KA BUKE ʻALUA O KA ʻOIHANA ALIʻI 3 - Ka Baibala Hemolele

1 Kahi a me ka manawa i kūkulu ʻia ai ka luakini. 3 Ka nui a me nā mea e nani ai ka luakini.

MOKUNA III.

¹ ¶ Hoʻomaka ihola ʻo Solomona e kāpili i ka hale o Iēhova ma Ierusalema, ma ka mauna ʻo Moria, ma kahi i ʻike ʻia mai ai ʻo ia e Dāvida, kona makua kāne, ma kahi a Dāvida i hoʻomākaukau ai i kahi hehi palaoa o ʻOrenana ka Iebusa.

² Hoʻomaka ihola ʻo ia e kāpili hale, i ka makahiki ʻehā o kona noho aliʻi ʻana, i ka malama ʻelua, a i ka lā ʻelua o ia malama.

³ Eia ka hoʻokumu ʻana o ka hale o ke Akua a Solomona i kūkulu ai: ʻo nā kūbita o ka loa e like me ke ana mua ʻana he kanaono kūbita, a ʻo ka laulā he iwakālua kūbita.

⁴ A ʻo ka loa o ka lānai ma ke ala, ua like ia me ka laulā o ka hale he iwakālua kūbita, a ʻo kona kiʻekiʻe hoʻokahi haneri kūbita a me ka iwakālua, a uhi ihola ʻo ia ia mea ma loko me ke gula maʻemaʻe.

⁵ A ʻo ka hale nui, kāpili nō ia i ka lāʻau paina, a uhi ihola i ke gula maikaʻi, hoʻonoho ihola ma luna o laila i nā lālā loulu i kālai ʻia a me nā kaula.

⁶ A hoʻonani ʻia ka hale i nā pōhaku maikaʻi a me ke gula, i ke gula o Parevaima.

⁷ A uhi nō hoʻi ia i ka hale, i nā kaola, a me nā paepae, a me nā pā ona, a me kona mau puka i ke gula, a kālai ʻo ia i nā kerubima ma luna o nā pā.

⁸ ¶ Hana ihola ʻo ia i ka Hale Hoʻāno Loa, ʻo ka loa ua like pū ʻia me ka laulā o ka hale, he iwakālua kūbita, a ʻo kona laulā he iwakālua kūbita, a uhi ihola ʻo ia ia mea i ke gula maʻemaʻe ʻeono haneri tālena.

⁹ A ʻo nā kui ma ke kaupaona ʻana he kanalima sekela gula; a uhi ihola ʻo ia i nā keʻena ma luna i ke gula.

¹⁰ ¶ A i loko o ka hale hoʻāno loa, hana ihola ʻo ia i nā kerubima ʻelua, ma muli o ka hana kālai kiʻi, a uhi ihola ʻo ia ia mau mea i ke gula.

¹¹ ʻO nā ʻēheu o nā kerubima he iwakālua kūbita ka loa; ʻo ka ʻēheu o kekahi ʻelima kūbita e pā ana ma ka paia o ka hale; a ʻo ka ʻēheu o kekahi ʻelima nō kūbita e pā ana i ka ʻēheu o kēlā kerubima.

¹² ʻO ka ʻēheu o kekahi kerubima ʻelima nō kūbita e pā ana ma ka paia o ka hale; a ʻo ka ʻēheu o kekahi ʻelima nō kūbita e pā ana i ka ʻēheu o kēlā kerubima.

¹³ ʻO nā ʻēheu o kēia mau kerubima i hohola ʻia he iwakālua kūbita; a kū lāua ma ko lāua mau wāwae, a ma loko ko lāua alo.

¹⁴ Hana ihola ia i ka pākū lole uli, a me ka ʻulaʻula ʻāhiahia, a me ka ʻulaʻula maoli, a me ka lole pulupulu maikaʻi, a hana ihola ʻo ia i nā kerubima ma luna ona.

¹⁵ ¶ Hana ihola ʻo ia no ke alo o ka hale i nā kia ʻelua he kanakolukumamālima kūbita ka loa, a ʻo ka pāpale ma luna o kona poʻo ʻelima kūbita.

¹⁶ Hana ihola nō hoʻi ʻo ia i nā kaula i loko o kahi laʻa, a kau ma luna o nā poʻo o nā kia, a hana nō hoʻi ia i nā pomegerane hoʻokahi haneri, a kau aku ma luna o ua mau kaula lā.

¹⁷ Kūkulu ihola ʻo ia i nā kia ma ke alo o ka luakini ma ka ʻaoʻao ʻākau kekahi, a ma ka ʻaoʻao hema kekahi; a kapa akula ia i ka inoa o ka mea ma ka ʻākau ʻo Iakina, a i ka inoa o ka mea ma ka hema ʻo Boaza.