KA BUKE ʻALUA O KA ʻOIHANA ALIʻI 18 - Ka Baibala Hemolele

1 Hele pū ʻo Iehosapata me ʻAhaba i Ramota Gileada i ke kaua. 5 No ka poʻe kāula wahaheʻe. 33 Ka make ʻana o ʻAhaba.

MOKUNA XVIII.

¹ ¶ Aia iā Iehosapata ka waiwai, a me ka hanohano he nui loa, a kuʻikahi pū aʻela ia me ʻAhaba.

² A pau aʻela kekahi mau makahiki, iho ihola ʻo ia i lalo i o ʻAhaba lā ma Samaria: a pepehi ihola ʻo ʻAhaba nāna, a na nā kānaka me ia i nā hipa, a me nā bipi he nui loa, a noi ikaika mai iā ia e piʻi pū me ia i Ramota Gileada.

³ ʻŌlelo maila ʻo ʻAhaba ke aliʻi o kā ʻIseraʻela iā Iehosapata i ke aliʻi o kā Iuda, “ʻAʻole anei ʻoe e hele pū me aʻu i Ramota Gileada?” ʻĪ akula kēlā, “E like me ʻoe, pēlā nō au, e like me kou poʻe kānaka, pēlā koʻu poʻe kānaka, ʻo kākou pū ma ke kaua.”

⁴ ¶ ʻĪ akula ʻo Iehosapata i ke aliʻi o kā ʻIseraʻela, “E nīnau ʻoe i ka ʻōlelo a Iēhova i kēia lā.”

⁵ A laila hōʻuluʻulu aʻela ke aliʻi o kā ʻIseraʻela i nā kāula ʻehā haneri kānaka, a ʻōlelo akula iā lākou, “E hele anei mākou i Ramota Gileada i ke kaua? A e oki paha?” ʻĪ maila lākou iā ia, “Ō piʻi, a na ke Akua ia e hāʻawi mai i loko o ka lima o ke aliʻi.”

⁶ ʻŌlelo akula ʻo Iehosapata, “ʻAʻole anei he kāula ʻē aʻe o Iēhova ma ʻaneʻi i nīnau kākou iā ia?”

⁷ ʻĪ maila ke aliʻi o kā ʻIseraʻela iā Iehosapata, “Eia nō kekahi kanaka i koe ma ona lā e ʻimi ai iā Iēhova, ʻo Mikaia kona inoa, ke keiki a ʻImela; akā, he inaina koʻu iā ia; no ka mea, ʻaʻole i wānana mai ia noʻu i ka pōmaikaʻi; akā, i ka pōʻino wale nō i kona mau lā a pau.” ʻĪ akula ʻo Iehosapata, “Mai ʻōlelo ke aliʻi pēlā!”

⁸ Kāhea akula ke aliʻi o kā ʻIseraʻela i kekahi o nā luna haku, “E kiʻi koke ʻoe iā Mikaia ke keiki a ʻImela!”

⁹ A noho ihola ke aliʻi o kā ʻIseraʻela a me Iehosapata ke aliʻi o kā Iuda, kēlā mea kēia mea ma luna o kona noho aliʻi, ua ʻaʻahu lāua i ko lāua ʻaʻahu aliʻi, a noho lāua ma kahi ākea ma ka puka kahi e komo ai i loko o Samaria; a wānana ihola nā kāula a pau i mua o lāua.

¹⁰ A ʻo Zedakia ke keiki a Kenaʻana, hana ihola ia nona i mau kiwi hao, a ʻōlelo maila, “Penei i ʻōlelo mai ai ʻo Iēhova, ʻMe kēia mau mea ʻoe e pahu aku ai i ko Suria, a pau lākou.’”

¹¹ A wānana aʻela ka poʻe kāula a pau loa pēlā, ʻī maila, “E piʻi i Ramota Gileada, a lanakila; ua hāʻawi mai ʻo Iēhova ia wahi i loko o ka lima o ke aliʻi.”

¹² ¶ A ʻo ka ʻelele, ka mea i hele aʻe e kiʻi aku iā Mikaia, ʻōlelo akula ʻo ia iā ia, ʻī akula, “Aia hoʻi, ʻo nā ʻōlelo a pau a nā kāula e wānana ai, hoʻokahi wale nō ia, ʻo ka pōmaikaʻi no ke aliʻi; i hoʻokahi hoʻi kāu ʻōlelo me kā lākou, e ʻōlelo ʻoe ma ka pōmaikaʻi.”

¹³ ʻĪ maila ʻo Mikaia, “Ma ke ola o Iēhova, ʻo nā mea a koʻu Akua i ʻōlelo mai ai, ʻo ia kaʻu e ʻōlelo aku ai.”

¹⁴ A hiki ia i ke aliʻi, ʻōlelo ke aliʻi iā ia, “E Mikaia, e piʻi anei mākou i Ramota Gileada, i ke kaua? A e oki paha?” ʻĪ mai kēlā, “E piʻi, e pōmaikaʻi, a e hāʻawi ʻia ua poʻe lā i loko o ko ʻolua lima!”

¹⁵ ʻŌlelo akula ke aliʻi iā ia, “ʻEhia lā kaʻu mau kauoha hoʻohiki aku iā ʻoe, i ʻole ʻoe e ʻōlelo mai iaʻu i ka mea ʻē, i ka mea ʻoiaʻiʻo wale nō, ma ka inoa ʻo Iēhova?”

¹⁶ ʻĪ maila kēlā, “Ua ʻike au i kā ʻIseraʻela a pau E ʻauana ana ma nā mauna E like me nā hipa kahu ʻole; ʻŌlelo mai ʻo Iēhova, ‘ʻAʻole o lākou haku, E hoʻi kēlā kanaka kēia kanaka i kona hale iho me ka maluhia.’”

¹⁷ ʻĪ akula ke aliʻi o kā ʻIseraʻela iā Iehosapata, “ʻAʻole anei au i ʻōlelo aku iā ʻoe, ʻaʻole wānana mai kēlā noʻu i ka pōmaikaʻi; akā, i ka pōʻino wale nō?”

¹⁸ ʻĪ maila ke kāula, “No ia mea, e hoʻolohe mai ʻoe i ka ʻōlelo a Iēhova; ua ʻike au iā Iēhova e noho ana ma luna o kona noho aliʻi, a ʻo ka poʻe koa a pau o nā lani e kū ana ma kona lima ʻākau, a me kona lima hema.

¹⁹ “ʻŌlelo aʻela ʻo Iēhova, ‘ʻO wai lā ka mea e hoʻowalewale iā ʻAhaba ke aliʻi o kā ʻIseraʻela i piʻi aku ʻo ia a make ma Ramota Gileada?’ ʻŌlelo aʻela kekahi pēnēia, a ʻo kekahi hoʻi pēnēia.

²⁰ “A laila, hiki mai kekahi ʻuhane, a kū aʻela i mua o Iēhova, a ʻōlelo akula ia, ‘ʻO wau ke hoʻowalewale iā ia.’ ʻĪ aʻela ʻo Iēhova, ‘Pehea?’

²¹ “ʻĪ akula kēlā, ‘E hele au a e lilo au i ʻuhane wahaheʻe i loko o nā waha o kona poʻe kāula a pau.’ ʻĪ aʻela ʻo Iēhova, ‘E hoʻowalewale ʻoe, a e lanakila hoʻi; e hele ʻoe a hana nō pēlā.’

²² “ʻĀnō hoʻi, ua hāʻawi mai ʻo Iēhova i ka ʻuhane wahaheʻe i loko o ka waha o kēia poʻe kāula āu, a ʻo Iēhova hoʻi ua ʻōlelo mai ʻo ia nāu i ka pōʻino.”

²³ ¶ A laila, hoʻokokoke ʻo Zedakia ke keiki a Kenaʻana, a kuʻi mai iā Mikaia ma ka pāpālina, me ka ʻī ʻana mai, “Ma ka ʻaoʻao hea i hele ai ka ʻuhane o Iēhova mai oʻu aku nei e ʻōlelo aku iā ʻoe?”

²⁴ ʻĪ akula ʻo Mikaia, “E ʻike auaneʻi ʻoe, i ka lā e komo ai ʻoe i loko o ke keʻena i loko, e peʻe iho!”

²⁵ ʻŌlelo akula ke aliʻi o kā ʻIseraʻela, “E lawe ʻoukou iā Mikaia, a e hoʻihoʻi iā ia i o ʻAmona lā i ka luna i loko o ke kūlanakauhale, a iā Ioasa ke keiki a ke aliʻi.

²⁶ “E ʻōlelo aku iā lāua penei, ‘Ua ʻī maila ke aliʻi, “E hoʻokomo i kēia kanaka i loko o ka hale paʻahao, a e hānai iā ia i ka berena o ka pilikia a me ka wai o ka pilikia, a hoʻi mai au me ka maluhia.”’”

²⁷ ʻĪ akula ʻo Mikaia, “Inā e hoʻi ʻiʻo mai ʻoe me ka maluhia, ʻaʻole ʻo Iēhova i ʻōlelo mai ma oʻu nei.” ʻŌlelo akula ia, “E hoʻolohe ʻoukou, e nā kānaka a pau!”

²⁸ ¶ A laila piʻi akula ke aliʻi o kā ʻIseraʻela, a me Iehosapata, ke aliʻi o kā Iuda, i Ramota Gileada.

²⁹ ʻŌlelo maila ke aliʻi o kā ʻIseraʻela iā Iehosapata, “E hūnā au iaʻu iho, a e komo i loko o ke kaua; akā, e komo ʻoe i kou kapa aliʻi.” A hūnā iho ke aliʻi o kā ʻIseraʻela iā ia iho, a komo i loko o ke kaua.

³⁰ Ua kauoha ke aliʻi o Suria i nā luna o kona mau hale kaʻa, ʻī akula, “Mai kaua aku i kekahi mea ʻuʻuku, ʻaʻole i kekahi mea nui, i ke aliʻi o kā ʻIseraʻela wale nō.”

³¹ A ʻike mai nā luna o nā hale kaʻa iā Iehosapata, ʻī ihola lākou, “ʻO ke aliʻi ia o kā ʻIseraʻela”; a puana maila lākou iā ia a puni e kaua mai iā ia; akā, kāhea akula ʻo Iehosapata, a kōkua mai ʻo Iēhova iā ia, a hoʻohuli aʻela ke Akua iā lākou mai ona aku.

³² ʻIke maila nā luna o nā hale kaʻa, ʻaʻole ke aliʻi ia o kā ʻIseraʻela, huli aʻela lākou mai ona aku lā.

³³ A pana wale maila kekahi kanaka me kāna kakaka, a kū i ke aliʻi o kā ʻIseraʻela ma kahi ʻami o kona pale umauma; a ʻōlelo ʻo ia i ka mea nāna e mālama i kona hale kaʻa, “E huli aʻe kou lima, a e lawe iaʻu mai ke kaua aku; no ka mea, ua ʻeha au.”

³⁴ Māhuahua aʻela ke kaua ia lā; akā, noho ihola ke aliʻi o kā ʻIseraʻela i loko o kona hale kaʻa, e kūʻē i ko Suria, a ahiahi; a i ka napoʻo ʻana o ka lā, make ihola ia.