KA BUKE ʻALUA O KA ʻOIHANA ALIʻI 14 - Ka Baibala Hemolele

1 No ʻAsa, a me kona kaua aku iā Zera. 9 Ua lanakila ihola ia, a ua luku aku i ko ʻAitiopa.

MOKUNA XIV.

¹ ¶ A hiamoe ʻo ʻAbiia me kona mau kūpuna, a kanu lākou iā ia ma ke kūlanakauhale o Dāvida; a noho aliʻi ihola ʻo ʻAsa, kāna keiki ma hope ona. I kona mau lā, ua maluhia ka ʻāina i nā makahiki he ʻumi.

² ¶ Hana ihola ʻo ʻAsa i ka maikaʻi a me ka pololei, i mua o Iēhova kona Akua.

³ Lawe akula ʻo ia i nā kuahu o nā akua ʻē, a me nā wahi kiʻekiʻe, wāwahi ihola ʻo ia i nā kiʻi, kulaʻi nō hoʻi i nā kiʻi o ʻAsetarota.

⁴ A kauoha aʻela ʻo ia i kā Iuda e ʻimi iā Iēhova i ke Akua o ko lakou kūpuna, a e mālama i kona kānāwai, a me kāna kauoha.

⁵ Lawe akula ia mai loko aku o nā kūlanakauhale a pau o Iuda, i nā wahi kiʻekiʻe, a me nā kiʻi; a maluhia ihola ke aupuni i mua ona.

⁶ A kūkulu ihola ia i nā kūlanakauhale paʻa i ka pā ma Iuda; no ka mea, ua maluhia ka ʻāina, ʻaʻohe ona kaua i kēlā mau makahiki; no ka mea, hoʻomalu mai ʻo Iēhova iā ia.

⁷ ʻŌlelo akula ʻo ia i kā Iuda, “Inā kākou, e kūkulu kākou i kēia mau kūlanakauhale, e hana a puni i nā pā, a me nā hale kiaʻi, a me nā ʻīpuka, a me nā mea e paʻa ai, ʻoiai ka ʻāina iā kākou; no ka mea, ua ʻimi kākou iā Iēhova, i ko kākou Akua, ua ʻimi nō kākou, a ua hoʻomalu mai ia iā kākou a puni.” A kūkulu aʻela lākou me ka pōmaikaʻi.

⁸ Aia iā ʻAsa he poʻe koa, he poʻe lawe pale kaua a me nā ihe, no loko mai o Iuda ʻekolu haneri tausani; a no loko mai o Beniamina, he poʻe lawe i nā ʻaʻahu a poʻo, a he poʻe lena i nā kakaka, ʻelua haneri a me kanawalu tausani; he poʻe koa ikaika kēia poʻe a pau loa.

⁹ ¶ A hele mai i o lākou lā ʻo Zera no ʻAitiopa mai, me ka poʻe koa, hoʻokahi tausani tausani, a me nā kaʻa kaua ʻekolu haneri, a hiki mai lākou i Maresa.

¹⁰ A hele kūʻē ʻo ʻAsa iā ia, a hoʻonohonoho i ke kaua ma ke awāwa ʻo Zepata ma Maresa.

¹¹ A kāhea akula ʻo ʻAsa iā Iēhova, i kona Akua, ʻī akula, “E Iēhova, ua like wale nō iā ʻoe ke kōkua ma muli o ka poʻe lehulehu, a ma muli hoʻi o ka poʻe ikaika ʻole; e kōkua mai iā mākou, e Iēhova ko mākou Akua; no ka mea, ke hilinaʻi aku nei mākou iā ʻoe, a ma kou inoa mākou e hele kūʻē aku ai i kēia poʻe lehulehu. E Iēhova, ʻo ʻoe nō ko mākou Akua; mai noho ʻoe a lanakila ke kanaka ma luna ou!”

¹² A laila, luku maila ʻo Iēhova i ko ʻAitiopa i mua o ʻAsa, a i mua o kā Iuda; a ʻauheʻe akula ko ʻAitiopa.

¹³ Alualu akula ʻo ʻAsa a me nā kānaka me ia a hiki i Gerara; hāʻule ko ʻAitiopa, ʻaʻole i hiki iā lākou ke ola; no ka mea, ua luku ʻia lākou i mua o Iēhova, a i mua o kona poʻe koa, a ua lawe lākou i ka waiwai pio he nui loa.

¹⁴ A luku lākou i nā kūlanakauhale a pau a puni ʻo Gerara; no ka mea, ma luna o lākou ka makaʻu iā Iēhova; a hoʻopio lākou i nā kūlanakauhale a pau; a he nui loa ka waiwai pio i loko o laila.

¹⁵ A luku lākou i nā halelewa o nā holoholona, a lawe akula lākou i nā hipa a me nā kāmelo he nui loa, a hoʻi lākou i Ierusalema.