KA BUKE ʻALUA O KA ʻOIHANA ALIʻI 20 - Ka Baibala Hemolele

1 Kūʻē mai ka Moaba iā Iehosapata. 5 Kāna pule. 22 Kona lanakila ʻana ma luna o lākou. 31 Kona noho aliʻi ʻana, a me kona make ʻana.

MOKUNA XX.

¹ ¶ A ma hope iho o kēia mau mea, hiki maila kā Moaba, a me kā ʻAmona, a me lākou pū kekahi poʻe ʻē aʻe, ʻaʻole no kā ʻAmona, e kaua mai iā Iehosapata.

² Hele maila kekahi poʻe a haʻi mai iā Iehosapata, ʻī maila, “E hiki mai ana i ou lā he poʻe nui, mai kēlā ʻaoʻao mai o ke kai mai Suria mai; aia hoʻi lākou ma Hazezona Tamara, ʻo ia ʻo ʻEne Gedi.”

³ A makaʻu ihola ʻo Iehosapata, a hālalo ihola kona maka e ʻimi iā Iēhova, a kūkala akula i lā hoʻokē ʻai ma Iuda a pau loa.

⁴ A hoʻākoakoa maila kā Iuda e ʻimi iā Iēhova; no loko mai o nā kūlanakauhale a pau o Iuda i hele mai ai lākou e ʻimi iā Iēhova.

⁵ ¶ A laila, kū i luna ʻo Iehosapata i loko o ka ʻaha kanaka o Iuda a me Ierusalema, i loko o ka hale o Iēhova i mua o ka pā hale hou;

⁶ ʻŌlelo akula, “E Iēhova ke Akua o ko mākou poʻe kūpuna, ʻaʻole anei ʻoe ke Akua o ka lani? ʻAʻole anei ʻoe e noho aliʻi ana ma luna o nā aupuni a pau o nā lāhui kanaka, a i loko hoʻi o kou lima ka mana, a me ka ikaika, i hiki ʻole i kekahi ke kūʻē iā ʻoe?

⁷ “ʻAʻole anei ʻoe ko mākou Akua, ka mea nāna i kipaku i ko kēia ʻāina i mua o kou poʻe kānaka o kā ʻIseraʻela, a hāʻawi ia mea i ka poʻe mamo a ʻAberahama kou mea i aloha ai, i mea mau loa.

⁸ “A noho lākou ma laila, a kūkulu lākou no kou inoa i luakini, me ka ʻī ʻana aku,

⁹ ‘I ka hiki ʻana mai o ka mea ʻino ma luna o mākou, ʻo ka pahi kaua, ʻo ka hoʻopaʻi ʻia mai, ʻo ke ahulau, a ʻo ka wī, a kū mākou i mua o kēia hale, a i mua ou; (no ka mea, aia i loko o kēia hale kou inoa,) a kāhea aku iā ʻoe i ko mākou wā pilikia, a laila e hoʻolohe mai ʻoe, a e hoʻōla.’

¹⁰ “ʻĀnō, eia hoʻi kā ʻAmona, a me kā Moaba, a me ko ka mauna ʻo Seira, ka poʻe āu i hāʻawi ʻole ai i kā ʻIseraʻela e hele i o lākou lā, i ko lākou hele ʻana mai ka ʻāina ʻo ʻAigupita mai, no ia mea, huli lākou mai o lākou aku, ʻaʻole i luku iā lākou.

¹¹ “Eia hoʻi ko lākou uku ʻana mai iā mākou, hele mai lākou e kipaku mai iā mākou mai ko mākou ʻāina hoʻoili aku, ka mea āu i hāʻawi mai ai iā mākou.

¹² “E ko mākou Akua ē, ʻaʻole anei ʻoe e hoʻopaʻi iā lākou? No ka mea, ʻaʻole o mākou mana i mua o kēia poʻe nui, ka poʻe i hele kūʻē mai iā mākou; ʻaʻole mākou i ʻike i ka mea e pono ai mākou ke hana; akā, iā ʻoe ko mākou mau maka.”

¹³ A kū i mua o Iēhova kā Iuda a pau loa, me ko lākou poʻe ʻuʻuku, a me kā lākou poʻe wāhine, a me kā lākou poʻe kamaliʻi.

¹⁴ ¶ A laila, i ke kū ʻana o Iahaziʻela i waena o ka ʻaha kanaka, kau maila ka ʻUhane o Iēhova ma luna ona, ʻo ia ke keiki a Zekaria, ke keiki a Benaia, ke keiki a Matanaia ka Levi, no ka poʻe mamo a ʻAsapa.

¹⁵ ʻŌlelo maila ʻo ia, “E hoʻolohe ʻoukou, e kā Iuda a pau, a me ko Ierusalema, a ʻo ʻoe kekahi, e ke aliʻi, e Iehosapata, penei i ʻōlelo mai ai ʻo Iēhova, ‘Mai makaʻu ʻoukou, ʻaʻole hopohopo i mua o kēia poʻe nui; no ka mea, ʻaʻole iā ʻoukou ke kaua, i ke Akua nō.

¹⁶ ‘I ka lā ʻapōpō e iho kūʻē ʻoukou i o lākou lā, aia hoʻi lākou e piʻi mai ana i ka pali ʻo Ziza; a e loaʻa lākou iā ʻoukou ma ke kapa o ke kahawai i mua o ka wao nahele ʻo Ieruʻela.

¹⁷ ‘ʻAʻole ʻoukou e kaua i kēia manawa, e hoʻomākaukau ʻoukou, e kū mālie, a e nānā i ko Iēhova hoʻōla ʻana mai iā ʻoukou, e kā Iuda, a me ko Ierusalema;’ mai makaʻu ʻoukou, mai hopohopo; i ka lā ʻapōpō, e hele kūʻē aku ʻoukou i o lākou lā. ʻO Iēhova pū kekahi me ʻoukou.”

¹⁸ A laila, kūlou ihola ʻo Iehosapata i lalo kona maka i ka honua; a ʻo kā Iuda a pau, a me ko Ierusalema, hāʻule ihola lākou i lalo i mua o Iēhova, e hoʻomana aku iā Iēhova.

¹⁹ Kū i luna nā Levi, no nā Kohata, a me nā Kora, e hoʻoleʻa aku iā Iēhova ke Akua o kā ʻIseraʻela me ka leo kiʻekiʻe.

²⁰ ¶ Ala lākou i ke kakahiaka nui, a hele lākou i ka wao nahele ʻo Tekoa; a i ko lākou hele ʻana aku, kū i luna ʻo Iehosapata, ʻōlelo akula, “E hoʻolohe mai iaʻu, e kā Iuda, a me ko Ierusalema; e manaʻoʻiʻo iā Iēhova i ko ʻoukou Akua, i hoʻokūpaʻa ʻia ʻoukou; e manaʻoʻiʻo i kāna poʻe kāula, i lanakila ʻoukou.”

²¹ A kūkākūkā pū ʻo ia me nā kānaka, a hoʻonoho ʻo ia i kekahi poʻe hoʻoleʻa mele iā Iēhova e hoʻomaikaʻi aku i ka nani o kona hemolele, i ko lākou hele ʻana i mua o ka poʻe kaua, i ka ʻī ʻana aku, “E hoʻoleʻa aku iā Iēhova; No ka mea, ua mau loa kona aloha.”

²² A i ka wā o ko lākou hoʻoleʻa ʻana, a hoʻomaikaʻi aku, hoʻonoho ihola ʻo Iēhova i poʻe hoʻohālua ma hope o nā mamo a ʻAmona, a me Moaba, a me ko ka mauna ʻo Seira, i ko lākou hele kūʻē ʻana iā Iuda; a ua luku ʻia lākou.

²³ ʻO ka poʻe mamo a ʻAmona a me kā Moaba, kūʻē lākou i ko ka mauna ʻo Seira, a luku, a pepehi iā lākou a pau loa, a hoʻopau lākou i ko Seira; a laila, mokuāhana ihola lākou, a pepehi lākou i kekahi i kekahi.

²⁴ ¶ A hiki kā Iuda i ka hale kiaʻi ma ka wao nahele, nānā akula i ka lehulehu, aia hoʻi, nā heana o ka poʻe i hāʻule i ka honua, ʻaʻole wahi mea pakele.

²⁵ A hiki ʻo Iehosapata a me kona poʻe kānaka e lawe aku i ka waiwai pio, ua loaʻa iā lākou ka waiwai nui loa ma ka ʻili o nā heana, a me nā mea maikaʻi loa, a ua hao ihola lākou ia mau mea no lākou iho, ʻaʻole pau i ka hali ʻia; a ʻekolu lā o ko lākou hali ʻana i ka waiwai pio; no ka mea, ua nui loa ia.

²⁶ A i ka pō ʻahā, hoʻākoakoa ʻia lākou ma ke awāwa ʻo Beraka; no ka mea, ma laila lākou i hoʻomaikaʻi aku ai iā Iēhova; no ia mea, ua kapa ʻia ka inoa o ia wahi, ʻo ke awāwa ʻo Beraka a hiki i kēia lā.

²⁷ A laila, hoʻi kā Iuda a pau a me ko Ierusalema, a ʻo Iehosapata ka mea ma mua, i ka hoʻi ʻana i Ierusalema, me ka ʻoliʻoli; no ka mea, ua hoʻohauʻoli ʻo Iēhova iā lākou ma luna o ko lākou poʻe ʻenemi.

²⁸ A hoʻi mai lākou i Ierusalema me nā mea kani, a me nā mea ʻūkēkē, a me nā pū, i ka hale o Iēhova.

²⁹ A kau mai ka weliweli i ke Akua ma luna o nā aupuni o ka honua, i ko lākou lohe ʻana, ua kaua aku ʻo Iēhova i ka poʻe ʻenemi o kā ʻIseraʻela.

³⁰ A ua maluhia ke aupuni o Iehosapata, a ua hoʻomalu mai kona Akua iā ia a puni.

³¹ ¶ A noho aliʻi ʻo Iehosapata ma luna o kā Iuda. He kanakolukumamālima makahiki kona i kona hoʻomaka ʻana e noho aliʻi, a noho aliʻi ia i nā makahiki he iwakāluakumamālima, a ʻo ka inoa o kona makuahine, ʻo ʻAzuba, ke kaikamahine a Silehi.

³² A hele ia ma ka ʻaoʻao o kona makua kāne ʻo ʻAsa, ʻaʻole i huli mai ia ʻaoʻao aku; ua hana ʻo ia i nā mea pololei i nā maka o Iēhova.

³³ Akā, ʻaʻole i hoʻohiolo ʻia nā wahi kiʻekiʻe; ʻaʻole hoʻomākaukau nā kānaka i ko lākou mau naʻau no ke Akua o ko lākou poʻe kūpuna.

³⁴ A ʻo ke koena o nā hana a Iehosapata, nā mea mua, a me nā mea hope, aia hoʻi, ua kākau ʻia i loko o ka buke a Iehu ke keiki a Henani, ka mea i ʻōlelo ʻia ai i loko o ka buke o nā aliʻi o kā ʻIseraʻela.

³⁵ ¶ A ma hope aku, hui pū ʻo Iehosapata ke aliʻi o Iuda me ʻAhazia, ke aliʻi o kā ʻIseraʻela, ka mea i hana hewa.

³⁶ Hui pū ʻo ia me ia e hana i mau moku e holo i Taresa. A hana nō lāua i mau moku ma ʻEziona Gebera.

³⁷ A laila, wānana maila ʻo ʻEliezera ke keiki a Dodava no Maresa, iā Iehosapata, ʻī maila, “I kou hui pū ʻana me ʻAhazia, e wāwahi auaneʻi ʻo Iēhova i ka mea āu i hana ai.” A nahā ihola nā moku, ʻaʻole i hiki iā lākou ke holo i Taresa.