ʻO KA ʻEPISETOLE LUA A PAULO KA LUNAʻŌLELO I KO KORINETO 2 - Ka Baibala Hemolele

1 Kauoha akula ʻo Paulo, e kala aku i ka hewa o ka hoahānau lawehala i mihi.

MOKUNA II.

¹ ¶ Akā, ʻo kēia kaʻu i manaʻo ai, ʻaʻole e hele hou aku i o ʻoukou lā me ka ʻeha o ka naʻau.

² A inā e hana ʻeha aku au i ko ʻoukou naʻau, ʻo wai lā auaneʻi e hōʻoluʻolu mai iaʻu; ʻaʻole anei ʻo ia wale nō, ʻo ka mea i ʻeha iaʻu?

³ No laila, ua palapala aku au iā ʻoukou i ua mea lā, o ʻehaʻeha auaneʻi au i ka poʻe e pono ke hoʻohauʻoli mai iaʻu i kuʻu hele ʻana aku; ua manaʻo leʻa hoʻi au iā ʻoukou a pau, ʻo koʻu ʻoliʻoli ʻana, ʻo kā ʻoukou hoʻi ia a pau.

⁴ No ka mea, me ke kaumaha nui, a me ka ʻeha o ka naʻau, ua palapala aku nō au iā ʻoukou me nā waimaka he nui; ʻaʻole no ka hōʻeha aku i ko ʻoukou naʻau; akā, i ʻike ʻoukou i ka nui o koʻu aloha iā ʻoukou.

⁵ ¶ A i hoʻoʻeha mai kekahi, ma ka hapa wale nō ka hoʻoʻeha ʻana mai iaʻu; i hoʻoili ʻole aku ai au i ka hewa i luna iho o ʻoukou a pau.

⁶ Ua nui kēia hoʻopaʻi ʻana no ua mea lā, i hoʻouku ʻia aku e ka nui o ʻoukou.

⁷ No ia mea, he pono nō ke kala aʻe ʻoukou iā ia, me ka hōʻoluʻolu aku, malia paha o nāwaliwali loa auaneʻi ua mea lā i ke kaumaha nui.

⁸ No laila, ke nonoi aku nei au iā ʻoukou, e hoʻomaopopo aku i ke aloha iā ia.

⁹ No kēia mea hoʻi, ua palapala aku au, i ʻike maopopo ai au iā ʻoukou, inā paha ʻoukou e hoʻolohe mai i nā mea a pau.

¹⁰ A i kala aku ʻoukou i ka mea o kekahi, ʻo wau hoʻi kekahi e kala aku; no ia hoʻi, inā paha au i kala aku i kekahi mea, no ʻoukou i kala aku ai au ia mea iā ia, ma Kristo;

¹¹ i puni ʻole kākou iā Sātana; no ka mea, ua ʻike kākou i nā manaʻo ona.

¹² ¶ A i kuʻu hele ʻana i Teroa no ka ʻeuanelio a Kristo, a ua wehe ʻia aʻela ka puka iaʻu e ka Haku,

¹³ ʻaʻole oʻu maha ma kuʻu naʻau, i ka loaʻa ʻole iaʻu ʻo Tito ʻo koʻu hoahānau; akā, uē akula au iā lākou, a hele akula i Makedonia.

¹⁴ ¶ E hoʻomaikaʻi ʻia aku ke Akua nāna mākou e hoʻolanakila mau mai i loko o Kristo, me ka hoʻolaha aku i ke ʻala o kona naʻauao i nā wahi a pau, ma o mākou nei.

¹⁵ No ka mea, he mea ʻala mākou no Kristo i ke Akua, no ka poʻe ola a me ka poʻe make.

¹⁶ No kēia poʻe, he mea ʻala make mākou e make ai; no kēlā poʻe hoʻi, he mea ʻala ola e ola ai; ʻo wai lā hoʻi ka mea e pono iā ia kēia mau mea?

¹⁷ No ka mea, ʻaʻole mākou e ʻānoninoni i ka ʻōlelo a ke Akua, e like me kekahi poʻe nui; akā, ke ʻōlelo nei mākou i kā Kristo me ka manaʻo pono, ʻoiaʻiʻo, no ke Akua mai, i mua hoʻi o ke Akua.