KA BUKE ʻALUA O KA ʻOIHANA ALIʻI 26 - Ka Baibala Hemolele

1 Ka noho aliʻi ʻana o ʻUzia. 6 Kāna mau mea kaua. 16 Kona manaʻo e hana i ka ʻoihana a ka poʻe kāhuna. 20 Ua lilo ia i lēpero, a noho kaʻawale.

MOKUNA XXVI.

¹ ¶ A laila, lālau nā kānaka a pau o Iuda, iā ʻUzia, he ʻumikumamāono makahiki ona, a hoʻāliʻi ihola iā ia ma ka hakahaka o kona makua kāne ʻo ʻAmazia.

² Ua kūkulu ʻo ia iā ʻElota, a hui hou ia me Iuda, a ma hope iho, hiamoe ihola ke aliʻi me kona mau mākua.

³ He ʻumikumamāono makahiki ko ʻUzia i kona wā i aliʻi ai, a noho aliʻi ihola ia i nā makahiki ke kanalimakumamālua ma Ierusalema; a ʻo ka inoa o kona makuahine ʻo Iekolia no Ierusalema.

⁴ Ua hana ʻo ia i ka pono i mua o Iēhova, e like me ka mea a kona makua kāne a ʻAmazia i hana ai.

⁵ A ua ʻimi ʻo ia i ke Akua i nā lā o Zekaria, ka mea ʻike i nā akakū no ke Akua mai; a i kona wā i ʻimi ai iā Iēhova, ua hoʻomaikaʻi mai ke Akua iā ia.

⁶ ¶ A hele akula ia a kaua aku i ko Pilisetia, a wāwahi ia i ka pā o Gata, a me ka pā o Iabena, a me ka pā o ʻAsedoda, a kūkulu ihola ia i nā kūlanakauhale ma ʻAsedoda, a ma Pilisetia.

⁷ A kōkua mai ke Akua iā ia e kūʻē i ko Pilisetia a me ko ʻArabia, ka poʻe i noho ma Gura Baʻala, a me ka Mehuna.

⁸ A hāʻawi mai kā ʻAmona i nā makana na ʻUzia, a kaulana loa kona inoa a hiki i kahi e komo ai i loko o ʻAigupita; no ka mea, ua hoʻoikaika nui loa ihola nō ia.

⁹ A ua kūkulu ʻo ʻUzia i mau hale kiaʻi ma Ierusalema ma ka Puka Kihi, a ma ka Puka Awāwa, a ma ka popoiwi o ka pā, hana ʻo ia ia mau mea a pau loa.

¹⁰ A kūkulu nō hoʻi ia i nā hale kiaʻi ma ka wao nahele, a ʻeli ihola i nā pūnāwai he nui loa; no ka mea, nui kāna poʻe holoholona ma ke awāwa, a me ka pāpū; he poʻe mahi ʻai nō hoʻi kekahi, a he poʻe mālama i ka lāʻau waina ma nā mauna, a ma Karemela; no ka mea, ua makemake ʻo ia i ka ʻāina.

¹¹ Aia hoʻi iā ʻUzia he poʻe koa, iā lākou ke kaua, a hele akula lākou i ke kaua ma nā papa ma lalo o Hanania kekahi luna o ke aliʻi, e like me ka helu ʻana o ko lākou poʻe luna e Ieiʻela, ka mea nāna e helu, a me Maʻaseia ka luna.

¹² ʻO ka helu ʻana o ka poʻe koʻikoʻi a pau o nā mākua, ka poʻe koa ikaika, ʻelua tausani a me nā haneri ʻeono.

¹³ Ma lalo iho o lākou he poʻe koa ʻekolu haneri tausani, a ʻehiku tausani ʻelima haneri, he poʻe kaua ikaika loa e kōkua i ke aliʻi i ke kūʻē ʻana i ka ʻenemi.

¹⁴ A hoʻomākaukau ʻo ʻUzia no lākou, no ka poʻe koa a pau, i nā pale kaua, a me nā ihe, a me nā ʻaʻahu a poʻo, a me nā pūliki kaua, a me nā kakaka, a me nā maʻa e maʻa aku ai i nā pōhaku.

¹⁵ Hana ihola ʻo ia ma Ierusalema i nā mea kaua, i nā mea a ka poʻe noʻonoʻo i noʻonoʻo ai, i mau mea ma luna o nā hale kiaʻi, a ma nā kihi, e hoʻolele i nā pua, a me nā pōhaku nui. A ua kaulana kona inoa ma kahi lōʻihi aku; no ka mea, ua kōkua nui ʻia mai nō ia, a ikaika loa ia.

¹⁶ ¶ A ikaika ia, a laila kiʻekiʻe kona naʻau, a ma laila ia i make ai. Hana hewa aku ʻo ia iā Iēhova, i kona Akua, a komo ia i loko o ka luakini o Iēhova e kuni i mea ʻala ma luna o ke kuahu kuni mea ʻala.

¹⁷ A laila, komo ʻo ʻAzaria, ke kahuna ma hope ona, a ʻo nā kāhuna o Iēhova kekahi pū me ia ʻelua kanahā, he poʻe ikaika:

¹⁸ a kūʻē lākou iā ʻUzia i ke aliʻi, ʻōlelo akula lākou iā ia, “ʻAʻole iā ʻoe, e ʻUzia, ke kuni i mea ʻala iā Iēhova, na ka poʻe kāhuna nō, na ka poʻe mamo a ʻAʻarona, ka poʻe i hoʻolaʻa ʻia e kuni i ka mea ʻala; e hele ʻoe i waho o ka luakini; no ka mea, ua hana hewa ʻoe; ʻaʻole e loaʻa iā ʻoe ka nani ma kēia mea mai o Iēhova ke Akua mai.”

¹⁹ A huhū ʻo ʻUzia; aia hoʻi ka ipu ahi kuni mea ʻala ma kona lima; a i kona huhū ʻana i ka poʻe kāhuna, pohā mai ka maʻi lēpera ma kona lae i mua o nā kāhuna i loko o ka hale o Iēhova ma ka ʻaoʻao o ke kuahu kuni mea ʻala.

²⁰ A nānā ʻo ʻAzaria ke kahuna nui, a me nā kāhuna a pau iā ia, aia hoʻi, he maʻi lēpera ma kona lae, a kipaku lākou iā ia mai laila aku; wikiwiki nō hoʻi ia e puka i waho; no ka mea, ua hahau mai ʻo Iēhova iā ia.

²¹ A he kanaka maʻi lēpera ʻo ʻUzia, ke aliʻi a hiki i ka lā o kona make ʻana, a noho kaʻawale ihola ia i loko o ka hale maʻi lēpera; no ka mea, ua ʻoki ʻia ʻo ia mai ka hale o Iēhova aku; a ʻo Iotama, kāna keiki, ʻo ia ka mea ma luna o ka hale o ke aliʻi e hoʻokolokolo ana i nā kānaka o ka ʻāina.

²² A ʻo ke koena o nā hana a ʻUzia, ka mua a me ka hope, ua kākau ʻia ia mau mea e ʻIsaia, ke keiki a ʻAmosa, ke kāula.

²³ Hiamoe ihola ʻo ʻUzia me kona poʻe kūpuna, a ua kanu lākou iā ia me kona poʻe kūpuna ma ke kula kahi e kanu ai no nā aliʻi; no ka mea, ʻōlelo lākou, “He lēpera ia”; a noho aliʻi ʻo Iotama kāna keiki ma kona hakahaka.