KA BUKE ʻALUA O KA ʻOIHANA ALIʻI 28 - Ka Baibala Hemolele

1 Ka hewa loa o ʻAhaza i kona noho aliʻi ʻana. 5 Ua hana ʻino ʻia mai ʻo ia e ko Suria. 22 Ka māhuahua o kona hewa a me kona make ʻana.

MOKUNA XXVIII.

¹ ¶ He iwakālua makahiki ko ʻAhaza i kona wā i aliʻi ai, a noho aliʻi ihola ia ma Ierusalema, he ʻumikumamāono makahiki; ʻaʻole i hana pololei ʻo ia i mua o Iēhova e like me Dāvida kona kupuna.

² Akā, hele ia ma nā ʻaoʻao o nā aliʻi o kā ʻIseraʻela, a hana ihola ia i nā kiʻi i hoʻoheheʻe ʻia no Baʻala.

³ Ua kuni nō hoʻi ia i ka mea ʻala ma ke Awāwa o ke Keiki a Hinoma, a puhi i kāna mau keiki i ke ahi, e like me ka ʻaoʻao hoʻopailua o nā lāhui kanaka ʻē, ka poʻe a Iēhova i kipaku aku ai i mua o ke alo o ka poʻe mamo a ʻIseraʻela.

⁴ Ua mōhai aku hoʻi ia, a kuni i ka mea ʻala ma nā wahi kiʻekiʻe ma luna o nā puʻu, a ma lalo iho o nā lāʻau uliuli a pau.

⁵ ¶ No ia mea, hāʻawi ʻo Iēhova kona Akua iā ia i loko o ka lima o ke aliʻi o Suria; a ua hahau lākou iā ia, a ua lawe pio i kekahi poʻe nui loa o lākou, a alakaʻi iā lākou i Damaseko; a ua hāʻawi ʻia nō hoʻi ia i loko o ka lima o ke aliʻi o kā ʻIseraʻela, a hahau mai ʻo ia iā ia ma ka hahau nui.

⁶ No ka mea, pepehi ʻo Peka ke keiki a Remalia ma Iuda i hoʻokahi haneri me ka iwakālua tausani kānaka i ka lā hoʻokahi, he poʻe ikaika lākou a pau loa; no ka mea, ua haʻalele lākou iā Iēhova, ke Akua o ko lākou poʻe kūpuna.

⁷ Ua pepehi ʻo Zikeri, ke kanaka ikaika o ʻEperaima iā Maseia ke keiki a ke aliʻi, a me ʻAzerikama, ka luna o ka hale, a me ʻElekama, ka mea ma lalo iho o ke aliʻi.

⁸ ¶ A ua lawe pio aku ka poʻe mamo a ʻIseraʻela i ʻelua haneri tausani o ko lākou poʻe hoahānau, he poʻe wāhine, a he poʻe keiki kāne, a he poʻe kaikamāhine; a lawe nō hoʻi lākou i ka waiwai pio he nui loa, a halihali lākou i ka waiwai pio i Samaria.

⁹ “Aia ma laila kekahi kāula o Iēhova, ʻOdeda kona inoa; hele ia i waho e hālāwai pū me ka poʻe koa i ko lākou komo ʻana i loko o Samaria, a ʻōlelo akula ʻo ia iā lākou,” Aia hoʻi, i ka huhū ʻana o Iēhova ke Akua o ko ʻoukou poʻe kūpuna i kā Iuda, ua hāʻawi mai ʻo ia iā lākou i loko o ko ʻoukou mau lima, a ua luku ʻoukou iā lākou me ka huhū i hiki loa aku i ka lani.

¹⁰ “A ke manaʻo nei ʻoukou e hoʻohaʻahaʻa i ko Iuda a me ko Ierusalema a lilo lākou i poʻe kauā kāne, a i poʻe kauā wahine na ʻoukou; akā, ʻo ʻoukou, ʻaʻole anei i waena o ʻoukou nō hoʻi kekahi, ka hana hewa ʻana aku iā Iēhova i ko ʻoukou Akua?

¹¹ “ʻĀnō, e hoʻolohe mai ʻoukou iaʻu, e hoʻihoʻi aku i ka poʻe pio a ʻoukou i lawe pio mai ai no loko mai o ko ʻoukou poʻe hoahānau; no ka mea, ua wela ka huhū o Iēhova ma luna o ʻoukou.”

¹² A laila, kū aʻela i luna kekahi poʻe no nā luna o kā ʻEperaima, ʻo ʻAzaria, ke keiki a Iehohana, ʻo Berekia ke keiki a Meselemota, Iehizekia ke keiki a Saluma, a me ʻAmasa ke keiki a Hadelai, a kūʻē lākou i ka poʻe i hoʻi mai mai ke kaua mai;

¹³ ʻŌlelo akula iā lākou, “Mai lawe mai ʻoukou i ka poʻe pio i loko nei; aia hoʻi, ua hewa kākou iā Iēhova, a ke manaʻo nei ʻoukou e hoʻonui i ko kākou hewa, a me ko kākou lawehala; no ka mea, ua nui ko kākou hala, a ua wela ka huhū ma luna o kā ʻIseraʻela.”

¹⁴ A laila, haʻalele ka poʻe koa i ka poʻe pio, a me ka waiwai pio i mua o nā aliʻi, a i mua o ka ʻaha kanaka a pau.

¹⁵ A kū aʻela i luna ua poʻe kānaka lā i ʻōlelo ʻia ai ko lākou inoa, a lawe lākou i ua poʻe pio lā, a no ka waiwai pio hōʻaʻahu i ka poʻe o lākou i nele i ke kapa ʻole, a kāhiko iā lākou, a hāwele iā lākou i nā kāmaʻa, a hāʻawi i ka ʻai na lākou, a hoʻohāinu, a kāhinu iā lākou i ka ʻaila, a hoʻoeʻe i ka poʻe nāwaliwali ma luna o nā hoki, a alakaʻi iā lākou i Ieriko i ke kūlanakauhale lāʻau loulu, i ko lākou poʻe hoahānau; a hoʻi lākou i Samaria.

¹⁶ ¶ Ia manawa hoʻouna ʻo ʻAhaza ke aliʻi ma nā aliʻi o ʻAsuria i kōkua mai lākou iā ia.

¹⁷ No ka mea, ua hele hou mai kā ʻEdoma, a pepehi i kā Iuda, a lawe pio i kekahi poʻe.

¹⁸ A ʻo ko Pilisetia, ua hao lākou i nā kūlanakauhale ma nā awāwa, a ma ke kūkulu hema o Iuda, a ua hoʻopio iā Bete Semesa, a me ʻAialona, a me Gederota, a me Soko, a me nā kauhale e pili ana i laila, a me Timena, a me nā kauhale e pili ana i laila, a me Gimezo, a me nā kauhale e pili ana i laila; a noho ihola lākou ma ia mau wahi.

¹⁹ No ka mea, hoʻohaʻahaʻa loa ʻo Iēhova i kā Iuda no ka hewa o ʻAhaza, ke aliʻi o kā ʻIseraʻela; no ka mea, ua hoʻokuʻu aku ʻo ia i kā Iuda i lawehala loa iā Iēhova.

²⁰ A hele maila i ona lā ʻo Tigelata-Pilesera, ke aliʻi o ʻAsuria, a hoʻopilikia iā ia, ʻaʻole hoʻi i kōkua iā ia.

²¹ No ka mea, ua mahele ʻo ʻAhaza i nā mea i loko o ka hale o Iēhova, a me ka hale o ke aliʻi, a ʻo nā aliʻi iho, a hāʻawi aku na ke aliʻi o ʻAsuria; ʻaʻole naʻe ia i kōkua mai iā ia.

²² ¶ A i kona wā pōpilikia, hoʻonui ia i kona lawehala ʻana iā Iēhova. ʻO ia nō ua aliʻi lā, ʻo ʻAhaza.

²³ Ua mōhai ia i nā akua o Damaseko, nā mea i pepehi mai iā ia; a ʻōlelo ihola ia, “No ka mea, ʻo nā akua o nā aliʻi o Suria, ua kōkua ia mau mea iā lākou, no ia mea, e mōhai aku au iā lākou, i kōkua mai lākou iaʻu.” Akā, ua lilo lākou i mea e make ai ia, a me kā ʻIseraʻela a pau.

²⁴ A hōʻuluʻulu ʻo ʻAhaza i nā kīʻaha o ka hale o ke Akua, a ʻokiʻoki ʻo ia ia mau kīʻaha o ka hale o ke Akua, a pani ia i nā puka o ka hale o Iēhova, a hana ihola nona i mau kuahu ma nā huina a pau o Ierusalema.

²⁵ A ma kēlā kūlanakauhale, kēia kūlanakauhale o Iuda, hana ihola ia i nā wahi kiʻekiʻe e kuni i ka mea ʻala i nā akua ʻē, a hoʻonāukiuki ihola ʻo ia iā Iēhova i ke Akua o kona poʻe kūpuna.

²⁶ A ʻo ke koena o kāna mau hana, a ʻo kona ʻaoʻao a pau, ka mua a me ka hope, aia hoʻi, ua kākau ʻia i loko o ka buke no nā aliʻi o kā Iuda a me kā ʻIseraʻela.

²⁷ A hiamoe ihola ʻo ʻAhaza me kona poʻe kūpuna, a ua kanu lākou iā ia i loko o ke kūlanakauhale ma Ierusalema; akā, ʻaʻole lākou i waiho iā ia ma nā wahi e kanu ai no nā aliʻi o ʻIseraʻela; a noho aliʻi ihola ʻo Hezekia kāna keiki ma hope ona.