KA BUKE ʻALUA O KA ʻOIHANA ALIʻI 17 - Ka Baibala Hemolele

1 Ka pono o ko Iehosapata noho aliʻi ʻana. 5 Ua hoʻopōmaikaʻi ʻia mai ʻo ia e kona Akua. 7 Kona hoʻouna ʻana i kekahi poʻe o kā Levi e aʻo aku i kānaka o Iuda. 12 Kona nui a me kona mau luna a me kona poʻe koa.

MOKUNA XVII.

¹ ¶ Noho aliʻi ihola ʻo Iehosapata kāna keiki ma hope ona. A hoʻoikaika kūʻē akula ʻo ia i kā ʻIseraʻela.

² Hoʻonoho ʻo ia i ka poʻe koa i loko o nā kūlanakauhale a pau o Iuda i paʻa i ka pā, a hoʻonoho hoʻi i nā pūʻali koa ma ka ʻāina ʻo Iuda, a me nā kūlanakauhale o ʻEperaima, a ʻAsa kona makua kāne i hoʻopio ai.

³ Aia pū ʻo Iēhova me Iehosapata; no ka mea, hele ʻo ia ma nā ʻaoʻao mua o Dāvida ʻo kona kupuna, ʻaʻole hoʻi i ʻimi ʻo ia iā Baʻala.

⁴ Akā, ʻimi akula ʻo ia i ke Akua o kona makua kāne; a hele ma kona kānāwai, ʻaʻole e like me kā kā ʻIseraʻela hana ʻana.

⁵ No laila hoʻokūpaʻa ihola ʻo Iēhova i ke aupuni ma kona lima; a hāʻawi kā Iuda a pau i nā makana na Iehosapata; a ua nui kona waiwai, a me ka hanohano.

⁶ A ua ikaika kona naʻau ma nā ʻaoʻao o Iēhova; a wāwahi ihola ia i nā wahi kiʻekiʻe, a me nā kiʻi no ʻAsetarota ma Iuda.

⁷ ¶ A i ka makahiki ʻekolu o kona aupuni, hoʻouna akula ʻo ia i nā luna ona, iā Bene-Haila, a me ʻObadia, a me Zekaria, a me Nataneʻela, a me Mikaia, e aʻo aku i loko o nā kūlanakauhale o Iuda.

⁸ A me lākou pū kekahi poʻe Levi, ʻo Semaia, a me Netanaia, a me Zebadaia, a me ʻAsahela, a me Semiramota, a me Iehonatana, a me ʻAdoniia, a me Tobiia, a me Tobaʻadoniia, ʻo nā Levi ia; a me lākou pū ʻo ʻElisama a me Iehorama, nā kāhuna.

⁹ A aʻo aku lākou ma Iuda, a lawe pū me lākou i ka Buke o ke Kānāwai o Iēhova, a hele lākou a puni nā kūlanakauhale a pau o Iuda, a aʻo aku i nā kānaka.

¹⁰ ¶ Aia ma luna o nā aupuni a pau o nā ʻāina a puni ʻo Iuda ka ʻeʻehia iā Iēhova, ʻaʻole hoʻi i kaua mai lākou me Iehosapata.

¹¹ A ʻo kekahi poʻe o Pilisetia, lawe maila lākou i o Iehosapata lā i nā makana, a me ke kālā hoʻokupu; a ʻo ko ʻArabia nō hoʻi kekahi, lawe maila lākou iā ia i poʻe holoholona, i nā hipa kāne ʻehiku tausani, a me nā haneri ʻehiku, a i nā kao kāne ʻehiku tausani a me nā haneri ʻehiku.

¹² A lilo ihola ʻo Iehosapata i mea nui loa, a kūkulu ihola ia i mau pāpū ma Iuda, a i mau kūlanakauhale waiho ukana.

¹³ A nui kāna hana ma nā kūlanakauhale o Iuda, a nui hoʻi nā kānaka kaua, ka poʻe ikaika ma Ierusalema.

¹⁴ Eia ka helu ʻana o lākou ma ka hale o ko lākou poʻe kūpuna. No ka hale o Iuda, ʻo nā luna tausani; ʻo ʻAdena ka luna, a ʻo ka poʻe koa ikaika me ia, ʻekolu haneri tausani.

¹⁵ A ma hope ona, ʻo Iehohanana, ka luna, a ʻo ka poʻe me ia, ʻelua haneri a me kanawalu tausani.

¹⁶ A ma hope ona, ʻo ʻAmazia, ke keiki a Zikeri, ka mea hoʻokauā ʻoluʻolu na Iēhova; a ʻo ka poʻe kānaka ikaika me ia, ʻelua haneri tausani.

¹⁷ No Beniamina, ʻo ʻEliada he kanaka ikaika, a ʻo ka poʻe me ia e lawe ana i ke kakaka, a me ka pale kaua, ʻelua haneri tausani.

¹⁸ A ma hope ona ʻo Iehozabada, a ʻo ka poʻe me ia ka poʻe mākaukau ma ke kaua, hoʻokahi haneri me kanawalu tausani.

¹⁹ ʻO ia ka poʻe lawelawe na ke aliʻi, ʻokoʻa ka poʻe a ke aliʻi i waiho ai ma nā kūlanakauhale paʻa i ka pā ma Iuda a pau loa.