ʻO KA ʻEPISETOLE LUA A PAULO KA LUNAʻŌLELO I KO KORINETO 13 - Ka Baibala Hemolele

1 Hoʻoweliweli aku Paulo i ka poʻe hana hewa ma Korineto. Hoʻomaikaʻi nō ia i nā hoahānau.

MOKUNA XIII.

¹ ¶ Eia ke kolu o kuʻu hele ʻana aku i o ʻoukou lā; «ma ka waha o nā mea ʻike ʻelua, a ʻekolu paha e hoʻokūpaʻa ʻia ai nā mea a pau».

² Ua haʻi ʻē aku au ma mua, ke haʻi ʻē aku nei hoʻi au, e like me aʻu e noho hou ana me ʻoukou; akā, ma kahi ʻē ke palapala aku nei au i ka poʻe i hana hewa ma mua, a me nā mea ʻē aʻe a pau, a hiki hou aku au, ʻaʻole au e minamina iā lākou.

³ No ka mea, ke ʻimi nei ʻoukou i ka mea e akāka ai kā Kristo ʻōlelo ʻana mai ma oʻu nei, ʻaʻole ona nāwaliwali ma o ʻoukou lā; akā, he ikaika kona i waena o ʻoukou.

⁴ No ka mea, inā paha i kaulia ai ʻo ia ma ke keʻa no ka nāwaliwali, e ola ana nō hoʻi ia ma ka mana o ke Akua; ua nāwaliwali nō hoʻi mākou i loko ona; akā, e ola ana nō hoʻi mākou me ia ma ka mana o ke Akua i waena o ʻoukou.

⁵ E hoʻāʻo ʻoukou iā ʻoukou iho, aia ma ka manaʻoʻiʻo paha ʻoukou; e huli ʻoukou iā ʻoukou iho i pono; ʻaʻole anei ʻoukou i ʻike iā ʻoukou iho, aia nō Iesū Kristo i loko o ʻoukou, ke ʻāhewa ʻole iā ʻoukou?

⁶ Akā, ke manaʻo nei au, e ʻike auaneʻi ʻoukou, ʻaʻole mākou e ʻāhewa ʻia.

⁷ A ke pule aku nei au i ke Akua i ʻole ʻoukou e hana hewa iki; ʻaʻole no ka ʻike ʻia ʻo ko mākou pono; akā, e hana aku ʻoukou i ka mea maikaʻi, ke manaʻo ʻia mai mākou he pono ʻole.

⁸ No ka mea, ʻaʻole e pono iā mākou ke hana i kekahi mea kūʻē i ka ʻoiaʻiʻo; akā, i ka mea kūpono i ka ʻoiaʻiʻo.

⁹ Ke hauʻoli nei mākou i ko mākou nāwaliwali, a i ko ʻoukou ikaika; eia hoʻi kā mākou e pule aku nei, i hemolele ʻoukou.

¹⁰ No ia hoʻi, ke palapala aku nei au ia mau mea ma kahi ʻē, o hoʻowalania aku au ke hiki aku i o ʻoukou lā, e like me ka mana a ka Haku i hāʻawi mai ai noʻu, no ka hoʻokūpaʻa, ʻaʻole no ka luku aku.

¹¹ ¶ Eia ke oki, e nā hoahānau, aloha ʻoukou; i hemolele ʻoukou, i ʻoluʻolu hoʻi, i hoʻokahi ko ʻoukou manaʻo, e noho ʻoukou me ke kuʻikahi; a ʻo ke Akua nona ke aloha a me ke kuʻikahi e noho pū me ʻoukou.

¹² E uē aku kekahi i kekahi, i ka honi hoʻāno.

¹³ Ke uē aku nei nā haipule a pau iā ʻoukou.

¹⁴ ¶ I mau aku ka lokomaikaʻi o ka Haku ʻo Iesū Kristo, me ke aloha o ke Akua, a me ka launa pū ʻana o ka ʻUhane Hemolele me ʻoukou a pau. ʻĀmene.