KA BUKE ʻALUA O KA ʻOIHANA ALIʻI 16 - Ka Baibala Hemolele

1 Hoʻolimalima ʻo ʻAsa i ko Suria e kōkua iā ia i kona kūʻē ʻana i kā ʻIseraʻela. 12 Kona maʻi ʻana a me kona make.

MOKUNA XVI.

¹ ¶ I ka makahiki kanakolukumamāono o ke aupuni o ʻAsa, piʻi maila ʻo Baʻasa ke aliʻi o kā ʻIseraʻela, e kūʻē i kā Iuda, a kūkulu ihola ʻo ia iā Rama, me ka manaʻo, ʻaʻole e puka i waho kekahi, ʻaʻole e komo i loko kekahi i o ʻAsa lā ke aliʻi o kā Iuda.

² A laila lawe aʻela ʻo ʻAsa i ke kālā a me ke gula mai loko mai o ka waihona waiwai o ka hale o Iēhova, a me ka hale o ke aliʻi, a hoʻouna akula ʻo ia i o Bene-Hadada lā, i ke aliʻi o Suria, i kona noho ʻana ma Damaseko, ʻī akula,

³ “He berita nō ma waena oʻu a me ʻoe, a ma waena o koʻu makua, a me kou makua; eia hoʻi, ke hoʻouka aku nei au iā ʻoe i ke kālā a me ke gula, e hoʻōki ʻoe i kāu berita me Baʻasa ke aliʻi o kā ʻIseraʻela, i hele ia mai oʻu aku nei.”

⁴ A hoʻolohe ʻo Bene-Hadada i kā ʻAsa, kā ke aliʻi, a hoʻouna maila ʻo ia i nā luna o nā koa ona e kūʻē i nā kūlanakauhale o kā ʻIseraʻela; a luku ihola lākou iā ʻIiona, a me Dana, a me ʻAbela Maima, a me nā kūlanakauhale waiho ukana a pau o Napetali.

⁵ A lohe ihola ʻo Baʻasa, haʻalele ia i kona kūkulu ʻana iā Rama, a hoʻōki ihola ia i kāna hana.

⁶ Alakaʻi aʻela ʻo ʻAsa i kā Iuda a pau, halihali maila lākou i nā pōhaku o Rama, a me nā lāʻau o laila, i ka mea a Baʻasa i kūkulu ai; a kūkulu ihola ʻo ia me ia mau mea iā Geba a me Mizepa.

⁷ ¶ Ia manawa, hele maila ʻo Hanani ke kāula i o ʻAsa lā, i ke aliʻi o kā Iuda, ʻōlelo maila iā ia, “No kou hilinaʻi ʻana i ke aliʻi o Suria, ʻaʻole hoʻi i hilinaʻi iā Iēhova i kou Akua, no ia mea, e pakele ka poʻe koa o ke aliʻi o Suria mai kou lima aku.

⁸ “ʻO ko ʻAitiopa a me kā Luba, ʻaʻole anei he nui loa lākou me nā hale kaʻa, a me nā holoholo lio he lehulehu? Akā, i kou hilinaʻi ʻana iā Iēhova, hāʻawi mai ʻo ia iā lākou i loko o kou lima.

⁹ “No ka mea, e holoholo ana nā maka o Iēhova ma ka honua a pau e hōʻike ana i kona mana i ka poʻe i pono iā ia ko lākou naʻau; ua hana naʻaupō ʻoe i kēia mea; a ma kēia hope aku e kaua ʻia ana ʻoe.”

¹⁰ A laila, huhū ʻo ʻAsa i ke kāula, a hoʻolei ʻo ia iā ia i loko o ka hale paʻahao; no ka mea, ua wela kona huhū iā ia no kēia mea: a ia manawa hoʻi hoʻokaumaha ʻo ʻAsa i kekahi poʻe kānaka.

¹¹ ¶ Aia hoʻi, ʻo nā mea a ʻAsa i hana ai, ka mua, a me ka hope, ua kākau ʻia ia mau mea i loko o ka palapala o nā aliʻi o kā Iuda a me kā ʻIseraʻela.

¹² A i ka makahiki kanakolukumamāiwa o kona aupuni, loaʻa ihola iā ʻAsa ka maʻi ma kona mau wāwae, a piʻi i luna kona maʻi; a i kona wā maʻi, ʻaʻole ia i ʻimi iā Iēhova; akā, i ka poʻe kāhuna lapaʻau.

¹³ A hiamoe ihola ʻo ʻAsa me kona poʻe kūpuna, a make ia i ka makahiki kanahākumamākahi o kona noho aliʻi ʻana.

¹⁴ A kanu lākou iā ia i loko o kona lua kahi āna i ʻeli ai nona iho, ma ke kūlanakauhale o Dāvida, a waiho lākou iā ia i loko o kona wahi moe, kahi i piha ai i nā mea ʻala, a me nā mea miko i hoʻomākaukau ʻia ma ke akamai o nā kāhuna lapaʻau, a pupuhi aku lākou i ke ahi nona a nui loa.