KA BUKE ʻALUA O KA ʻOIHANA ALIʻI 30 - Ka Baibala Hemolele

1 Hoʻāla hou ʻo Hezekia i ka ʻAhaʻaina Mōliaola. 13 Kuʻi palu ihola ʻo ia i nā kiʻi.

MOKUNA XXX.

¹ ¶ Hoʻouna akula ʻo Hezekia a i kā ʻIseraʻela a pau, a me kā Iuda, a kākau nō hoʻi ʻo ia i nā palapala na kā ʻEperaima, a me Manase, e hele mai i ka hale o Iēhova ma Ierusalema, e hana i ka ʻAhaʻaina Mōliaola na Iēhova ke Akua o kā ʻIseraʻela.

² Ua kūkākūkā pū ke aliʻi a me nā aliʻi iho ona, a me ka ʻaha kanaka a pau ma Ierusalema, e hana i ka ʻAhaʻaina Mōliaola i ka malama ʻelua.

³ No ka mea, ʻaʻole i hiki ke hana ʻia ia manawa; no ka mea, ʻaʻole i huikala pono nā kāhuna iā lākou iho, ʻaʻole hoʻi i ʻākoakoa mai nā kānaka ma Ierusalema.

⁴ A ua pololei ia mea i nā maka o ke aliʻi, a i nā maka o ka ʻaha kanaka a pau.

⁵ A kau lākou i ke kānāwai, e kūkala aku ma ʻIseraʻela a pau loa, mai Beʻereseba a hiki i Dana, e hele mai lākou e hana i ka ʻAhaʻaina Mōliaola no Iēhova, ke Akua o kā ʻIseraʻela ma Ierusalema; no ka mea, ua lōʻihi ka manawa i hana ʻole ai lākou e like me ka mea i kākau ʻia ai.

⁶ A laila, hele akula ka poʻe kūkini me nā palapala a ke aliʻi, a me kona poʻe aliʻi ma ʻIseraʻela a pau a me Iuda, e ʻōlelo ana e like me ke kauoha a ke aliʻi, “E nā mamo a ʻIseraʻela, e huli mai iā Iēhova ke Akua o ʻAberahama, a me ʻIsaʻaka, a me ʻIseraʻela, a e huli mai nō kēlā i ke koena, i ka poʻe o ʻoukou i pakele, mai ka lima mai, o nā aliʻi o ʻAsuria.

⁷ “Mai noho ʻoukou e like me ko ʻoukou poʻe mākua, a me ko ʻoukou poʻe hoahānau, ka poʻe i lawehala iā Iēhova ke Akua o ko lākou poʻe kūpuna, a hāʻawi ʻo ia iā lākou e luku ʻia mai, e like me ka mea a ʻoukou e ʻike nei.

⁸ “ʻĀnō, mai hōʻoʻoleʻa ʻoukou i ko ʻoukou ʻāʻī e like me ko ʻoukou poʻe kūpuna; e hoʻolilo iā ʻoukou iho no Iēhova, a e komo ʻoukou i loko o kona wahi hoʻāno āna i hoʻāno mau loa ai; a e hoʻokauā na Iēhova ko ʻoukou Akua, i huli aʻe ka wela o kona huhū mai o ʻoukou aku.

⁹ “No ka mea, i ko ʻoukou huli ʻana iā Iēhova, e loaʻa ke aloha ʻia mai i ko ʻoukou poʻe hoahānau, a me kā ʻoukou poʻe kamaliʻi i mua o ka poʻe i lawe pio aku iā lākou, a e hoʻi hou lākou i kēia ʻāina; no ka mea, ua ahonui, a ua lokomaikaʻi ʻo Iēhova ko ʻoukou Akua, ʻaʻole e hāliu kona maka mai o ʻoukou aku, ke huli ʻoukou iā ia.”

¹⁰ Pēlā i kaʻahele ai ka poʻe kūkini mai kekahi kūlanakauhale, i kekahi kūlanakauhale ma ka ʻāina ʻo ʻEperaima, a me Manase a hiki i Zebuluna; akā, ua ʻakaʻaka henehene nā kānaka iā lākou me ka hoʻomāʻewaʻewa mai iā lākou.

¹¹ Akā, ʻo kekahi poʻe no ʻAsera, a me Manase, a no Zebuluna, hoʻohaʻahaʻa lākou iā lākou iho, a hele mai i Ierusalema.

¹² A ma luna o kā Iuda ka lima o Iēhova e hāʻawi iā lākou i ka naʻau hoʻokahi, e hana i ke kauoha a ke aliʻi, a me nā aliʻi iho, e like me ke kānāwai o Iēhova.

¹³ ¶ A ʻākoakoa maila ma Ierusalema nā kānaka he nui loa e hana i ka ʻAhaʻaina Berena Hū ʻOle, i ka malama ʻelua, he ʻaha kanaka nui loa.

¹⁴ A laila, kū aʻela lākou i luna a lawe aku lākou i nā kuahu ma Ierusalema, a lawe aku nō hoʻi lākou i nā ipu ahi, a hoʻolei ia mau mea i loko o ke kahawai ʻo Kederona.

¹⁵ A pepehi lākou i ka mōhai Mōliaola i ka lā ʻumikumamāhā o ka malama ʻelua; a ʻo nā kāhuna a me nā Levi, ua hilahila lākou, a huikala lākou iā lākou iho, a lawe lākou i nā mōhai kuni i loko o ka hale o Iēhova.

¹⁶ Kū aʻela lākou i luna ma ko lākou wahi e like me kā lākou ʻoihana i kauoha ʻia ai e Mose, ke kanaka o ke Akua; a ʻo nā kāhuna, kāpīpī ihola lākou i ke koko i loaʻa iā lākou ma ka lima o nā Levi.

¹⁷ No ka mea, ua nui ka poʻe i waena o ka ʻaha kanaka i huikala ʻole iā lākou iho; no laila, aia nā Levi ma luna o ka pepehi ʻana i ka mōhai Mōliaola no ka poʻe maʻemaʻe ʻole, i mea e huikala ai iā lākou no Iēhova.

¹⁸ No ka mea, he lehulehu ka poʻe kānaka no ʻEperaima, a me Manase, a me ʻIsakara, a me Zebuluna, ʻaʻole i huikala lākou iā lākou iho; akā, ʻai nō naʻe lākou i ka ʻAhaʻaina Mōliaola, ʻaʻole e like me ka mea i kākau ʻia. Akā, pule ʻo Hezekia no lākou, ʻī akula, “E kala mai ʻoe, e Iēhova ka maikaʻi,

¹⁹ i kēlā mea kēia mea i hoʻomākaukau i kona naʻau e ʻimi i ke Akua iā Iēhova, ke Akua o kona poʻe kūpuna, ʻaʻole naʻe i maʻemaʻe e like me ka huikala ʻana o ka luakini.”

²⁰ Hoʻolohe mai ʻo Iēhova iā Hezekia, a hoʻōla mai ʻo ia i nā kānaka.

²¹ A ʻo ka poʻe mamo a ʻIseraʻela a pau ma Ierusalema, hana lākou i ka ʻAhaʻaina Berena Hū ʻOle i nā lā ʻehiku, me ka ʻoliʻoli nui; a hoʻoleʻa aku nā kāhuna a me nā mamo a Levi iā Iēhova i kēlā lā i kēia lā, me nā mea kani ikaika iā Iēhova.

²² ʻŌlelo ʻoluʻolu aku ʻo Hezekia i nā Levi a pau, ka poʻe i aʻo aku ma ka ʻike pono iā Iēhova; a ʻai lākou i ka ʻahaʻaina i nā lā ʻehiku, a mōhai aku lākou i nā mōhai aloha, a haʻi aku lākou i ko lākou hewa iā Iēhova ke Akua o ko lākou poʻe kūpuna.

²³ ¶ A kūkākūkā pū ka poʻe ʻaha kanaka a pau e hana i nā lā ʻehiku hou aku; a hana nō lākou i nā lā ʻehiku hou aku me ka ʻoliʻoli.

²⁴ No ka mea, ua hāʻawi ʻo Hezekia ke aliʻi o kā Iuda na ka ʻaha kanaka i hoʻokahi tausani bipi a me nā hipa ʻehiku tausani; a hāʻawi nā aliʻi na ka ʻaha kanaka i hoʻokahi tausani bipi, a me nā hipa he ʻumi tausani; a ʻo nā kāhuna he nui loa, huikala lākou iā lākou iho.

²⁵ Hauʻoli nō ka ʻaha kanaka a pau o kā Iuda, ʻo nā kāhuna, a me nā Levi, a ʻo ka ʻaha kanaka a pau i hele mai, no kā ʻIseraʻela, a me nā malihini i hele mai ka ʻāina ʻo ʻIseraʻela mai, a me ka poʻe i noho ma Iuda.

²⁶ Ua nui ka hauʻoli ʻana ma Ierusalema; no ka mea, mai ka wā iā Solomona ʻo ke keiki a Dāvida ke aliʻi o kā ʻIseraʻela mai, ʻaʻohe mea like ma Ierusalema.

²⁷ Kū aʻela i luna nā kāhuna, a me nā Levi, a hoʻomaikaʻi aku i nā kānaka; a ua lohe ʻia ko lākou leo, a ua hiki ko lākou pule i kona wahi hoʻāno i ka lani.