KA BUKE ʻALUA O KA ʻOIHANA ALIʻI 29 - Ka Baibala Hemolele

1 Kā Hezekia noho ʻana me ka maikaʻi. 3 Kona hoʻomaʻemaʻe ʻana i ka luakini o Iēhova. 20 Kona mōhai nui.

MOKUNA XXIX.

¹ ¶ Hoʻomaka ihola ʻo Hezekia e aliʻi i kona makahiki he iwakāluakumamālima, a he iwakāluakumamāiwa makahiki kona noho aliʻi ʻana ma Ierusalema; a ʻo ka inoa o kona makuahine, ʻo ʻAbiia, ke kaikamahine a Zekaria.

² Hana pololei ihola ʻo ia i mua i ke alo o Iēhova, e like me nā mea a pau a Dāvida kona kupuna i hana ai.

³ ¶ I ka makahiki mua o kona noho aliʻi ʻana, a i ka malama mua nō hoʻi, wehe aʻela ia i nā puka o ka hale o Iēhova, a hana hou ia mau mea.

⁴ Kiʻi aku ia i nā kāhuna a me nā Levi, a hōʻuluʻulu iā lākou ma ke ala ma ka hikina;

⁵ ʻŌlelo akula ʻo ia iā lākou, “E hoʻolohe mai ʻoukou iaʻu, e nā Levi; ʻānō, e huikala ʻoukou iā ʻoukou iho, a e hoʻomaʻemaʻe ʻoukou i ka hale o Iēhova ke Akua o ko ʻoukou poʻe kūpuna, a e lawe aku i nā mea haumia mai kahi hoʻāno aku.

⁶ “No ka mea, ua lawehala ko kākou poʻe kūpuna, ua hana ʻino lākou i mua i ke alo o Iēhova, ko kākou Akua, ua haʻalele lākou iā ia, ua huli ko lākou maka mai ka halelewa o Iēhova aku, a ua hāʻawi mai lākou i ke kua.

⁷ “A ua pani lākou i nā puka o ka lānai, ua kinai i nā kukui, ʻaʻole lākou i kuni i ka mea ʻala, ʻaʻole hoʻi i mōhai aku lākou i kekahi mōhai ma kahi hoʻāno o ke Akua o kā ʻIseraʻela.

⁸ “No ia mea, ua kau ʻia mai ka huhū o Iēhova ma luna o kā Iuda, a me ko Ierusalema, a ua hāʻawi ʻo ia iā lākou i ka hana ʻino ʻia mai, a me ka henehene ʻia mai, a me ka hoʻowahāwahā ʻia mai, e like me ka mea a ko ʻoukou mau maka i ʻike iho nei.

⁹ “Aia hoʻi, ua hāʻule ko kākou poʻe kūpuna i ka pahi kaua, a ʻo kā kākou poʻe keiki kāne, a me nā kaikamāhine a kākou, a me nā wāhine a kākou, he poʻe pio lākou no kēia hewa.

¹⁰ “ʻĀnō, eia nō i loko o koʻu naʻau e hana i berita me Iēhova ke Akua o kā ʻIseraʻela, i huli aʻe kona huhū wela mai o kākou aku.

¹¹ “ʻĀnō, e kaʻu poʻe keiki, mai lalau ʻoukou; no ka mea, ua wae mai ʻo Iēhova iā ʻoukou e kū i mua ona e hoʻokauā nāna, a e lawelawe i kāna mau ʻoihana, a e kuni i ka mea ʻala.”

¹² ¶ A laila, kū aʻela i luna nā Levi, ʻo Mahata, ke keiki a ʻAmasai, a me Ioʻela, ke keiki a ʻAzaria, no ka poʻe mamo a Kohata; a no ka poʻe mamo a Merari, ʻo Kisa ke keiki a ʻAbedi, a me ʻAzaria ke keiki a Iehalelela; a ʻo ka poʻe mamo a Geresoma, ʻo Ioa ke keiki a Zima, a ʻo ʻEdena ke keiki a Ioa;

¹³ a no ka poʻe mamo a ʻElizapana, ʻo Simeri, a me Ieila; a no ka poʻe mamo a ʻAsapa, ʻo Zekaria, a me Matania;

¹⁴ a no ka poʻe mamo a Hemana, ʻo Iehiʻela, a me Simei; a no ka poʻe mamo a Iedutuna, ʻo Semaia a me ʻUziʻela.

¹⁵ A hōʻuluʻulu lākou i ko lākou poʻe hoahānau, a huikala iā lākou iho, a hele mai e like me ke kauoha a ke aliʻi, a me ka ʻōlelo a Iēhova, e hoʻomaʻemaʻe i ka hale o Iēhova.

¹⁶ A komo nā kāhuna i loko lilo o ka hale o Iēhova e hoʻomaʻemaʻe, a lawe lākou i waho i nā mea maʻemaʻe ʻole a pau i loaʻa iā lākou ma ka luakini o Iēhova, a waiho ma ke kahua o ka hale o Iēhova. A lawe ka poʻe mamo a Levi ia mau mea, a hali aku i ke kahawai ʻo Kiderona.

¹⁷ Hoʻomaka lākou e hoʻomaʻemaʻe i ka lā mua o ka malama mua, a i ka lā ʻewalu o ua malama lā ua hiki lākou i ka lānai o Iēhova; pēlā i hoʻomaʻemaʻe ai lākou i ka hale o Iēhova i nā lā ʻewalu, a i ka lā ʻumikumamāono o ka malama mua, hoʻopau aʻela lākou.

¹⁸ A komo lākou i loko i o Hezekia lā, ke aliʻi, a ʻōlelo akula iā ia, “Ua hoʻomaʻemaʻe mākou i ka hale o Iēhova a pau, a me ke kuahu mōhai, a me ko laila mau kīʻaha a pau, a me ka papa berena hōʻike, a me ko laila mau kīʻaha a pau.

¹⁹ “A me nā kīʻaha a pau a ke aliʻi a ʻAhaza i kiola aku ai, i kona lawehala ʻana i kona wā i noho aliʻi ai, hoʻomākaukau mākou, a hoʻomaʻemaʻe nō hoʻi, aia hoʻi ia mau mea i mua o ke kuahu o Iēhova.”

²⁰ ¶ A kakahiaka nui ala aʻela ʻo Hezekia, ke aliʻi, a hōʻuluʻulu i nā aliʻi o ke kūlanakauhale, a piʻi aku i ka hale o Iēhova.

²¹ A lawe mai lākou i ʻehiku bipi kāne, a me nā hipa keiki ʻehiku, a me nā kao kāne ʻehiku, i mōhai hala no ke aupuni, a no ke keʻena kapu, a no kā Iuda; a kauoha akula ia i nā mamo a ʻAʻarona, i nā kāhuna, e mōhai aku ia mau mea ma luna o ke kuahu o Iēhova.

²² A pepehi ihola lākou i nā bipi, a lawe nā kāhuna i ke koko, a kāpīpī ihola ma luna o ke kuahu; a pepehi nō hoʻi lākou i nā hipa kāne, a kāpīpī ihola i ke koko ma luna o ke kuahu; a pepehi lākou i nā hipa keiki nō hoʻi, a kāpīpī ihola i ke koko ma luna o ke kuahu.

²³ A kaʻi maila lākou i nā kao kāne i mōhai hala i mua o ke aliʻi, a me ka ʻaha kanaka; a kau lākou i ko lākou mau lima ma luna o ia mau mea.

²⁴ A pepehi nā kāhuna ia mau mea, a mōhai aku i ko lākou koko ma luna o ke kuahu, i mea e uhi ai i ka hala no kā ʻIseraʻela a pau; no ka mea, no kā ʻIseraʻela a pau i kauoha ai ke aliʻi i ka mōhai kuni a me ka mōhai hala.

²⁵ ¶ A hoʻonoho ihola ʻo ia i nā Levi i loko o ka hale o Iēhova me nā kimebala, a me nā pesaletera, a me nā mea kani, e like me ke kauoha a Dāvida, a me Gada ke kumu a ke aliʻi, a me Natana ke kāula; no ka mea, pēlā ke kauoha a Iēhova ma nā kāula.

²⁶ A kū aʻela i luna nā Levi me nā mea kani a Dāvida, a ʻo nā kāhuna kekahi me nā pū.

²⁷ A laila, kauoha ʻo Hezekia e mōhai aku i ka mōhai ma luna o ke kuahu; a i ka wā i hoʻomaka ai lākou e mōhai aku, hoʻomaka nō hoʻi ka hīmeni o Iēhova me nā pū a me nā mea kani, a Dāvida ke aliʻi o kā ʻIseraʻela.

²⁸ A ʻo ka ʻaha kanaka a pau loa, kūlou ihola lākou, a hīmeni aku ka poʻe hīmeni, puhi nō hoʻi ka poʻe puhi pū; a hana pēlā a pau ka mōhai ʻana.

²⁹ ¶ A pau aʻela ka mōhai ʻana, kūlou ihola ke aliʻi, a me ka poʻe ma laila pū me ia a pau, a hoʻomana akula.

³⁰ A laila, kauoha aʻela ʻo Hezekia ke aliʻi, a me nā kaukaualiʻi i nā Levi, e hoʻomaikaʻi aku iā Iēhova ma nā ʻōlelo a Dāvida, a me ʻAsapa ke kāula. A hoʻomaikaʻi aku lākou me ka ʻoliʻoli, kūlou ihola, a hoʻomana akula.

³¹ ʻŌlelo maila ʻo Hezekia, ʻī maila, “ʻĀnō, ua hoʻolaʻa ʻoukou iā ʻoukou iho no Iēhova, e hele mai, a e lawe mai i nā mōhai, a me nā mōhai aloha i ka hale o Iēhova.” A lawe mai ka ʻaha kanaka i nā ʻālana, a me nā mōhai aloha; a ʻo ka poʻe a pau i makemake ka naʻau, lawe mai lākou i nā mōhai kuni.

³² ʻO nā mōhai kuni ma ka helu ʻana, a ka ʻaha kanaka i lawe mai ai, he kanahiku bipi, hoʻokahi haneri hipa kāne, a ʻelua haneri hipa keiki; no ka mōhai kuni iā Iēhova kēia mau mea a pau loa.

³³ A ʻo nā mea i hoʻolaʻa ʻia, ʻeono haneri bipi, a ʻekolu tausani hipa.

³⁴ Akā, ʻaʻole i nui ka poʻe kāhuna, ʻaʻole hiki iā lākou wale nō ke pepehi i nā mōhai kuni a pau; no ia mea, kōkua mai ko lākou poʻe hoahānau, ʻo nā Levi, a hiki i ka pau ʻana o ka hana, a i ka wā hoʻi i huikala mai ai ka poʻe kāhuna iā lākou iho; no ka mea, ua ʻoi aku ka pololei o ka naʻau o nā Levi e huikala iā lākou iho ma mua o nā kāhuna.

³⁵ Ua nui loa nō hoʻi nā mōhai kuni me ka momona o nā mōhai aloha, a me nā mōhai inu, no kēlā mōhai kuni, kēia mōhai kuni. Pēlā i hoʻoponopono ʻia ai nā ʻoihana o ka hale o Iēhova.

³⁶ A hauʻoli ʻo Hezekia a me nā kānaka a pau i ko ke Akua hoʻomākaukau ʻana i nā kānaka; no ka mea, hikiwawe nō ka hana.