KA BUKE ʻALUA O KA ʻOIHANA ALIʻI 15 - Ka Baibala Hemolele

1 Hana ihola ʻo ʻAsa i ka berita me Iēhova. 16 Kipaku akula ia i kona makuahine mai kona aliʻi ʻana aku.

MOKUNA XV.

¹ ¶ Hiki maila ka ʻUhane o ke Akua ma luna o ʻAzaria ke keiki a ʻOdeda.

² Hele akula ia e hālāwai pū me ʻAsa, ʻī akula iā ia, “E hoʻolohe mai iaʻu, e ʻAsa, a me kā Iuda a pau, a me kā Beniamina; ʻo Iēhova pū kekahi me ʻoukou i ko ʻoukou noho pū ʻana me ia; inā e ʻimi ʻoukou iā ia, e loaʻa nō ʻo ia iā ʻoukou; akā, inā e haʻalele ʻoukou iā ia, e haʻalele kēlā iā ʻoukou.

³ “I nā lā he nui loa, ʻaʻole iā ʻIseraʻela ke Akua ʻoiaʻiʻo, ʻaʻohe kahuna aʻo, ʻaʻole ke kānāwai.

⁴ “Akā, i ko lākou wā pilikia, a huli lākou iā Iēhova i ke Akua o kā ʻIseraʻela, a ʻimi aku iā ia, ua loaʻa nō ʻo ia iā lākou.

⁵ “I kēlā mau lā, ʻaʻole maluhia o ka mea i puka i waho, a me ka mea i komo i loko; no ka mea, nui ka haunaele ma ko nā ʻāina a pau loa.

⁶ “Ua luku ʻia kekahi lāhui kanaka, e kekahi lāhui kanaka, a me kekahi kūlanakauhale e kekahi kūlanakauhale; no ka mea, ua hoʻoweliweli mai ke Akua iā lākou me nā mea ʻino a pau.

⁷ “E hoʻokanaka ʻoukou, ʻaʻole e hoʻonāwaliwali ko ʻoukou mau lima; no ka mea, e uku ʻia kā ʻoukou hana ʻana!”

⁸ ¶ A lohe aʻela ʻo ʻAsa i kēia mau ʻōlelo a me ka wānana a ʻOdeda ke kāula, hoʻoikaika ihola ʻo ia iā ia iho, a kipaku akula i nā kiʻi lapuwale mai ka ʻāina aku a pau o Iuda, a me Beniamina a me nā kūlanakauhale āna i lawe pio ai ma ka mauna ʻo ʻEperaima: a hana hou ʻo ia i ke kuahu o Iēhova, aia nō i mua o ka lānai o Iēhova.

⁹ A hoʻākoakoa ʻo ia i kā Iuda a pau, a me kā Beniamina, a me ka poʻe malihini e noho pū ana me lākou mai loko mai o ʻEperaima a me Manase, a mai loko mai o Simeona; no ka mea, he nui loa ka poʻe no kā ʻIseraʻela i lilo mai iā ia, i ko lākou ʻike ʻana, aia nō ʻo Iēhova kekahi pū me ia.

¹⁰ A ua hoʻākoakoa ʻia lākou ma Ierusalema, i ka malama ʻekolu o ka makahiki ʻumikumamālima o ke aupuni o ʻAsa.

¹¹ A mōhai akula lākou iā Iēhova ia lā i kekahi o ka waiwai pio a lākou i lawe ai, ʻehiku haneri bipi, a me nā hipa ʻehiku tausani.

¹² Hana ihola lākou i ka berita e ʻimi iā Iēhova i ke Akua o ko lākou poʻe kūpuna me ko lākou naʻau a pau a me ko lākou ʻuhane a pau.

¹³ A ʻo kēlā mea kēia mea i ʻimi ʻole aku iā Iēhova i ke Akua o kā ʻIseraʻela, e make nō ia, ka mea ʻuʻuku a me ka mea nui, ʻo ke kāne a me ka wahine.

¹⁴ A hoʻohiki lākou iā Iēhova me ka leo nui, a me ka ʻuā ʻana, a me nā pū, a me nā mea hōkiokio.

¹⁵ A ʻoliʻoli ʻo kā Iuda a pau no ka hoʻohiki ʻana; no ka mea, hoʻohiki lākou me ko lākou naʻau a pau, a ua ʻimi lākou iā ia, me ko lākou makemake a pau; a ua loaʻa nō ʻo ia iā lākou. A hoʻomalu ʻo Iēhova iā lākou a puni.

¹⁶ ¶ A ʻo Maʻaka ka makuahine o ʻAsa ke aliʻi, kipaku akula ʻo ia iā ia mai kona noho aliʻi ʻana aku; no ka mea, ua hana ʻo ia i kiʻi no ʻAsetarota, wāwahi ihola ʻo ʻAsa i kāna kiʻi, a hehi ʻo ia ia mea, a puhi i ke ahi ma ke kahawai ʻo Kederona.

¹⁷ ʻAʻole hoʻi i lawe ʻia aku nā wahi kiʻekiʻe mai ʻIseraʻela aku; akā, ʻo ka naʻau o ʻAsa, ua pololei nō ia i kona mau lā a pau loa.

¹⁸ A ua hoʻokomo ʻo ia i loko o ka hale o ke Akua i nā mea a kona makua kāne i hoʻolaʻa ai, a me kāna mau mea laʻa nō hoʻi, i ke kālā a me ke gula a me nā ipu.

¹⁹ ʻAʻole kaua hou a hiki i ka makahiki kanakolukumamālima o ke aupuni o ʻAsa.