ʻO KA ʻEPISETOLE LUA A PAULO KA LUNAʻŌLELO I KO KORINETO 6 - Ka Baibala Hemolele

1 Hōʻike aku ʻo Paulo mā i ko lākou pono ma ke aloha; e noho kaʻawale ka poʻe haipule.

MOKUNA VI.

¹ ¶ A ʻo mākou nā hoa hana, ke noi aku nei hoʻi mākou, mai lawe makehewa ʻoukou i ka lokomaikaʻi o ke Akua.

² (No ka mea, ke ʻī maila ʻo ia, “«Ua hoʻolohe akula au iā ʻoe i ka manawa i maliu ʻia ai, A ua kōkua akula au iā ʻoe i ka lā e ola ai». Aia hoʻi, ʻānō «ka manawa e maliu ʻia mai ai»; Aia hoʻi, ʻānō «ka lā e ola ai».”)

³ ʻAʻole nō mākou e hoʻohihia aku i kekahi, o ʻōlelo ʻino ʻia mai ka ʻoihana kahuna.

⁴ Akā, ma nā mea a pau e hōʻike ana iā mākou iho i poʻe kāhuna no ke Akua, ma ka hoʻomanawanui, ma ka hōʻino ʻia mai, ma ka pōʻino, ma ka pilikia,

⁵ ma ka hahau ʻia, ma ka paʻa ʻana i nā hale paʻahao, ma ka haunaele, ma ka hoʻoluhi ʻana, ma ke kiaʻi ʻana, ma ka hoʻopōloli ʻana,

⁶ ma ka maʻemaʻe, ma ka ʻike, ma ke ahonui, ma ka lokomaikaʻi, ma ka ʻUhane Hemolele, ma ke aloha hoʻokamani ʻole,

⁷ ma ka ʻōlelo ʻoiaʻiʻo, ma ka mana o ke Akua, ma ke kāhiko o ka pono ma ka ʻākau a me ka hema,

⁸ ma ka mahalo ʻia mai a me ka mahalo ʻole ʻia mai, ma ka ʻōlelo ʻino ʻia mai, a me ka ʻōlelo maikaʻi ʻia mai; e like me nā mea hoʻopunipuni; akā, he ʻoiaʻiʻo naʻe;

⁹ like me nā mea ʻike ʻole ʻia, a ua kaulana naʻe; like me ka poʻe e make ana, aia hoʻi, ke ola nei mākou; like me nā mea i hahau ʻia, ʻaʻole naʻe i make;

¹⁰ like me nā mea kaumaha; akā, e ʻoliʻoli mau ana; like me nā mea ʻilihune, a ua waiwai naʻe nā mea he nui iā mākou; like me nā mea nele loa, a ua loaʻa nō naʻe nā mea a pau.

¹¹ ¶ E ko Korineto, ua hāmama aʻe nei ko mākou waha iā ʻoukou, ua hoʻoākea ʻia ko mākou naʻau.

¹² ʻAʻole o ʻoukou pilikia i loko o mākou; akā, ua pilikia ʻoukou i loko o ko ʻoukou naʻau iho.

¹³ I hoʻouku ʻia mai au ma ka mea like, (ke ʻōlelo aku nei au iā ʻoukou me he mau keiki lā,) e hoʻoākea ʻia hoʻi ʻoukou.

¹⁴ ¶ Mai hoʻopili ʻano ʻē ʻia ʻoukou me nā hoʻomaloka; no ka mea, he aha ke kuʻikahi ʻana o ka pono me ka hewa? Pehea lā hoʻi e kohu like ai ka mālamalama me ka pouli?

¹⁵ He aha hoʻi ka manaʻo hoʻokahi ʻana o Kristo me Beliala? He aha hoʻi ke kuleana o ka mea manaʻoʻiʻo me ka mea hoʻomaloka?

¹⁶ Pehea hoʻi e kū like ai ka luakini o ke Akua me ko nā kiʻi? No ka mea, ʻo ʻoukou ka luakini o ke Akua ola; e like me kā ke Akua i ʻōlelo mai ai, “«E noho pū auaneʻi au me lākou, a e hele pū hoʻi; ʻO wau auaneʻi ko lākou Akua, a ʻo lākou hoʻi auaneʻi koʻu poʻe kānaka».”

¹⁷ No laila, ke ʻī maila ka Haku, “«E puka mai ʻoukou mai waena mai o lākou, i kaʻawale ʻoukou; Mai hoʻopā aku hoʻi i ka mea haumia», a e hoʻokipa mai au iā ʻoukou.

¹⁸ “A e lilo nō au i Makua no ʻoukou, A e lilo mai hoʻi ʻoukou i poʻe keiki kāne a i poʻe kaikamāhine naʻu,” Wahi a ka Haku Mana.