ʻO KA ʻEPISETOLE LUA A PAULO KA LUNAʻŌLELO I KO KORINETO 4 - Ka Baibala Hemolele

1 Ua pōmaikaʻi nā haipule i loko o nā hōʻino ʻia; no ka nani e hiki mai ana ma hope.

MOKUNA IV.

¹ ¶ No ia hoʻi, no ka loaʻa ʻana mai o kēia ʻoihana iā mākou ma ka lokomaikaʻi ʻia mai, ʻaʻole o mākou manakā.

² Akā, ua kipaku aku mākou i nā mea huna e hilahila ai, ʻaʻole mākou i hele me ka maʻalea, ʻaʻole hoʻi i hana i ka ʻōlelo a ke Akua me ka hoʻopunipuni; akā, ma ka hoʻākāka ʻana aku i ka ʻoiaʻiʻo, ke hōʻike nei mākou iā mākou iho i nā naʻau a pau o kānaka, he pono i mua o ke Akua.

³ A i uhi ʻia kā mākou ʻeuanelio, ua uhi ʻia ʻo ia no ka poʻe e lilo ana i ka make.

⁴ Ma o lākou lā, ua hoʻomakapō mai ko kēia ao akua i nā naʻau o ka poʻe hoʻomaloka, o akāka mai auaneʻi iā lākou ka mālamalama o ka ʻeuanelio nani a Kristo; ʻo ia ko ke Akua mea like.

⁵ No ka mea, ʻaʻole mākou e haʻi aku iā mākou iho; akā, iā Kristo Iesū i ka Haku; a iā mākou iho he mau kauā na ʻoukou no Iesū.

⁶ No ka mea, ʻo ke Akua nāna i kēnā, “Ka mālamalama e pohā mai no loko mai o ka pouli,” ʻo ia kai hoʻomālamalama mai i loko o ko mākou naʻau, i mālamalama i ʻikea ka nani o ke Akua ma ka maka o Iesū Kristo.

⁷ ¶ Iā mākou nō kēia waiwai i loko o nā ipu lepo, i ʻikea ka mana nui, no ke Akua ia, ʻaʻole no mākou.

⁸ Ua hoʻokē ʻia mai mākou a puni, ʻaʻole naʻe i pilikia; ua lauwili ʻia mai mākou, ʻaʻole hoʻi i pilihua.

⁹ Ua hoʻomaʻau ʻia mai mākou, ʻaʻole naʻe i haʻalele ʻia; ua kulaʻina mai mākou, ʻaʻole hoʻi i make.

¹⁰ E lawe mau ana mākou ma ke kino i ka make ʻana o ka Haku ʻo Iesū, i hōʻike ʻia hoʻi ke ola ʻana o Iesū ma ko mākou kino.

¹¹ No ka mea, ʻo mākou ka poʻe e ola nei, ua hāʻawi mau ʻia aku mākou e make no Iesū, i hōʻike ʻia hoʻi ke ola ʻana o Iesū ma ko mākou kino make.

¹² No laila, ke hoʻoikaika nei ka make i loko o mākou, a ʻo ke ola i loko o ʻoukou.

¹³ No ka ikaika like o ko mākou manaʻoʻiʻo, me ka mea i palapala ʻia. “«Ua manaʻoʻiʻo ihola au, no laila au i ʻōlelo aku ai»;” ke manaʻoʻiʻo nei nō hoʻi mākou, no laila mākou e ʻōlelo aku nei;

¹⁴ ke ʻike nei mākou, ʻo ka Mea nāna i hoʻāla mai ka Haku ʻo Iesū, e hoʻāla mai nō hoʻi ʻo ia iā mākou ma o Iesū lā, a e hōʻike pū aʻe iā mākou me ʻoukou.

¹⁵ No ka mea, no ʻoukou ia mau mea a pau, i hoʻonui aʻe ka lokomaikaʻi nui i ka nani o ke Akua, ma ka hoʻomaikaʻi ʻana aku o nā mea he nui.

¹⁶ ¶ No ia mea, ʻaʻole o mākou manakā; akā, inā paha ua nāwaliwali iho ko mākou kino ma waho, ua hoʻoikaika mau ʻia nō naʻe ko loko, i kēlā lā i kēia lā.

¹⁷ No ka mea, ʻo ko mākou hōʻino ʻuʻuku pōkole wale ʻia nō, ke hana mai nei nō ia i ka nani nui mau loa no mākou;

¹⁸ i ko mākou manaʻo ʻole ʻana i nā mea i ʻike maka ʻia, i nā mea nō i ʻike maka ʻole ʻia; no ka mea, he pōkole nā mea i ʻike maka ʻia; akā, he mau loa nā mea i ʻike maka ʻole ʻia.