KA BUKE ʻALUA O KA ʻOIHANA ALIʻI 25 - Ka Baibala Hemolele

1 Hoʻomaka ʻo ʻAmazia e noho aliʻi me ka pono. 5 Hoʻolimalima ia i kekahi poʻe koa no kā ʻIseraʻela e kaua aku i kā ʻEdoma. 11 Lanakila ʻo ia ma luna o kā ʻEdoma. 14 Kona huli ʻana i ka hewa, a me kona make ʻana.

MOKUNA XXV.

¹ ¶ ʻO ʻAmazia, he iwakāluakumamālima makahiki ona i kona wā i aliʻi ai, a noho aliʻi ihola ia i nā makahiki he iwakāluakumamāiwa ma Ierusalema; a ʻo ka inoa o kona makuahine ʻo Iehoadama no Ierusalema.

² Hana ihola ia i ka mea maikaʻi i nā maka o Iēhova, ʻaʻole naʻe me ka naʻau maikaʻi.

³ A paʻa ia ma kona aupuni, pepehi ihola ia i kāna poʻe kauā nāna i pepehi i kona makua kāne, i ke aliʻi.

⁴ ʻAʻole ʻo ia i pepehi i kā lākou poʻe keiki; akā, hana ʻo ia e like me ka mea i kākau ʻia i loko o ke Kānāwai ma ka Buke a Mose, kahi a Iēhova i kauoha mai ai, ʻī maila, ʻAʻole e make nā mākua no nā keiki, ʻaʻole hoʻi e make nā keiki no nā mākua; akā, e make nō kēlā kanaka kēia kanaka no kona hewa iho.

⁵ ¶ A hoʻākoakoa ʻAmazia i kā Iuda, a hoʻonoho iā lākou ma ko ka hale o nā mākua, i poʻe luna no nā tausani, a i poʻe luna no nā haneri, no kā Iuda a pau, a me kā Beniamina; a helu ʻo ia iā lākou mai ka makahiki iwakālua aku, a loaʻa iā ia ʻekolu haneri tausani kānaka i wae ʻia, ka poʻe hiki ke hele i ke kaua, ka poʻe i mākaukau i ka ihe a me ka pale kaua.

⁶ A hoʻolimalima nō hoʻi ʻo ia no loko mai o kā ʻIseraʻela i hoʻokahi haneri tausani koa ikaika no nā tālena kālā hoʻokahi haneri.

⁷ A hele mai i ona lā ke kanaka o ke Akua, ʻī maila, “E ke aliʻi, ʻaʻole pono e hele pū me ʻoe ka poʻe koa o kā ʻIseraʻela; no ka mea, ʻaʻole ʻo Iēhova pū me kā ʻIseraʻela, me nā mamo a pau a ʻEperaima.

⁸ “Akā, inā e hele nō ʻoe, e hana nō pēlā, e ikaika hoʻi i ke kaua; akā, e ʻoupē mai ke Akua iā ʻoe i mua o ka ʻenemi; no ka mea, aia i ke Akua ka mana e kōkua mai ai, a e hoʻohina mai ai nō hoʻi.”

⁹ ʻŌlelo akula ʻo ʻAmazia i ke kanaka o ke Akua, “He aha kā mākou e hana ai no kēlā mau tālena hoʻokahi haneri aʻu i hāʻawi aku ai na ka poʻe koa o kā ʻIseraʻela?” ʻĪ maila ke kanaka o ke Akua, “E hiki nō iā Iēhova ke hāʻawi mai iā ʻoe a nui ʻē aku i kēia.”

¹⁰ A laila, hoʻokaʻawale aʻela ʻo ʻAmazia i ka poʻe koa i hele mai i ona lā, mai loko mai o ʻEperaima e hele i ko lākou wahi; a ua nui loa maila ko lākou huhū i kā Iuda, a hoʻi lākou i ko lākou wahi me ka huhū wela.

¹¹ ¶ A hoʻoikaika ihola ʻo ʻAmazia, a alakaʻi i kona poʻe kānaka, a hele akula i ke Awāwa Paʻakai, a luku ihola i ko Seira he ʻumi tausani.

¹² A lawe pio nā mamo a Iuda i nā kānaka he ʻumi tausani e ola ana, a lawe ʻia lākou ma kahi pali, a hoʻolei aku iā lākou i lalo mai luna aku o ka pali, a pau lākou i ka weluwelu.

¹³ A ʻo ka poʻe koa a ʻAmazia i hoʻihoʻi aku ai, i hele ʻole lākou me ia i ke kaua, hana ʻino lākou ma nā kūlanakauhale o Iuda mai Samaria a hiki i Bete Horona, a luku ihola lākou i ʻekolu tausani kānaka, a lawe aku i ka waiwai pio he nui loa.

¹⁴ ¶ A hoʻi mai ʻo ʻAmazia mai ka luku ʻana i kā ʻEdoma, hali mai ʻo ia i nā akua o ko Seira, a kūkulu aʻela ia mau mea i luna i akua nona, a kūlou ia i mua o lākou, a kuni i ka mea ʻala iā lākou.

¹⁵ A ua hōʻaʻā maila ka huhū o Iēhova iā ʻAmazia, a hoʻouna mai ʻo ia i ona lā i ke kāula, e ʻōlelo mai iā ia, “No ke aha lā ʻoe i ʻimi ai i nā akua o nā kānaka, nā mea i hiki ʻole ke hoʻopakele i ko lākou poʻe kānaka, mai kou lima aku?”

¹⁶ A i kāna ʻōlelo ʻana i ke aliʻi, ʻī mai kēlā iā ia, “Ua hoʻolilo ʻia anei ʻoe i kākāʻōlelo no ke aliʻi? Ua oki; no ke aha lā ʻoe e pepehi ʻia iho ai?” A laila, hoʻōki ihola ua kāula lā me ka ʻōlelo ʻana mai, “Ua ʻike au, ua paʻa ko ke Akua manaʻo e pepehi mai iā ʻoe; no ka mea, ua hana ʻoe i kēia, ʻaʻole i hoʻolohe mai ʻoe i kaʻu ʻōlelo.”

¹⁷ ¶ A kūkākūkā ihola ʻo ʻAmazia ke aliʻi o Iuda, a hoʻouna aku ʻo ia i o Ioasa lā ke keiki a Iehoahaza, ke keiki a Iehu, ke aliʻi o kā ʻIseraʻela, ʻī akula, “Inā kāua, e nānā kāua he maka nō he maka.”

¹⁸ Hoʻouna maila ʻo Ioasa ke aliʻi o kā ʻIseraʻela i o ʻAmazia lā, ke aliʻi o kā Iuda, ʻī maila, “Hoʻouna ke kākalaioa ma Lebanona i ka lāʻau kedera ma Lebanona, ʻī akula, ‘E hāʻawi mai ʻoe i kāu kaikamahine na kaʻu keiki i wahine nāna;’ a hele aʻela kekahi holoholona o ke kula ma Lebanona, a hehi ihola ma luna o ke kākalaioa.

¹⁹ “ʻŌlelo mai ʻoe, ‘Aia hoʻi ua luku au i kā ʻEdoma,’ a ua kiʻekiʻe kou naʻau me ke kaena ʻana. E noho mālie ʻoe ma ka hale; no ke aha lā ʻoe e hakakā mai ai, i pono ʻole ai ʻoe, a hāʻule ʻoe, ʻo ʻoe, a me kā Iuda a pau pū me ʻoe?”

²⁰ ʻAʻole i hoʻolohe ʻo ʻAmazia; no ka mea, na ke Akua mai ia, i hāʻawi ʻo ia iā lākou i loko o ka lima o kā lākou poʻe ʻenemi; no ka mea, ua ʻimi lākou i nā akua o kā ʻEdoma.

²¹ Pēlā i piʻi aku ai ʻo Ioasa ke aliʻi o kā ʻIseraʻela, a nānā lāua he maka nō he maka, ʻo ia a me ʻAmazia ke aliʻi o kā Iuda ma Bete Semesa, aia nō ma Iuda.

²² A ua luku ʻia kā Iuda i mua o kā ʻIseraʻela, a ʻauheʻe akula kēlā kanaka, kēia kanaka i kona halelewa.

²³ A lawe pio ʻo Ioasa ke aliʻi o kā ʻIseraʻala iā ʻAmazia ke aliʻi o kā Iuda, ke keiki a Ioasa, ke keiki a Iehoahaza ma Bete Semesa, a lawe iā ia i Ierusalema; a wāwahi ia i ka pā o Ierusalema mai ka Puka o ʻEperaima a i ka Puka o ke Kihi, ʻehā haneri kūbita.

²⁴ A lawe aku ia i ke gula a pau, a me ke kālā, a me nā kīʻaha a pau i loaʻa iā ia i loko o ka hale o ke Akua me ʻObeda-ʻEdoma, a me ka waiwai o ka hale o ke aliʻi, a me nā mea e paʻa ana me he poʻe pānaʻi lā, a hoʻi akula i Samaria.

²⁵ ¶ A ola ʻo ʻAmazia ke keiki a Ioasa, ke aliʻi o kā Iuda, ma hope o ka make ʻana o Ioasa, ke keiki a Iehoahaza ke aliʻi o kā ʻIseraʻela, he ʻumi a me kumamālima makahiki.

²⁶ A ʻo ke koena o nā hana a ʻAmazia, ka mua a me ka hope, ʻaʻole anei i kākau ʻia ai ia mau mea ma ka buke no nā aliʻi o kā Iuda, a me kā ʻIseraʻela?

²⁷ A mai ka wā mai o ko ʻAmazia huli ʻana aʻe mai Iēhova aku, ʻōhumu kūʻē ka poʻe ma Ierusalema iā ia, a mahuka akula ia i Lakisa; a hoʻouna lākou i Lakisa, a pepehi lākou iā ia ma laila.

²⁸ A hali mai lākou iā ia ma luna o nā lio, a kanu lākou iā ia me kona poʻe kūpuna ma ke kūlanakauhale o Iuda.