KA BUKE ʻALUA O KA ʻOIHANA ALIʻI 8 - Ka Baibala Hemolele

1 No nā hale a Solomona i kūkulu ai. 7 No kona hoʻolilo ʻana i kekahi poʻe i poʻe hoʻokupu. 11 No ke kaikamahine a Paraʻo. 12 No nā mōhai.

MOKUNA VIII.

¹ ¶ A pau nā makahiki he iwakālua, ka wā a Solomona i kūkulu ai ka hale o Iēhova, a me kona hale iho,

² a laila, ʻo nā kūlanakauhale a Hurama i hāʻawi mai ai iā Solomona, kūkulu ihola ʻo Solomona iā lākou, a hoʻonoho ma laila i kā ʻIseraʻela.

³ Hele akula ʻo Solomona i Hamata Zoba, a lanakila ma luna ona.

⁴ Kūkulu ihola ʻo ia iā Tademora ma ka wao nahele, a me nā kūlanakauhale papaʻa āna i kūkulu ai ma Hamata.

⁵ Kūkulu hoʻi ʻo ia iā Bete Horana Luna, a me Bete Horana Lalo, nā kūlanakauhale paʻa i ka pā, a me nā puka a me nā kaola;

⁶ a me Baʻalata a me nā kūlanakauhale papaʻa o Solomona, a me nā kūlanakauhale no nā kaʻa, a me nā kūlanakauhale no ka poʻe holoholo lio, a me nā mea a pau a Solomona i makemake ai e kūkulu ma Ierusalema, a ma Lebanona, a ma ka ʻāina a pau o kona aupuni.

⁷ ¶ A ʻo nā kānaka i koe no kā Heta, a me kā ʻAmora, a me kā Pereza, a me kā Heva, a me kā Iebusa, ʻaʻole no ka poʻe mamo a ʻIseraʻela,

⁸ ʻo nā mamo o ka poʻe i koe ma ka ʻāina, ka poʻe i pau ʻole i kā ʻIseraʻela, hoʻolilo ʻo Solomona iā lākou i poʻe hoʻokupu nāna, a hiki i kēia lā.

⁹ Akā, ʻo ka poʻe mamo a ʻIseraʻela, ʻaʻole i hoʻolilo ʻo Solomona i kekahi poʻe o lākou i poʻe kauā no kāna hana; no ka mea, he poʻe kānaka kaua lākou, he poʻe luna koa, a he poʻe luna o nā hale kaʻa a me nā holoholo lio.

¹⁰ Eia ka poʻe koʻikoʻi o nā luna a ke aliʻi a Solomona; ʻelua haneri a me kanalima, ka poʻe i hoʻonoho ʻia ma luna o nā kānaka.

¹¹ ¶ A alakaʻi ʻo Solomona i ke kaikamahine a Paraʻo mai ke kūlanakauhale o Dāvida mai a i ka hale āna i kūkulu ai nona; no ka mea, ʻōlelo ihola ʻo ia, “ʻAʻole e noho kaʻu wahine ma ka hale o Dāvida, ke aliʻi o kā ʻIseraʻela; no ka mea, ua laʻa ia mau wahi, kahi i komo ai ka pahu o Iēhova.”

¹² ¶ A laila, mōhai akula ʻo Solomona i nā mōhai iā Iēhova ma luna o ke kuahu o Iēhova, ka mea āna i kūkulu ai i mua o ka lānai;

¹³ e mōhai aku ana i kēlā lā i kēia lā i ka mea i hoʻomaopopo ʻia ai, a e like hoʻi me ke kānāwai o Mose no nā Sābati, a me nā Mahina Hou, a no nā ʻahaʻaina maikaʻi, ʻekolu manawa i kēlā makahiki i kēia makahiki, i ka ʻAhaʻaina Berena Hū ʻOle, ka ʻAhaʻaina Hebedoma, a me ka ʻAhaʻaina Kauhalelewa.

¹⁴ ¶ Ma muli o ka manaʻo o Dāvida kona makua, hoʻonoho papa ihola ʻo ia i ka poʻe kāhuna e like me kā lākou hana ʻana, a i nā Levi hoʻi ma kā lākou ʻoihana e hoʻoleʻa aku, a e lawelawe i mua o ka poʻe kāhuna, e like me ka hana o kēlā lā kēia lā, a hoʻonoho papa nō hoʻi i ka poʻe kiaʻi puka ma kēlā ʻīpuka kēia ʻīpuka; no ka mea, pēlā ke kauoha a Dāvida ke kanaka o ke Akua.

¹⁵ ʻAʻole i pale ʻia aʻe ke kānāwai o ke aliʻi i ka poʻe kāhuna, a me nā Levi ma kekahi mea, ʻaʻole hoʻi ma nā waihona waiwai.

¹⁶ ¶ A ua hoʻomākaukau ʻia ka hana a pau a Solomona, a hiki i ka lā o ka hoʻokumu ʻana i ka hale o Iēhova, a i kona paʻa ʻana nō hoʻi; pēlā i paʻa ai ka hale o Iēhova.

¹⁷ ¶ A laila, hele ʻo Solomona i ʻEziona Gebera, a i ʻElota ma kahakai i ka ʻāina ʻo ʻEdoma.

¹⁸ A hāʻawi maila ʻo Hurama iā Solomona ma nā lima o kāna poʻe kauā, i nā moku a me nā kauā ʻike i ke kai; a hele pū lākou me nā kauā a Solomona i ʻOpira, a lawe mai laila mai i ʻehā haneri a me kanalima tālena gula, a hali maila i o Solomona lā i ke aliʻi.