KA BUKE ʻALUA O KA ʻOIHANA ALIʻI 12 - Ka Baibala Hemolele

1 Ko Rehoboama haʻalele ʻana iā Iēhova. 9 Hoʻopaʻi mai ke Akua iā ia ma ka lima o Sisaka. 16 Kona make ʻana.

MOKUNA XII.

¹ ¶ A paʻa ke aupuni o Rehoboama, a ikaika hoʻi ia, a laila haʻalele ʻo ia i ke kānāwai o Iēhova, a me ia pū kā ʻIseraʻela a pau.

² A i ka lima o ka makahiki o ke aliʻi ʻo Rehoboama, piʻi maila ʻo Sisaka, ke aliʻi o ʻAigupita i Ierusalema; no ka mea, ua lawehala lākou iā Iēhova,

³ me nā kaʻa kaua he ʻumikumamālua tausani, a me nā hoʻoholo lio kanaono tausani, a me nā kānaka i pau ʻole i ka helu ʻia ka poʻe i hele pū me ia mai ʻAigupita mai: kā Luba, a me kā Suka, a me kā Kusa.

⁴ Hoʻopio akula ʻo ia i nā kūlanakauhale i paʻa i ka pā ma Iuda, a hiki maila i Ierusalema.

⁵ A laila, hele mai ʻo Semaia, ke kāula, i o Rehoboama lā, a i nā aliʻi o Iuda i hoʻākoakoa ʻia ma Ierusalema mai mua mai o Sisaka, ʻī akula iā lākou, “Penei i ʻōlelo mai ai ʻo Iēhova iā ʻoukou, ‘Ua haʻalele ʻoukou iaʻu, no ia mea, ua haʻalele aku au iā ʻoukou i loko o ka lima o Sisaka.’”

⁶ Hoʻohaʻahaʻa ihola nā kaukaualiʻi o kā ʻIseraʻela a me ka mōʻī iā lākou iho, ʻī ihola, “Ua pololei ʻo Iēhova.”

⁷ ¶ A ʻike ʻo Iēhova, ua hoʻohaʻahaʻa lākou iā lākou iho, hiki maila ka ʻōlelo a Iēhova iā Semaia, ʻī maila, “Ua hoʻohaʻahaʻa lākou iā lākou iho; ʻaʻole au e luku loa iā lākou, e hāʻawi nō au iā lākou i wahi maha iki, ʻaʻole au e ninini i koʻu huhū ma luna o Ierusalema ma ka lima o Sisaka.

⁸ “Akā, e lilo lākou i poʻe kauā nāna, i ʻike lākou i ka hoʻokauā ʻana naʻu, a me ka hoʻokauā ʻana na nā aupuni o nā ʻāina.”

⁹ ¶ A laila piʻi maila Sisaka ke aliʻi o ʻAigupita i Ierusalema, a hao ihola i ka waiwai o ka hale o Iēhova, a me ka waiwai o ka hale o ke aliʻi, hao ihola ʻo ia i nā mea a pau; a lawe nō hoʻi i nā pale kaua gula a Solomona i hana ai.

¹⁰ A hana ke aliʻi ʻo Rehoboama i mea e pani ai ko laila hakahaka, i nā pale kaua keleawe, a hāʻawi ia mau mea i loko o ka lima o nā luna o ka poʻe kiaʻi, ka poʻe i mālama i nā puka o ka hale o ke aliʻi.

¹¹ A i nā wā a pau a ke aliʻi i komo ai i loko o ka hale o Iēhova, komo nō ka poʻe kiaʻi, a lawe mai ia mau mea, a hoʻihoʻi aku nō hoʻi ia mau mea i loko o ke keʻena o ka poʻe kiaʻi.

¹² A i kona hoʻohaʻahaʻa ʻana iā ia iho, huli aʻela ka huhū o Iēhova mai ona aku lā, ʻaʻole i pepehi iā ia a make; a ma ka ʻāina ʻo Iuda, ua maikaʻi nō nā mea ma laila.

¹³ ¶ A hoʻokūpaʻa ʻia ke aliʻi ma Ierusalema, a noho aliʻi ihola; no ka mea, he kanahākumamākahi nā makahiki o Rehoboama i kona wā i hoʻoaliʻi ai, a noho aliʻi ia i nā makahiki he ʻumikumamāhiku, ma Ierusalema, ke kūlanakauhale a Iēhova i wae ai ma loko o nā ʻohana a pau o kā ʻIseraʻela, e kau mai i kona inoa ma laila. A ʻo ka inoa o kona makuahine, ʻo Naʻama no kā ʻAmona.

¹⁴ A hana ʻo ia i ka hewa; no ka mea, ʻaʻole ia i hoʻomākaukau i kona naʻau e ʻimi iā Iēhova.

¹⁵ ¶ A ʻo nā mea mua a me nā mea hope a Rehoboama i hana ai, ʻaʻole anei i kākau ʻia ia mau mea ma ka palapala a Semaia ke kāula, a me ʻIdo ka mea wānana ma ka palapala kūʻauhau? A he kaua iā Rehoboama, a me Ieroboama i ko lāua mau lā a pau loa.

¹⁶ A hiamoe ihola ʻo Rehoboama me kona mau kūpuna; a ua kanu ʻia ʻo ia ma ke kūlanakauhale o Dāvida. A noho aliʻi ihola ʻo ʻAbiia kāna keiki ma hope ona.