KA BUKE ʻALUA NO NĀ ALIʻI 1 - Ka Baibala Hemolele

1 Kipi aʻela kā Moaba i kā ʻIseraʻela no ka maʻi o ʻAhazia; hoʻouna akula ia i nā ʻelele e nīnau i ke akua o ʻEkerona no kona maʻi. 10 No ka hana a ʻElia; a no ka make o ʻAhazia.

MOKUNA I.

¹ ¶ A laila kipi aʻela kā Moaba i kā ʻIseraʻela, ma hope o ka make ʻana o ʻAhaba.

² A hāʻule ihola ʻo ʻAhazia i lalo i kona papaholo, mai luna mai o ka pā hale ma Samaria, a maʻi ihola; a hoʻouna akula ia i nā ʻelele, a ʻī akula iā lākou, “E hele ʻoukou e nīnau aku iā Baʻala-Zebuba, ke akua o ʻEkerona, i koʻu ola ʻana i kēia maʻi.”

³ ʻŌlelo maila ka ʻānela o Iēhova iā ʻElia no Tiseba, “E kū, a hele aku e hālāwai me nā ʻelele o ke aliʻi o Samaria, a e ʻī aku iā lākou, ‘No ka nele anei o kā ʻIseraʻela i ke Akua, no laila hele ai ʻoukou e nīnau iā Baʻala-Zebuba, ke akua o ʻEkerona?’

⁴ “ʻĀnō hoʻi, ke ʻōlelo mai nei ʻo Iēhova pēnēia, ‘ʻAʻole ʻoe e iho i lalo, mai kahi moe mai āu i piʻi aku ai; akā, e make ʻiʻo nō ʻoe.’” A hoʻi akula ʻo ʻElia.

⁵ ¶ A i ka hoʻi ʻana aku o nā ʻelele, nīnau maila kēlā iā lākou, “No ke aha lā ʻoukou i hoʻi hou mai nei?”

⁶ ʻĪ akula lākou iā ia, “I hele mai kekahi kanaka e hālāwai me mākou, a ʻī maila iā mākou, ‘Ō uhaele, e hoʻi hou i ke aliʻi, nāna ʻoukou i hoʻouna mai nei, a e ʻōlelo aku iā ia, “Ke ʻōlelo mai nei ʻo Iēhova pēnēia, ‘No ka nele anei o kā ʻIseraʻela i ke Akua, no laila anei i hoʻouna aku ai ʻoe e nīnau iā Baʻala-Zebuba ke akua o ʻEkerona? No ia mea, ʻaʻole ʻoe e iho i lalo mai kahi moe mai āu i piʻi aku ai, akā, e make ʻiʻo nō ʻoe.’”’”

⁷ Nīnau maila ʻo ia iā lākou, “He aha lā ke ʻano o ke kanaka i piʻi mai ai e hālāwai me ʻoukou, a i haʻi mai hoʻi iā ʻoukou i kēia mau ʻōlelo?”

⁸ ʻĪ akula lākou iā ia, “He kanaka huluhulu, a ua kāʻei ʻia kona pūhaka i ke kāʻei ʻili.” ʻĪ maila ia, “ʻO ʻElia nō ia no Tiseba.”

⁹ ¶ A laila hoʻouna aku ke aliʻi i ona lā i luna kanalima me kona poʻe he kanalima; a piʻi akula ia i ona lā; aia hoʻi, e noho ana ia ma luna pono o kekahi puʻu; ʻī akula ʻo ia iā ia, “E ke kanaka o ke Akua, ua ʻī mai ke aliʻi, ‘E iho ʻoe i lalo!’”

¹⁰ ʻŌlelo maila ʻo ʻElia, ʻī maila i ka luna kanalima, “Inā he kanaka wau no ke Akua, e hāʻule mai ke ahi mai ka lani mai, a e hoʻopau iā ʻoe, a me kou poʻe he kanalima.” A laila hāʻule mai ke ahi mai ka lani mai, a hoʻopau ihola iā ia, a me kona poʻe he kanalima.

¹¹ Hoʻouna hou akula ia i ona lā i luna kanalima ʻē aʻe, me kona poʻe he kanalima; a ʻōlelo akula iā ia, ʻī akula, “E ke kanaka o ke Akua, ua ʻī mai ke aliʻi pēnēia, ‘E iho koke ʻoe i lalo!’”

¹² ʻŌlelo maila ʻo ʻElia, ʻī maila iā lākou, “Inā he kanaka wau no ke Akua, e hāʻule mai ke ahi mai ka lani mai, a e hoʻopau iā ʻoe, a me kou poʻe he kanalima.” A hāʻule mai ke ahi a ke Akua mai ka lani mai, a hoʻopau iā ia, a me kona poʻe he kanalima.

¹³ A hoʻouna hou akula ia i luna o ke kolu o ke kanalima me kona poʻe he kanalima; a piʻi akula ke kolu o ka luna kanalima, a hele aku a kukuli ihola i mua o ʻElia, a nonoi aku iā ia, ʻī akula iā ia, “E ke kanaka o ke Akua, ke nonoi aku nei au iā ʻoe, e mālama ʻia koʻu ola, a me ke ola o kēia kanalima, kāu poʻe kauā i mua o kou maka.

¹⁴ “Aia hoʻi, i hāʻule mai ke ahi mai ka lani mai, a hoʻopau ihola i nā luna kanalima ʻelua ma mua, a me ko lāua mau kanalima; ʻānō hoʻi, e mālama ʻia koʻu ola i mua ou maka.”

¹⁵ ʻŌlelo maila ka ʻānela o Iēhova iā ʻElia, “E iho ʻoe i lalo me ia; mai makaʻu iā ia.” Kū aʻela ia, a iho pū ihola me ia i ke aliʻi.

¹⁶ ʻĪ akula ʻo ia iā ia, “Ke ʻōlelo mai nei ʻo Iēhova pēnēia, ‘No kou hoʻouna ʻana aku i nā ʻelele e nīnau iā Baʻala-Zebuba ke akua o ʻEkerona, no ka nele anei o kā ʻIseraʻela i ke Akua e nīnau ai ma kāna ʻōlelo? No ia mea, ʻaʻole ʻoe e iho i lalo mai kahi moe āu i piʻi aku ai, akā, e make ʻiʻo nō ʻoe.’”

¹⁷ ¶ A make ihola nō ia, e like me kā Iēhova ʻōlelo a ʻElia i ʻōlelo ai; a noho aliʻi ihola ʻo Iehorama ma kona hakahaka, i ka lua o ka makahiki o Iehorama ke keiki a Iehosapata ke aliʻi o kā Iuda; no ka mea, ʻaʻohe āna keiki.

¹⁸ A ʻo nā mea i koe a ʻAhazia āna i hana ai, ʻaʻole anei i kākau ʻia lākou i loko o ka buke ʻoihana aliʻi a nā aliʻi o kā ʻIseraʻela?