ʻO KA ʻEPISETOLE LUA A PAULO KA LUNAʻŌLELO I KO KORINETO 3 - Ka Baibala Hemolele

1 Ua ʻoi aku ka nani o ka ʻeuanelio a Kristo i mua o ke Kānāwai o Mose.

MOKUNA III.

¹ ¶ E hoʻomaka hou anei mākou e hoʻomaikaʻi aku iā mākou iho? A e hemahema anei mākou e like me kekahi poʻe i nā palapala hōʻike iā ʻoukou, a i nā palapala hōʻike mai o ʻoukou mai?

² ʻO ʻoukou nō kā mākou palapala i kākau ʻia, ma loko o ko mākou naʻau, i ʻike ʻia a i heluhelu ʻia e nā kānaka a pau.

³ No ka mea, ua hōʻike akāka ʻia, ʻo ʻoukou nō kā Kristo palapala a mākou i hana ai, i kākau ʻia ʻaʻole me ka ʻīnika; akā, me ka ʻUhane o ke Akua ola; ʻaʻole ma loko o nā papa pōhaku; akā, ma loko o nā papa ʻiʻo o ka naʻau.

⁴ Pēlā ko mākou manaʻo maopopo i ke Akua ma o Kristo lā.

⁵ ʻAʻole hoʻi e hiki iā mākou kekahi mea ma ko mākou noʻonoʻo ʻana, ʻo mākou wale; akā, ʻo ke Akua nō ko mākou mea e hiki ai.

⁶ ʻO ia kai hoʻomākaukau iā mākou i kāhuna no ke kauoha hou, ʻaʻole ma ke kānāwai; akā, ma ka ʻUhane; no ka mea, ke pepehi mai nei ke kānāwai, a ke hoʻōla mai nei ka ʻUhane.

⁷ Inā paha ua nani ka ʻoihana no ka make i kākau ʻia ma loko o nā pōhaku me nā hua ʻōlelo, i hiki ʻole i nā mamo a ʻIseraʻela ke haka pono aku i ka maka o Mose, no ke ʻalohi o kona maka, ka mea e nalowale ana;

⁸ ʻaʻole anei e ʻoi nui aku ka nani o ka ʻoihana o ka ʻUhane?

⁹ No ka mea, inā paha he nani ko ka ʻoihana hoʻohewa, he ʻoiaʻiʻo nō, ua pākela aku ka nani o ka ʻoihana hoʻāpono.

¹⁰ No kēia mea, ʻaʻohe nani o kēlā mea i hoʻonani ʻia pēlā, no kēia pākela nani.

¹¹ Inā he nani ko kēlā mea i hoʻonalowale ʻia; ʻoiaʻiʻo, he nani ko ka mea e mau loa aku ana.

¹² ¶ No ia hoʻi, no ka loaʻa ʻana mai iā mākou kēia manaʻolana, he ʻōlelo wiwo ʻole kā mākou;

¹³ ʻaʻole like me Mose i uhi iho ai i kona maka i ka pale, i hiki ʻole i nā mamo a ʻIseraʻela ke nānā pono i ka hope o ua mea lā e nalowale ana.

¹⁴ Akā, ua hoʻopouli ʻia ko lākou naʻau; no ka mea, a hiki i nēia manawa, i ka heluhelu ʻana i ke kauoha kahiko, ua koe nō ka pale, ʻaʻole i wehe ʻia; ua pau nō hoʻi ia mea iā Kristo.

¹⁵ A i nēia manawa, i ka heluhelu ʻana i kā Mose, e kau ana nō nā pale lā ma luna o ko lākou naʻau.

¹⁶ Aia huli mai ia i ka Haku, a laila e lawe ʻia aku nō ua pale lā.

¹⁷ A ʻo ka Haku, ʻo ia ka ʻUhane; a ma kahi e noho ai ka ʻUhane o ka Haku, ua noa ia wahi.

¹⁸ Akā, me ka maka i uhi ʻole ʻia, ke ʻike aku nei mākou a pau i ka nani o ka Haku, e like me ke aka ma ke aniani, a ua hōʻano hou ʻia mākou ma ka like ʻana o ua aka lā, ma ka nani e māhuahua ana, e ko ka Haku nona ka ʻUhane.