KA BUKE ʻALUA O KA ʻOIHANA ALIʻI 24 - Ka Baibala Hemolele

1 Hana pololei ke aliʻi o Ioasa i ka wā iā Iehoiada. 4 Kona hoʻoponopono ʻana i ka luakini o Iēhova. 17 Ka huli ʻana o ke aliʻi i ka hewa. 25 Ua pepehi ʻia ʻo ia e kāna poʻe kauā.

MOKUNA XXIV.

¹ ¶ ʻEhiku makahiki o Ioasa i kona wā i aliʻi ai, a noho aliʻi ihola ʻo ia i nā makahiki hoʻokahi kanahā ma Ierusalema; a ʻo ka inoa o kona makuahine ʻo Zibia no Beʻereseba.

² A hana pololei ʻo Ioasa i mua o Iēhova i nā lā a pau o Iehoiada ke kahuna.

³ A hāʻawi aku ʻo Iehoiada i mau wāhine ʻelua nāna, a hānau maila nāna he mau keiki kāne a he mau kaikamāhine.

⁴ ¶ Ma hope iho, komo ihola i loko o ka naʻau o Ioasa e hoʻomaikaʻi hou i ka hale o Iēhova.

⁵ Hoʻākoakoa aʻela ʻo ia i ka poʻe kāhuna, a me nā Levi, a ʻōlelo akula iā lākou, “E hele ʻoukou i nā kūlanakauhale o Iuda, a e hōʻuluʻulu i kahi kālā a kā ʻIseraʻela a pau i mea e hoʻomaikaʻi hou ai i ka hale o ko ʻoukou Akua, i kēlā makahiki kēia makahiki; e wikiwiki ʻoukou i kēia hana.” Akā, ʻaʻole i hana wawe nā Levi.

⁶ Kāhea akula ke aliʻi iā Iehoiada ka luna, a ʻōlelo akula iā ia, “No ke aha lā i hōʻeuʻeu ʻole aku ai ʻoe i nā Levi e lawe mai, mai loko mai o Iuda a me Ierusalema i ka ʻauhau a Mose ke kauā a Iēhova i kau aku ai ma luna o ka ʻaha kanaka o kā ʻIseraʻela, no ka halelewa o ke kānāwai?”

⁷ No ka mea, ʻo ʻAtalia, ua wahine ʻino lā, a ʻo kāna mau keiki kekahi, wāwahi ihola lākou i ka hale o ke Akua, a hoʻolilo lākou i nā mea laʻa a pau o ka hale o Iēhova na Baʻala.

⁸ ¶ ʻŌlelo ke aliʻi, a hana lākou i pahu, a waiho ihola ia mea ma waho ma ka puka o ka hale o Iēhova.

⁹ A kūkala akula lākou ma Iuda, a ma Ierusalema, “E lawe mai na Iēhova i ka ʻauhau a Mose, ke kauā a ke Akua i kau aku ai ma luna o kā ʻIseraʻela ma ka wao nahele.”

¹⁰ A hauʻoli ihola nā kaukaualiʻi a pau a me nā kānaka a pau, a lawe mai lākou, a hahao i loko o ka pahu, a hoʻopau aʻela.

¹¹ A i ka wā i lawe ʻia mai ai ka pahu i mua o nā luna o ke aliʻi e nā Levi, a ʻike lākou ua nui ke kālā, a laila hele mai ka luna kākau o ke aliʻi, a me ka luna o ke kahuna nui, a hoʻohuli lākou i ka pahu, a lawe aʻe ia mea, a hoʻihoʻi aku i kona wahi; pēlā lākou i hana ai i kēlā lā i kēia lā, a hōʻiliʻili lākou i ke kālā he nui loa.

¹² A ʻo ke aliʻi a me Iehoiada, hāʻawi lāua i kēia mea i ka poʻe iā lākou ka hana ma ka hale o Iēhova, a hoʻolimalima lākou i poʻe kālai pōhaku, a i ka poʻe kamanā, e hoʻomaikaʻi hou i ka hale o Iēhova, a i poʻe kuʻi hao a me ke keleawe, e hoʻopaʻa hou i ka hale o Iēhova.

¹³ A hana ihola ka poʻe paʻahana, a paʻa ia hana iā lākou, a kūkulu lākou i ka hale o ke Akua, e like me kona ʻano ma mua, hana hoʻi lākou a paʻa.

¹⁴ A paʻa ia hana, lawe mai lākou i mua o ke aliʻi a me Iehoiada i ke koena o ke kālā, a hana lākou i nā kīʻaha no ka hale o Iēhova, i nā kīʻaha e lawelawe ai, a e mōhai aku ai, a me nā puna a me nā kīʻaha gula a me ke kālā. A mōhai mau aku lākou i nā mōhai i loko o ka hale o Iēhova i nā lā a pau o Iehoiada.

¹⁵ ¶ A ʻelemakule ihola ʻo Iehoiada, a nui loa kona mau lā, a make ihola ia. Hoʻokahi haneri kona mau makahiki a me kanakolu, i kona make ʻana.

¹⁶ A kanu lākou iā ia i loko o ke kūlanakauhale o Dāvida me nā aliʻi; no ka mea, ua hana pono ia i loko o kā ʻIseraʻela, i ke Akua kekahi, a i kona hale iho nō hoʻi.

¹⁷ A ma hope o ka make ʻana o Iehoiada, hele mai nā kaukaualiʻi o Iuda, a kūlou i mua o ke aliʻi; a laila, hoʻolohe ke aliʻi iā lākou.

¹⁸ A haʻalele lākou i ka hale o Iēhova, ke Akua o ko lākou poʻe kūpuna, a hoʻokauā lākou na ʻAsetarota a me nā kiʻi; a hiki mai ka huhū ma luna o Iuda, a me Ierusalema no kēia hewa o lākou.

¹⁹ Hoʻouna mai nō naʻe ʻo ia i o lākou lā i nā kāula e hoʻohuli iā lākou iā Iēhova, a e aʻo pinepine iā lākou; akā, ʻaʻole lākou i hoʻolohe.

²⁰ A laila, kau maila ka ʻUhane o ke Akua ma luna o Zekaria, ke keiki a Iehoiada, ke kahuna, a kū aʻela ia i mua o kānaka, ʻōlelo maila iā lākou, “Penei i ʻōlelo mai ai ke Akua, ‘No ke aha lā ʻoukou i mālama ʻole ai i nā kānāwai o Iēhova, i pono ʻole ai ʻoukou? No ka mea, ua haʻalele ʻoukou iā Iēhova, a ua haʻalele nō hoʻi kēlā iā ʻoukou.’”

²¹ A laila, hui kūʻē lākou iā ia, hailuku lākou iā ia i ka pōhaku, ma muli o ke kauoha a ke aliʻi ma ka lānai o ka hale o Iēhova.

²² Pēlā i hoʻomanaʻo ʻole ai ʻo Ioasa, ke aliʻi, i ka lokomaikaʻi a Iehoiada a kona makua kāne i hana mai ai iā ia; akā, pepehi ia i kāna keiki; a i kona make ʻana, ʻī maila ia, “E nānā mai ʻo Iēhova, a e uku mai hoʻi!”

²³ ¶ A i ka pau ʻana o ka makahiki, piʻi kūʻē maila i ona lā ko Suria poʻe koa; a komo lākou i loko o Iuda, a me Ierusalema, a luku maila lākou i nā kaukaualiʻi o nā kānaka mai loko mai o ka poʻe kānaka, a hoʻouka akula i ka waiwai pio a pau o lākou i ke aliʻi ma Damaseko.

²⁴ No ka mea, he poʻe ʻuʻuku ko Suria poʻe i hele mai; akā, ua hāʻawi mai ʻo Iēhova i loko o ko lākou lima i ka poʻe nui loa; no ka mea, ua haʻalele lākou nei iā Iēhova ke Akua o ko lākou poʻe kūpuna. Pēlā lākou i hoʻopaʻi mai ai iā Ioasa.

²⁵ A i ko lākou hoʻi ʻana mai ona aku; (no ka mea, he maʻi nui kona i ko lākou haʻalele ʻana iā ia), hui kūʻē kāna poʻe kauwā iā ia, no ke koko o nā keiki a Iehoiada, ke kahuna, a pepehi lākou iā ia ma luna o kona wahi moe, a make ihola ia; a ua kanu lākou iā ia i loko o ke kūlanakauhale o Dāvida, ʻaʻole naʻe i kanu lākou iā ia i loko o ka ilina o nā aliʻi.

²⁶ Eia nā mea i hui kūʻē iā ia; ʻo Zabada, ke keiki a Simeata, a kekahi wahine ʻAmona, a ʻo Iehozabada ke keiki a Simerita, a kekahi wahine Moaba.

²⁷ A no kāna poʻe keiki, a me nā mea nui i kau ʻia ma luna ona, a no ka hoʻomaikaʻi hou ʻana i ka hale o ke Akua, aia hoʻi, ua kākau ʻia ia mau mea ma ka palapala o ka buke no nā aliʻi. A noho aliʻi ihola ʻo ʻAmazia kāna keiki ma hope ona.