ʻO KA ʻEPISETOLE LUA A IOANE 1 - Ka Baibala Hemolele

1 He ʻōlelo hoʻoikaika i ka wahine aloha.

MOKUNA I.

¹ ¶ Na ka lunakahiko i ka wahine aloha a me kāna mau keiki i aloha ʻia e aʻu ma ka ʻoiaʻiʻo; ʻaʻole e aʻu wale nō; akā, e ka poʻe a pau i ʻike i ka ʻoiaʻiʻo;

² no ka ʻoiaʻiʻo e noho ana i loko o kākou, a e mau loa aku nō hoʻi i loko o kākou:

³ E aloha ʻia mai ʻoukou, a e lokomaikaʻi ʻia mai, a e maluhia hoʻi e ke Akua ka Makua, a me ka Haku ʻo Iesū Kristo ke Keiki a ka Makua, ma ka ʻoiaʻiʻo a me ke aloha.

⁴ ¶ Ua hauʻoli nui aku au i koʻu ʻike ʻana i kekahi o kāu poʻe keiki e hele ana ma ka ʻoiaʻiʻo, e like me ke kauoha i loaʻa iā kākou, mai ka Makua mai.

⁵ ʻĀnō lā ke nonoi aku nei au iā ʻoe, e ka wahine, ʻaʻole me ka palapala ʻana aku iā ʻoe i ke kānāwai hou; akā, ʻo ka mea i loaʻa mai iā mākou mai kinohi mai, i aloha kākou i kekahi i kekahi.

⁶ Eia nō ke aloha, i hele kākou ma kāna mau kauoha. Eia nō ke kauoha, e like me ko ʻoukou lohe ʻana, mai kinohi mai, i hele ʻoukou ma laila.

⁷ No ka mea, ua komo mai i ke ao nei ka poʻe wahaheʻe he nui wale, ʻaʻole lākou i hōʻoiaʻiʻo i ko Iesū Kristo hiki ʻana mai ma ke kino; ʻo ia nō ka wahaheʻe a me ke ʻanikristo.

⁸ E mālama pono iā ʻoukou iho, i lilo ʻole kā mākou mea i hana ai; akā, i loaʻa hoʻi iā mākou ka uku a pau.

⁹ ʻO ka mea i hana hewa, ʻaʻole hoʻi i noho ma ka ʻōlelo a ka Mesia, ʻaʻole no ke Akua ia; ʻo ka mea e noho ana ma ka ʻōlelo a ka Mesia, nona nō ka Makua a me ke Keiki.

¹⁰ Inā e hele mai kekahi i o ʻoukou lā, ʻaʻole i halihali mai i ua ʻōlelo lā, mai hoʻokipa ʻoukou iā ia i loko o ka hale, ʻaʻole hoʻi e ʻī aku iā ia, aloha.

¹¹ No ka mea, ʻo ka mea e ʻī aʻe iā ia, aloha; he hoa lawehana ia ma kāna hana ʻino ʻana.

¹² ¶ Nui nō kaʻu mea e palapala aku ai iā ʻoukou, ʻaʻole au i makemake ma ka pepa a me ka ʻīnika; no ka mea, he manaʻolana koʻu e hele aku i o ʻoukou lā, e kamaʻilio pū, he waha nō he waha, i nui ai ko kākou ʻoliʻoli ʻana.

¹³ Ke uē aku nei iā ʻoe nā keiki a kou hoahānau wahine aloha. ʻĀmene.