KA BUKE ʻALUA NO NĀ ALIʻI 10 - Ka Baibala Hemolele

1 No ka luku ʻana i nā keiki a ʻAhaba, a me nā hoahānau, a me nā hoalauna ona a pau; a pepehi hoʻi ʻo Iehu i nā hoalauna o ʻAhazia, he kanahākumamālua. 15 A kaena nō ʻo Iehu iā ia iho no kona ikaika i ka Haku. 18 Pepehi aku nō ia i nā hoʻomana kiʻi. 32 Make ihola ia, a lilo ke aupuni iā Iehoahaza.

MOKUNA X.

¹ ¶ A he kanahiku nā keiki a ʻAhaba ma Samaria. A kākau ihola ʻo Iehu i nā palapala, hoʻouna aku i Samaria, na nā luna o Iezereʻela, na nā lunakahiko, a na nā kahu o nā keiki a ʻAhaba, i ka ʻī ʻana aʻe,

² “ʻĀnō, a hiki aku kēia palapala i o ʻoukou lā, no ka noho ʻana o nā keiki a ko ʻoukou haku me ʻoukou, a iā ʻoukou nā hale kaʻa a me nā lio, a me ke kūlanakauhale paʻa i ka pā pōhaku, a me nā mea kaua;

³ e ʻimi aku ʻoukou i ka mea maikaʻi a me ka mea pono o nā keiki a ko ʻoukou haku, a e hoʻonoho iā ia ma luna o ka noho aliʻi o kona makua kāne, a e kaua mai nō ko ka hale o ko ʻoukou haku.”

⁴ A makaʻu loa ihola lākou, ʻī aʻela, “Aia hoʻi, ʻaʻole i kū nā aliʻi ʻelua i mua ona; pehea lā kākou e kū ai?”

⁵ A ʻo ka luna o ko ka hale, a me ka luna o ke kūlanakauhale, ʻo nā lunakahiko, a me nā haku, hoʻouna akula lākou i o Iehu lā, ʻī akula, “He poʻe kauā mākou nāu, a e hana nō mākou i nā mea a pau āu e ʻōlelo mai ai; ʻaʻole e hoʻāliʻi ʻia kekahi; e hana ʻoe i ka mea pono i kou manaʻo.”

⁶ A laila palapala hou akula ʻo ia iā lākou, ʻī akula, “Inā noʻu ʻoukou, a e hoʻolohe hoʻi i koʻu leo, a laila, e lawe ʻoukou i nā poʻo o nā kānaka, ʻo nā keiki a ko ʻoukou haku, a e hele mai i oʻu nei i Iezereʻela ma kēia manawa i ka lā ʻapōpō.” (A ʻo nā keiki a ke aliʻi, he kanahiku lākou e noho ana me nā kānaka koʻikoʻi o ke kūlanakauhale, nāna lākou i hānai.)

⁷ A hiki aku ka palapala i o lākou lā, lawe lākou i nā keiki a ke aliʻi, a pepehi ihola i nā mea he kanahiku, a waiho lākou i nā poʻo ma loko o nā hīnaʻi, a hoʻouna aku i ona lā ma Iezereʻela.

⁸ A hele mai kekahi ʻelele a haʻi aku iā ia, ʻī akula, “Ua lawe mai lākou i nā poʻo o nā keiki a ke aliʻi.” ʻĪ maila ia, “E waiho iā lākou ma nā puʻu ʻelua, ma kahi i komo ai i ka ʻīpuka, a kakahiaka.”

⁹ A i kakahiaka, hele aku ia, a kū, ʻī akula i nā kānaka a pau, “Ua pono ʻoukou; aia hoʻi, ua kipi aku au i kuʻu haku, a pepehi aku iā ia; akā, ʻo wai lā kai pepehi i kēia mau mea a pau?

¹⁰ “E ʻike ana ʻoukou, ʻaʻole e hāʻule i ka honua kekahi o ka ʻōlelo a Iēhova i ʻōlelo mai ai no ko ka hale o ʻAhaba; no ka mea, ua hana mai ʻo Iēhova i ka mea āna i ʻōlelo mai ai ma o ʻElia lā kāna kauā.”

¹¹ A pepehi akula ʻo Iehu i nā mea a pau i koe no ko ka hale o ʻAhaba ma Iezereʻela, a me kona poʻe koʻikoʻi a pau, a me kona poʻe hoalauna, a me kāna poʻe kāhuna, ʻaʻole ia i hoʻokoe i kekahi nona.

¹² ¶ A kū aʻela ia, a hele akula a hiki i Samaria. Aia nō ia ma ka hale hoʻopaʻa o nā kahu hipa ma ke ala.

¹³ A loaʻa iā Iehu nā hoahānau o ʻAhazia ke aliʻi o kā Iuda, a nīnau akula, “ʻO wai ʻoukou?” ʻĪ maila lākou, “He mau hoahānau mākou no ʻAhazia, a e iho ana mākou e ʻike i nā keiki a ke aliʻi a me nā keiki a ke aliʻi wahine.”

¹⁴ ʻĪ akula, “E hoʻopaʻa ola aku iā lākou”; a hoʻopaʻa ola akula nā kānaka iā lākou, a luku akula iā lākou ma ka luawai o ka hale hoʻopaʻa, he kanahākumamālua nā kānaka; ʻaʻole ia i hoʻokoe i kekahi o lākou.

¹⁵ ¶ A hele ia mai laila aku a loaʻa iā ia ʻo Iehonadaba ke keiki a Rekaba e hālāwai me ia; a hoʻomaikaʻi aku ʻo Iehu iā ia, ʻī akula, “Ua pono anei kou naʻau, e like me koʻu naʻau me kou naʻau?” ʻĪ maila ʻo Iehonadaba, “ʻO ia nō.” “Inā pēlā, e hāʻawi mai ʻoe i kou lima.” A hāʻawi aku ia i kona lima, a hoʻēʻe akula iā ia ma ka hale kaʻa me ia.

¹⁶ ʻĪ akula ia, “E hele pū ʻoe me aʻu, a ʻike ʻoe i kuʻu ikaika no Iēhova.” A hoʻoholo lākou iā ia ma kona hale kaʻa.

¹⁷ A hiki akula ia i Samaria, pepehi akula ia i nā mea a pau i koe no ʻAhaba ma Samaria, a pau ia i ka luku ʻia, e like me ka ʻōlelo a Iēhova āna i ʻōlelo mai ai ma o ʻElia lā.

¹⁸ ¶ Hōʻuluʻulu aʻela ʻo Iehu i nā kānaka a pau, a ʻī akula iā lākou, “Mālama ʻuʻuku aku ʻo ʻAhaba iā Baʻala, e mālama nui auaneʻi ʻo Iehu iā ia.

¹⁹ “ʻĀnō hoʻi, e hoʻākoakoa mai ʻoukou i nā kāula a pau a Baʻala, a me kāna poʻe kauā a pau, a me kāna poʻe kāhuna a pau i oʻu nei, mai hoʻokoe ʻia kekahi; no ka mea, he mōhai nui kaʻu no Baʻala; ʻo kēlā mea kēia mea e koe ana, ʻaʻole ia e ola.” Akā, hana nō ʻo Iehu me ka hoʻopunipuni, i luku aku ai ia i ka poʻe mālama iā Baʻala.

²⁰ ʻĪ akula ʻo Iehu, “E hoʻolaʻa aku i ka hōʻuluʻulu ʻana no Baʻala.” A hoʻolaʻa akula lākou.

²¹ A hoʻouna akula ʻo Iehu i kā ʻIseraʻela a puni; a hele mai nā kauā a pau a Baʻala, ʻaʻole i koe aku kekahi i hele ʻole mai. A komo lākou i ka hale o Baʻala, a piha loa ka hale o Baʻala mai kēlā ʻaoʻao a i kēia ʻaoʻao.

²² ʻĪ akula ia i ka mea nāna i mālama ke keʻena lole, “E lawe mai i waho i ka lole no nā kauā a Baʻala.” A lawe mai nō ia i ka lole no lākou.

²³ Komo aku ʻo Iehu, a me Iehonadaba, ke keiki a Rekaba, i loko o ka hale o Baʻala, a ʻī akula i nā kauā a Baʻala, “E nānā ʻoukou a ʻike, i ʻole ma ʻaneʻi me ʻoukou kekahi o nā kauā a Iēhova, ʻo nā kauā a Baʻala wale nō.”

²⁴ A komo akula lākou e kaumaha aku i ka mōhai, a me nā mōhai kuni, a laila hoʻonoho ihola ʻo Iehu i nā kānaka, he kanawalu ma waho, ʻī akula, “ʻO ka mea nāna e hoʻopakele kekahi o nā kānaka aʻu i lawe mai nei i loko o ko ʻoukou lima, e lilo nō kona ola no ko ia lā ola.”

²⁵ ¶ A pau kāna kaumaha ʻana aku i ka mōhai kuni, ʻī akula ʻo Iehu i ka poʻe kiaʻi, a i nā luna, “E komo i loko, e luku iā lākou; mai puka i waho kekahi!” A luku akula ua poʻe lā iā lākou me ka maka o ka pahi kaua; a ʻo ka poʻe kiaʻi a me nā luna hoʻolei akula iā lākou, a hele akula i ke kūlanakauhale o Baʻala.

²⁶ A lawe mai lākou i nā kiʻi ma waho o ka hale o Baʻala, a puhi akula i ke ahi.

²⁷ A wāwahi lākou i ke kiʻi o Baʻala, a wāwahi hoʻi i ka hale o Baʻala, a hoʻolilo lākou ia mea i hale kiʻona a hiki i kēia lā.

²⁸ A luku akula ʻo Iehu iā Baʻala mai loko aku o kā ʻIseraʻela.

²⁹ ¶ Akā hoʻi, ʻo nā hewa o Ieroboama ke keiki a Nebata, nāna i hoʻolilo kā ʻIseraʻela i ka hewa, ʻaʻole i haʻalele ʻo Iehu i ka hahai ʻana ma muli o lākou, ʻo nā keiki bipi gula ma Betela a ma Dana.

³⁰ A ʻōlelo mai ʻo Iēhova iā Iehu, “No ka mea, ua maikaʻi ʻoe i ka hana ʻana i ka pono iaʻu, a ua hana aku ʻoe i ko ka hale o ʻAhaba, e like me ka mea a pau ma koʻu naʻau, e noho auaneʻi kāu poʻe keiki ma luna o ka noho aliʻi o kā ʻIseraʻela a hiki i ke kualua.”

³¹ Akā, ʻaʻole ʻo Iehu i mālama i ka hele ʻana ma ke kānāwai o Iēhova ke Akua o kā ʻIseraʻela me kona naʻau a pau: no ka mea, ʻaʻole ia i haʻalele i nā hewa o Ieroboama, nāna i hoʻolilo kā ʻIseraʻela i ka hewa.

³² ¶ I kēlā manawa i hoʻomaka ai ʻo Iēhova e paʻipaʻi i kā ʻIseraʻela: a luku maila ʻo Hazaʻela iā lākou ma nā mokuna a pau o kā ʻIseraʻela:

³³ mai Ioredane, mai ka hikina o ka lā, i ka ʻāina a pau o Gileada, i kā Gada, a me kā Reubena, a me kā Manase, mai ʻAroera ma ke kahawai ʻo ʻArenona, a hiki i Gileada a me Basana.

³⁴ A ʻo nā mea i koe a Iehu, a ʻo nā mea a pau āna i hana ai, a me kona ikaika a pau, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?

³⁵ A hiamoe ihola ʻo Iehu me kona poʻe mākua; a kanu lākou iā ia ma Samaria. A noho aliʻi ʻo Iehoahaza kāna keiki ma kona wahi.

³⁶ A ʻo ka manawa a Iehu i aliʻi ai ma luna o kā ʻIseraʻela ma Samaria, he iwakālua nā makahiki ia a me kumamāwalu.