī akula iā lākou, “E lawe aku iā ia nei mai loko aku o ka papa koa, a e pepehi aku i ka mea e hahai ana ma hope ona me ka pahi kaua.” No ka mea, ua ʻī mai ke kahuna, “Mai pepehi ʻia ʻo ia ma ka hale o Iēhova.”

¹⁶ A kau akula lākou i nā lima ma luna ona; a hele aku ia ma ke ala i hele ai nā lio i ka hale o ke aliʻi; a pepehi ʻia ʻo ia ma laila.

¹⁷ ¶ A hana akula ʻo Iehoiada i berita i waena o Iēhova a ʻo ke aliʻi a me nā kānaka, i lilo ai lākou i poʻe kānaka no Iēhova; a i waena o ke aliʻi hoʻi a me nā kānaka.

¹⁸ A komo aku nā kānaka a pau o ka ʻāina i loko o ka hale o Baʻala, a wāwahi ihola ia; a ʻulupā loa ihola lākou i kona mau kuahu, a me kona mau kiʻi, a pepehi ihola lākou iā Matana ke kahuna o Baʻala i mua o nā kuahu, a hoʻonoho ihola ke kahuna i poʻe kiaʻi ma luna o ka hale o Iēhova.

¹⁹ A lawe akula ia i nā luna haneri, a me nā kāpena, me ka poʻe kiaʻi, a me nā kānaka a pau o ka ʻāina, a lawe mai lākou i ke aliʻi mai ka hale o Iēhova mai, a hele mai lākou ma ke ala o ka ʻīpuka o ka poʻe kiaʻi i ka hale o ke aliʻi; a noho ihola ia ma luna o ka noho aliʻi o nā aliʻi.

²⁰ A ʻoliʻoli nā kānaka a pau o ka ʻāina, a ua maluhia ke kūlanakauhale; a pepehi ihola lākou iā ʻAtalia me ka pahi kaua ma ka hale o ke aliʻi.

²¹ ¶ ʻEhiku nā makahiki o Iehoasa i kona manawa i lilo ai ia i aliʻi.