KA BUKE ʻALUA O KA ʻOIHANA ALIʻI 13 - Ka Baibala Hemolele

1 Kaua ʻo ʻAbiia iā Ieroboama a lanakila ma luna iho ona. 21 Nā wāhine a me nā keiki a ʻAbiia.

MOKUNA XIII.

¹ ¶ I ka makahiki ʻumikumamāwalu o ke aliʻi o Ieroboama, noho aliʻi ihola ʻo ʻAbiia ma luna o kā Iuda.

² ʻEkolu makahiki kona noho aliʻi ʻana ma Ierusalema; a ʻo ka inoa o kona makuahine ʻo Mikaia ke kaikamahine a ʻUriʻela no Gibea. A he kaua nō i waena o ʻAbiia a me Ieroboama.

³ A hoʻonohonoho ihola ʻo ʻAbiia i ke kaua me ka poʻe koa, ka poʻe ikaika i ke kaua, ʻehā haneri tausani kānaka i wae ʻia; a ʻo Ieroboama hoʻi, hoʻonohonoho ʻo ia i ke kaua me nā kānaka i wae ʻia ʻewalu haneri tausani, he poʻe koa ikaika.

⁴ ¶ A laila, kū i luna ʻo ʻAbiia ma luna o ka puʻu ʻo Zemaraima, aia nō ia ma ka mauna ʻo ʻEperaima, a ʻōlelo akula, “E hoʻolohe mai, e Ieroboama a me kā ʻIseraʻela a pau:

⁵ ʻaʻole anei ʻoukou i ʻike, ua hāʻawi maila ʻo Iēhova ke Akua o kā ʻIseraʻela i ke aupuni ma luna o kā ʻIseraʻela, iā Dāvida, i mea mau loa iā ia, a me kāna poʻe mamo, me ka berita paʻakai?

⁶ “Akā, ua kū i luna ʻo Ieroboama ke keiki a Nebata, ke kauā a Solomona ke keiki a Dāvida, a kipi ihola i kona haku.

⁷ “A ua hoʻākoakoa ʻia i ona lā nā kānaka lapuwale, ka poʻe hewa, a ua hoʻoikaika kūʻē mai iā Rehoboama, i ke keiki a Solomona. A he keiki ʻo Rehoboama ia wā, a palupalu kona naʻau, ʻaʻole i hiki iā ia ke kūʻē iā lākou.

⁸ “ʻĀnō, ke manaʻo nei ʻoukou e hoʻoikaika kūʻē mai i ke aupuni o Iēhova aia ma ka lima o nā keiki a Dāvida; ʻo ʻoukou ka poʻe koa nui loa, a me ʻoukou pū nā bipi keiki gula a Ieroboama i hana ai, i mau akua no ʻoukou.

⁹ “ʻAʻole anei ʻoukou i kipaku i nā kāhuna a Iēhova i ka poʻe mamo a ʻAʻarona, a me nā Levi, a hoʻonoho ihola no ʻoukou iho i nā kāhuna e like me nā lāhui kanaka o nā ʻāina ʻē? a ʻo kēlā mea kēia mea e hiki mai me ka bipi keiki, a me nā hipa kāne ʻehiku ma kona lima i mea hāʻawi aku, ua lilo ia i kahuna no nā akua lapuwale.

¹⁰ “Akā, ʻo mākou nei, ʻo Iēhova, ʻo ia ko mākou Akua, ʻaʻole mākou i haʻalele iā ia; a ʻo nā kāhuna, ka poʻe kauā na Iēhova, ʻo ka poʻe mamo lākou a ʻAʻarona, a ʻo nā Levi, e hana ana lākou i kā lākou ʻoihana iho.

¹¹ “Kukuni lākou i kēlā kakahiaka i kēia kakahiaka, i kēlā ahiahi i kēia ahiahi, i nā mōhai kuni na Iēhova, a me nā mea poni ʻala; a hoʻonoho lākou ma luna o ka papa ʻaina maʻemaʻe i ka berena hōʻike, a me ka ipukukui gula e ʻaʻā ana kona mau manamana i kēlā ahiahi kēia ahiahi; no ka mea, e mālama ana mākou i ka ʻoihana na Iēhova, ko mākou Akua; akā, ʻo ʻoukou lā, ua haʻalele iā ia.

¹² “Eia hoʻi me mākou ke Akua i luna no mākou, a ʻo kona mau kāhuna nō hoʻi me nā mea kani e hoʻopūʻiwa iā ʻoukou. E nā mamo a ʻIseraʻela, mai kaua aku ʻoukou iā Iēhova i ke Akua o ko ʻoukou poʻe kūpuna; no ka mea, ʻaʻole pono iki ʻoukou pēlā!”

¹³ ¶ A hoʻonoho ʻo Ieroboama i poʻe moemoe e hoʻohālua ma hope o lākou; no laila, i mua o kā Iuda kekahi poʻe, a ma ko lākou kua nō hoʻi ka poʻe hoʻohālua.

¹⁴ A ʻike kā Iuda, aia nō ke kaua ma mua o lākou a ma hope kekahi, kāhea aku lākou iā Iēhova, a hoʻokani ka poʻe kāhuna i nā pū.

¹⁵ A laila, hoʻōho aʻela ka poʻe kānaka o Iuda; a i ka hoʻōho ʻana o kā Iuda poʻe kānaka, luku maila ʻo Iēhova iā Ieroboama a me kā ʻIseraʻela a pau i mua o ʻAbiia, a me kā Iuda.

¹⁶ A ʻauheʻe akula ka poʻe mamo a ʻIseraʻela i mua o kā Iuda, a hāʻawi mai ke Akua i ua poʻe lā i loko o ko lākou lima.

¹⁷ A luku akula ʻo ʻAbiia a me kona poʻe kānaka iā lākou me ka luku nui; a ʻo ka poʻe o kā ʻIseraʻela i pepehi ʻia a hāʻule ihola, ʻelima haneri tausani kānaka i wae ʻia.

¹⁸ Pēlā i pio ai ka poʻe mamo a ʻIseraʻela ia manawa, a lanakila ihola kā Iuda; no ka mea, ua hilinaʻi aku lākou iā Iēhova i ke Akua o ko lākou poʻe kūpuna.

¹⁹ Alualu akula ʻo ʻAbiia ma hope o Ieroboama, a lawe pio ʻo ia i nā kūlanakauhale mai ona aku lā, iā Betela, a me nā kauhale e pili ana i laila; iā Iesana a me nā kauhale e pili ana i laila; iā ʻEperaima nō hoʻi a me nā kauhale e pili ana i laila.

²⁰ ʻAʻole i loaʻa hou iā Ieroboama kona ikaika i nā lā o ʻAbiia; a hahau maila ʻo Iēhova iā ia, a make ihola.

²¹ ¶ Lanakila ihola ʻo ʻAbiia, a lawe aʻela nāna i nā wāhine he ʻumi a me kumamāhā, a hānau maila nā keiki kāne he iwakālua a me kumamālua, a me nā kaikamāhine he ʻumi a me kumamāono.

²² A ʻo ke koena o nā hana a ʻAbiia a me kona mau ʻaoʻao, a me kāna ʻōlelo, ua kākau ʻia ma nā kaʻao a ʻIdo, ke kāula.