KA BUKE ʻALUA O KA ʻOIHANA ALIʻI 23 - Ka Baibala Hemolele

1 Ua hoʻoaliʻi ʻo Iehoiada a me kānaka iā Ioasa. 12 Ka make ʻana o ʻAtalia i ka pepehi ʻia. 16 Hoʻohuli ʻo Iehoiada i kānaka e hoʻomana i ke Akua.

MOKUNA XXIII.

¹ ¶ A i ka hiku o ka makahiki hoʻoikaika ihola ʻo Iehoiada, a lawe pū aʻela me ia ma ka berita i nā luna haneri, iā ʻAzaria ke keiki a Iehorama, a me ʻIsemaʻela ke keiki a Iehohanana, a me ʻAzaria ke keiki a ʻObeda, a me Maʻaseia ke keiki a ʻAdaia, a me ʻElisapata ke keiki a Zikeri.

² A kaʻahele aʻela lākou ma Iuda a hoʻākoakoa lākou i nā Levi mai loko mai o nā kūlanakauhale a pau o Iuda, a me ka poʻe koʻikoʻi o nā mākua o kā ʻIseraʻela, a hele maila lākou i Ierusalema.

³ A hana nā kānaka a pau i berita me ke aliʻi i loko o ka hale o ke Akua. ʻŌlelo akula ʻo ia iā lākou, “Aia hoʻi, e noho aliʻi auaneʻi ke keiki a ke aliʻi e like me ka ʻōlelo a Iēhova i ʻōlelo mai ai no nā keiki a Dāvida.

⁴ “Eia ka mea a ʻoukou e hana ai: ʻO kekahi hapakolu o ʻoukou e komo ana i ka lā Sābati, ʻo ka poʻe kāhuna, a me nā Levi, e lilo lākou i poʻe kiaʻi puka.

⁵ “A e noho kekahi hapakolu o ʻoukou i loko o ka hale o ke aliʻi; ʻo kekahi hapakolu hoʻi o ʻoukou ma ka Puka o ke Kahua; a ʻo nā kanaka a pau loa i loko o ka lānai o ka hale o Iēhova.

⁶ “Mai komo kekahi o ʻoukou i loko o ka hale o Iēhova, ka poʻe kāhuna wale nō a me nā Levi e lawelawe ana; e komo lākou; no ka mea, ua hoʻolaʻa ʻia lākou; akā, ʻo nā kānaka a pau e kiaʻi lākou ma kahi a Iēhova i kauoha mai ai.

⁷ “A e kū nā Levi a puni ke aliʻi, kēlā kanaka kēia kanaka me kona mea kaua i loko o kona lima; a ʻo ka mea e komo e make ʻo ia; akā, ʻo ʻoukou, me ke aliʻi o ʻoukou i kona komo ʻana i loko a i kona puka ʻana i waho.”

⁸ A hana ihola nā Levi, a me kā Iuda a pau loa e like me nā mea a pau a Iehoiada ke kahuna i kauoha mai ai; a lawe lākou kēlā mea kēia mea i kona poʻe kānaka i ka poʻe i komo mai i ka lā Sābati, a me ka poʻe i hele i waho i ka lā Sābati; no ka mea, ʻaʻole hoʻokuʻu ʻo Iehoiada ke kahuna i nā papa.

⁹ Hāʻawi akula hoʻi ʻo Iehoiada ke kahuna na nā luna haneri i nā ihe, a me nā ʻaʻahu a poʻo, a me nā pale kaua, nā mea a Dāvida ke aliʻi, nā mea hoʻi i loko o ka hale o ke Akua.

¹⁰ A hoʻonoho ʻo ia i nā kānaka a pau loa, ʻo kēlā kanaka kēia kanaka me kāna mea kaua ma kona lima, mai ka ʻaoʻao ʻākau o ka hale a hiki i ka ʻaoʻao hema o ka hale, ma kahi kokoke i ke kuahu a me ka hale a puni ke aliʻi.

¹¹ A alakaʻi maila lākou i waho i ke keiki a ke aliʻi, a hāʻawi aku iā ia i ka pāpale aliʻi a me ke kānāwai, a hoʻoaliʻi ihola iā ia; a poni akula ʻo Iehoiada, a me kāna poʻe keiki iā ia, a ʻōlelo akula lākou, “E ola ke aliʻi!”

¹² ¶ A lohe ʻo ʻAtalia i ka halulu o kānaka e mokuāwai ana, a e hoʻomaikaʻi ana i ke aliʻi, hele maila ʻo ia i nā kānaka i loko o ka hale o Iēhova.

¹³ A ʻike aʻela ʻo ia, aia hoʻi, ke aliʻi e kū ana ma kona wahi ma kahi e komo ai, a me ke aliʻi nā luna a me ka poʻe hoʻokani, a me nā kānaka a pau o ka ʻāina e ʻoliʻoli ana, a e hoʻokani ana i nā pū, a me ka poʻe mele, me kā lākou mau mea kani, a me ka poʻe e aʻo ana e hoʻoleʻa aku; haehae ihola ʻo ʻAtalia i kona kapa, ʻōlelo akula, “He kipi ē, he kipi ē!”

¹⁴ A ʻo Iehoiada ke kahuna, alakaʻi aʻela ia i waho i nā luna o nā haneri, a me ka poʻe luna koa, ʻōlelo aku iā lākou, “E hoʻopuka aku iā ia i waho o nā keʻena o ka hale; a ʻo ka mea e puka i waho ma muli ona e make ia i ka pahi kaua”; no ka mea, ʻōlelo ihola ke kahuna, “Mai pepehi iā ia ma ka hale o Iēhova.”

¹⁵ Kau akula lākou i ko lākou mau lima ma luna ona; a hiki ia i kahi e komo ai i loko o ka Puka Lio ma ka hale o ke aliʻi, pepehi lākou iā ia ma laila.

¹⁶ ¶ A hana ʻo Iehoiada i berita ma waena ona, a ma waena o nā kānaka a pau, a ma waena o ke aliʻi, i lilo lākou i poʻe kānaka no Iēhova.

¹⁷ A laila, hele aʻela nā kānaka a pau i ka hale o Baʻala, a wāwahi ihola ia mea, a me kona kuahu, a kuʻi palu nō hoʻi lākou i nā kiʻi, a pepehi lākou iā Matana ke kahuna no Baʻala i mua o nā kuahu.

¹⁸ A laila, hoʻonoho ʻo Iehoiada i nā kiaʻi ma ka hale o Iēhova, ma ka lima o ka poʻe kāhuna, kā Levi, ka poʻe a Dāvida i mahele aku ai no ka hale o Iēhova, e mōhai aku i nā mōhai o Iēhova e like me ka mea i kākau ʻia i loko o ke Kānāwai o Mose, me ka ʻoliʻoli ʻana, a me ke mele, ma ka lima o Dāvida.

¹⁹ Hoʻonoho ihola ia i ka poʻe kiaʻi ma nā puka o ka hale o Iēhova, i komo ʻole kekahi i haumia ma kekahi mea.

²⁰ A lawe aʻela ʻo ia i nā luna haneri, a me nā kaukaualiʻi, a me nā luna o nā kānaka, a me nā kānaka a pau o ka ʻāina, a alakaʻi aʻela lākou i ke aliʻi i lalo mai ka hale o Iēhova mai; a komo lākou i loko ma ka Puka Kiʻekiʻe, a i ka hale o ke aliʻi, a hoʻonoho lākou i ke aliʻi ma luna o ka noho aliʻi o ke aupuni.

²¹ A hauʻoli nā kānaka a pau o ka ʻāina; a ua maluhia ke kūlanakauhale ma hope o ko lākou pepehi ʻana iā ʻAtalia me ka pahi kaua.