ʻO KA ʻEPISETOLE LUA A PAULO KA LUNAʻŌLELO I KO KORINETO 5 - Ka Baibala Hemolele

1 No ka ikaika o Paulo mā e mālama i ka pono o ke Akua i ka wā e noho nei; a me ka hoʻolauleʻa aku iā haʻi ma ka ʻeuanelio.

MOKUNA V.

¹ ¶ No ka mea, ua ʻike mākou, inā i wāwahi ʻia ko mākou hale kino lepo, ʻo ka halelewa, e loaʻa auaneʻi iā mākou ka hale na ke Akua, he hale hana ʻole ʻia e nā lima, ua mau loa i loko o ka lani.

² No ka mea, ke kenakena nei nō mākou i loko o kēia, me ka makemake nui e hoʻokomo ʻia aku i loko o ko mākou hale i ka lani.

³ Inā paha i hoʻokomo ʻia mākou, ʻaʻole mākou e ʻike ʻia mai he hune.

⁴ A ke kenakena nei mākou me ke kaumaha e noho ana i loko o ua halelewa nei; ʻaʻole na ka makemake e hele ma waho; akā, e hoʻokomo ʻia ma loko, i ale ʻia ka make e ke ola.

⁵ ʻO ka mea nāna mākou e hoʻoikaika mai i kēia mea, ʻo ke Akua ia, ʻo ia hoʻi kai hāʻawi mai iā mākou i ka makana mua o ka ʻUhane.

⁶ No ia hoʻi, he ikaika mau ko mākou, no ka ʻike iho, i ko mākou noho ʻana ma ke kino, ua mamao mākou i ka Haku.

⁷ No ka mea, ke hele nei mākou ma ka manaʻoʻiʻo, ʻaʻole ma ka ʻike maka ʻana.

⁸ Ua ikaika nō mākou, a ke ake nei nō hoʻi e noho mamao mākou i ke kino, a e noho pū me ka Haku.

⁹ No laila, ke hoʻoikaika nei mākou i ʻoluʻolu mai ai ʻo ia iā mākou, ke noho pū mākou a ke noho mamao hoʻi.

¹⁰ No ka mea, e hōʻike ʻia auaneʻi kākou a pau i mua o ka noho hoʻokolokolo o Kristo; i loaʻa i kēlā mea i kēia mea nā mea i loko o ke kino, e like me ka mea āna i hana ai, inā paha he maikaʻi, inā paha he hewa.

¹¹ ¶ No ia hoʻi, i ko mākou ʻike ʻana i ka mea makaʻu a ka Haku, ke hoʻohuli aku nei mākou i nā kānaka; a ua ʻike pono ʻia mai mākou e ke Akua; a ke manaʻo nei nō hoʻi au, ua ʻike pono ʻia mai mākou e ko ʻoukou lunamanaʻo.

¹² ʻAʻole nō mākou e hoʻomaikaʻi hou aku iā mākou iho iā ʻoukou; akā, ke hāʻawi aku nei mākou i ka mea e kaena ai ʻoukou no mākou iho, i loaʻa iā ʻoukou ka mea e haʻi aku ai i ka poʻe kaena i ko waho, ʻaʻole naʻe i ko ka naʻau.

¹³ Inā ua ʻoi aku ko mākou manaʻo ikaika, no ke Akua nō ia; inā ua haʻahaʻa iho ko mākou manaʻo, no ʻoukou hoʻi ia.

¹⁴ Ke koi ikaika mai nei ke aloha o Kristo iā mākou; no ka mea, ua akāka i ko mākou manaʻo, inā i make kekahi no nā mea a pau, inā ua make nā mea a pau.

¹⁵ A make nō ia no nā mea a pau, i ʻole e noho hou ai ka poʻe e ola ana no lākou iho; akā, no ka mea i make a i ala hou mai no lākou.

¹⁶ No laila, ʻaʻole mākou e ʻike hou aku i kekahi ma ke kino; inā paha ua ʻike mākou iā Kristo ma ke kino, ʻaʻole mākou e ʻike hou aku iā ia ma laila.

¹⁷ No ia mea, inā i loko o Kristo kekahi kanaka, he mea hou ʻo ia; ua hala akula nā mea kahiko; aia hoʻi, ua ʻano hou aʻela nā mea a pau.

¹⁸ Na ke Akua mai nō nā mea a pau, nāna mākou i hoʻolauleʻa mai nona iho ma o Iesū Kristo lā, a hāʻawi mai hoʻi na mākou i ka ʻoihana e hoʻolauleʻa aku ai.

¹⁹ Pēnēia, ke hoʻolauleʻa nei ke Akua i ko ke ao nei nona iho ma o Kristo lā, ʻaʻole nō e hoʻopili ana i ko lākou hewa iā lākou; a ua waiho maila hoʻi iā mākou i ka ʻōlelo e hoʻolauleʻa aku ai.

²⁰ ¶ No ia hoʻi, he mau ʻelele mākou no Kristo, ua like hoʻi ke Akua me ka mea nonoi aku ma o mākou nei, ke noi aku nei mākou no Kristo, i hoʻolauleʻa ʻia mai ʻoukou i ke Akua.

²¹ No ka mea, ua hoʻolilo maila ʻo ia iā ia, ka mea hala ʻole, i mōhai hala no kākou, i lilo ai kākou i poʻe pono i ke Akua ma ona lā.