KA BUKE ʻALUA O KA ʻOIHANA ALIʻI 27 - Ka Baibala Hemolele

1 Ka hana pololei ʻana a Iotama, ua lanakila ia ma luna o kā ʻAmona. 9 Kona make ʻana.

MOKUNA XXVII.

¹ ¶ He iwakāluakumamālima makahiki ko Iotama i kona wā i aliʻi ai, a noho aliʻi ihola ia i nā makahiki he ʻumikumamāono ma Ierusalema; a ʻo ka inoa o kona makuahine, ʻo Ierusa, ke kaikamahine a Zadoka.

² A hana pololei ia i nā maka o Iēhova e like me ka hana a pau a ʻUzia, a kona makua i hana ai; akā hoʻi, ʻaʻole ia i komo i ka hale o Iēhova. A hana hewa nō naʻe nā kānaka.

³ Ua kūkulu ia i ka ʻĪpuka (o ka hale o Iēhova a) Kiʻekiʻe, a ma luna o ka pā o ʻOpela, kūkulu nui ihola ia.

⁴ Ua kūkulu ia i nā kūlanakauhale ma nā mauna o Iuda, a ma ka wao nahele kūkulu ia i nā pā kaua, a me nā hale kiaʻi.

⁵ Ua kaua nō hoʻi ia i ke aliʻi o kā ʻAmona, a lanakila ma luna o lākou; a ua hāʻawi mai ka poʻe mamo a ʻAmona, i kēlā makahiki, i hoʻokahi haneri tālena kālā, a me nā pahu palaoa he ʻumi tausani, a me nā pahu bale he ʻumi tausani. Pēlā i hāʻawi mai ai ka poʻe mamo a ʻAmona i ka makahiki ʻelua, a me ke kolu.

⁶ A lilo ihola ʻo Iotama i mea ikaika; no ka mea, ua hoʻomākaukau ʻo ia i kona ʻaoʻao i mua o Iēhova kona Akua.

⁷ A ʻo ke koena o nā hana a Iotama, a me kona kaua ʻana a pau, a me kona ʻaoʻao, ua kākau ʻia ma ka palapala no nā aliʻi o ʻIseraʻela a me Iuda.

⁸ He iwakāluakumamālima makahiki ona i kona wā i aliʻi ai, a noho aliʻi ihola ia i nā makahiki he ʻumikumamāono ma Ierusalema.

⁹ A hiamoe ihola ʻo Iotama, me kona poʻe kūpuna, a kanu lākou iā ia i loko o ke kūlanakauhale o Dāvida; a noho aliʻi ihola ʻo ʻAhaza, kāna keiki ma kona hakahaka.