KA BUKE ʻALUA O KA ʻOIHANA ALIʻI 4 - Ka Baibala Hemolele

1 Ke kuahu keleawe. 2 Ke kai i hoʻoheheʻe ʻia. 6 Nā ipu ʻauʻau he ʻumi; nā ipukukui; nā papa ʻaina.

MOKUNA IV.

¹ ¶ Hana ihola ʻo ia i kuahu keleawe, ʻo ka loa he iwakālua kūbita, a ʻo ka laulā, he iwakālua kūbita, a he ʻumi kūbita ke kiʻekiʻe.

² Hana ihola ʻo ia i ke Kai i hoʻoheheʻe ʻia, he ʻumi kūbita mai kekahi mūkaʻe a i kekahi mūkaʻe, a he mea poepoe ia, ʻo ke kiʻekiʻe ʻelima kūbita; a ʻo ke ana puni he kanakolu kūbita.

³ A ma lalo iho o ia mea a puni, aia nō nā kiʻi o nā bipi kauō; he ʻumi ma ke kūbita, a puni ke Kai; ʻelua lālani bipi i hoʻoheheʻe pū ʻia i ka hoʻoheheʻe ʻana ia mea.

⁴ A kau ihola ia ma luna o nā bipi kauō he ʻumikumamālua: aia ʻekolu bipi e nānā ana i ka ʻākau, ʻekolu hoʻi e nānā ana i ke komohana, ʻekolu i ka hema, a ʻekolu i ka hikina; a ma luna iho ke kai, a ʻo ko lākou mau huelo aia ma loko.

⁵ A ʻo kona mānoanoa hoʻokahi kīkoʻo ma ka lima, a ʻo kona mūkaʻe ua hana ʻia e like me ka mūkaʻe o ke kīʻaha me nā pua līlia; a ʻekolu tausani bato ona ke hoʻopiha ʻia.

⁶ Hana nō hoʻi ʻo ia i nā ipu ʻauʻau he ʻumi, a hoʻonoho ihola ʻo ia i ʻelima ma ka ʻaoʻao ʻākau, a ʻelima hoʻi ma ka ʻaoʻao hema no ka holoi ʻana; ma laila i holoi ai lākou i nā mea mōhai; akā, ʻo ke Kai he wahi ʻauʻau ia no ka poʻe kāhuna wale nō.

⁷ ¶ Hana nō hoʻi ʻo ia i nā ipukukui gula he ʻumi e like me ko lākou ʻano i kauoha ʻia ai, a hoʻonoho ihola i loko o ka luakini, ʻelima ma ka ʻaoʻao ʻākau, a ʻelima hoʻi ma ka ʻaoʻao hema.

⁸ Hana ihola ia i nā papa ʻaina he ʻumi, a hoʻonoho ihola i loko o ka luakini, ʻelima ma ka ʻaoʻao ʻākau, ʻelima hoʻi ma ka ʻaoʻao hema; a hana ihola ʻo ia i nā ipu gula hoʻokahi haneri.

⁹ Hana hoʻi ia i ka pā hale no nā kāhuna a me ka pā hale nui, a me nā puka no ka pā hale, a uhi ʻo ia i ko laila mau puka i ke keleawe.

¹⁰ A hoʻonoho ʻo ia i ke Kai ma ka ʻaoʻao ʻākau ma ka hikina, e kū pono ana i ka hema.

¹¹ ¶ Hana ihola ʻo Hurama i nā ipu hoʻolapalapa, a me nā ʻōʻōahi, a me nā kīʻaha nui. Pēlā i hoʻopau ai ʻo Hurama i ka hana āna i hana ai na Solomona ke aliʻi, no ka hale o ke Akua:

¹² pēnēia, ʻo nā kia ʻelua a me nā bola a me nā pāpale ma luna o nā poʻo o nā kia ʻelua, a me nā lātike ʻelua e uhi i nā bola ʻelua o nā pāpale ma luna o nā poʻo o nā kia;

¹³ a me nā pomegerane ʻehā haneri no nā lātike ʻelua. ʻElua lālani pomegerane no kekahi lātike, i mea e uhi ai i nā bola ʻelua o nā pāpale ma luna o nā poʻo o nā kia;

¹⁴ hana ihola ia i nā waihona ipu a me nā ipu holoi ma luna o nā waihona;

¹⁵ i hoʻokahi Kai, a me nā bipi kauō he ʻumikumamālua ma lalo iho;

¹⁶ a me nā ipu hoʻolapalapa, a me nā ʻōʻōahi, a me nā kīlou manamana, a me ko laila mau mea a pau; hana nō ʻo Hurama kona makua ia mau mea, i ke keleawe huali, na ke aliʻi na Solomona, no ka hale o Iēhova.

¹⁷ Ma ka pāpū ʻo Ioredane i hoʻoheheʻe ai ke aliʻi i kēia mau mea ma ka ʻāina lepo pālolo ma waena o Sukota, a me Zeradata.

¹⁸ Pēlā i hana ai ʻo Solomona i kēia mau mea he nui loa; no ka mea, ʻaʻole e pau i ka helu ʻia nā paona o ke keleawe.

¹⁹ ¶ A hana ʻo Solomona i nā ipu a pau no ka hale o ke Akua: i ke kuahu gula kekahi, a me nā papa no ka berena hōʻike;

²⁰ a me nā ipukukui a me nā lama o laila no ka ʻaʻā ʻana, e like me ke kauoha i mua o kahi hoʻāno, ʻo ke gula maikaʻi;

²¹ ʻo nā pua a me nā kukui, a me nā ʻūpā ahi, he gula nō ia, a he gula maʻemaʻe wale nō;

²² a ʻo nā ʻūpā kukui, a me nā ipu, a me nā puna, a me nā ipu kukuni ahi, he gula maʻemaʻe; a ʻo ka puka komo o ka hale, a me nā puka komo i loko o Kahi Hoʻāno Loa, a me nā pani hale o ka luakini, he gula nō ia.