KA BUKE ʻALUA O KA ʻOIHANA ALIʻI 11 - Ka Baibala Hemolele

1 Ua hoʻākoakoa ʻo Rehoboama i ka poʻe koa e kaua aku i kā ʻIseraʻela. 4 Ua pāpā ʻia mai ia e Semaia. 18 No nā wāhine a Rehoboama.

MOKUNA XI.

¹ ¶ A hiki ʻo Rehoboama i Ierusalema, hoʻākoakoa aʻela ia i ka ʻohana a Iuda a me Beniamina, hoʻokahi haneri a me kanawalu tausani kānaka uʻi, he poʻe koa, e kaua aku i kā ʻIseraʻela, e hoʻihoʻi mai i ke aupuni iā Rehoboama.

² A hiki mai ka ʻōlelo a Iēhova iā Semaia, i ke kanaka o ke Akua, ʻī maila,

³ “E ʻōlelo aku ʻoe iā Rehoboama i ke keiki a Solomona i ke aliʻi o kā Iuda, a i ka poʻe mamo a ʻIseraʻela a pau ma Iuda a me Beniamina, e ʻī aku,

⁴ ‘Penei ka ʻōlelo a Iēhova, “Mai piʻi aku ʻoukou, ʻaʻole hoʻi ʻoukou e kaua aku i ko ʻoukou poʻe hoahānau; e hoʻi kēlā kanaka kēia kanaka i kona hale iho; no ka mea, naʻu aku nēia mea.”’” A lohe lākou a pau i ka ʻōlelo a Iēhova, a hoʻi lākou mai ko lākou hele ʻana aku e kaua iā Ieroboama.

⁵ ¶ A noho ihola ʻo Rehoboama ma Ierusalema, a kūkulu ihola ia ma Iuda i nā kūlanakauhale paʻa i ka pā.

⁶ Kūkulu ihola ʻo ia iā Betelehema, a me ʻEtema, a me Tekoa,

⁷ a me Bete Zura, a me Soko, a me ʻAdulama,

⁸ a me Gata, a me Maresa, a me Zipa,

⁹ a me ʻAdoraima, a me Lakisa, a me ʻAzeka,

¹⁰ a me Zora, a me ʻAialona, a me Heberona, aia nō ma Iuda, a ma Beniamina, he mau kūlanakauhale paʻa i ka pā.

¹¹ A hoʻopaʻa ihola ʻo ia i nā pā kaua, a hoʻonoho akula i loko o laila i nā luna a me nā ahu ʻai, a me ka ʻaila, a me ka waina.

¹² A i loko o kēlā kūlanakauhale kēia kūlanakauhale, waiho ihola ia i nā pale kaua, a me nā ihe, hana ihola ʻo ia ma laila a paʻa loa, a iā ia ʻo Iuda a me Beniamina ma kona ʻaoʻao.

¹³ ¶ A ʻo nā kāhuna, a me nā Levi i waena o kā ʻIseraʻela a pau, hele mai lākou i ona lā, mai kauwahi o lākou a pau mai.

¹⁴ No ka mea, haʻalele ka poʻe Levi i nā wahi o lākou, a me ko lākou hoʻoilina, a hele lākou i Iuda, a i Ierusalema; no ka mea, kipaku ʻo Ieroboama a me kāna mau keiki iā lākou mai loko aku o ka ʻoihana kahuna no Iēhova.

¹⁵ A hoʻonoho ʻo ia nona i nā kāhuna, no nā wahi kiʻekiʻe, a no nā kao, a no nā keiki bipi āna i hana ai.

¹⁶ A ma hope o kēia mau mea, ʻo ka poʻe a pau no loko o nā ʻohana a pau o kā ʻIseraʻela i hāʻawi aku i ko lākou mau naʻau e ʻimi iā Iēhova ke Akua o kā ʻIseraʻela, hele mai lākou i Ierusalema e mōhai aku iā Iēhova, i ke Akua o ko lākou poʻe kūpuna.

¹⁷ A hoʻokūpaʻa ihola lākou i ke aupuni o Iuda, a hoʻokūpaʻa nō hoʻi iā Rehoboama i ke keiki a Solomona i nā makahiki ʻekolu; no ka mea, i nā makahiki ʻekolu, hele lākou ma ka ʻaoʻao o Dāvida a me Solomona.

¹⁸ ¶ A lawe ihola ʻo Rehoboama i wahine nāna, iā Mehalata, i ke kaikamahine a Ieremota, ke keiki a Dāvida, a me ʻAbehaila, ke kaikamahine a ʻEliaba ke keiki a Iese.

¹⁹ A hānau mai ʻo ia nāna i nā keiki: ʻo Ieusa, me Samaria, a me Zahama.

²⁰ A ma hope iho, lawe ʻo ia iā Maʻaka i ke kaikamahine a ʻAbesaloma; a hānau mai ʻo ia nāna ʻo ʻAbiia, a me ʻAtai, a me Ziza, a me Silomita.

²¹ Aloha ihola ʻo Rehoboama iā Maʻaka i ke kaikamahine a ʻAbesaloma, ma mua o kāna mau wāhine a pau, a me kāna poʻe haiā wahine; (no ka mea, aia nō iā ia he ʻumikumamāwalu wāhine, a me nā haiā wahine he kanaono; a hānau mai he iwakālua a me kumamāwalu nā keiki kāne, a me nā kaikamāhine he kanaono).

²² Hoʻonoho ihola ʻo Rehoboama iā ʻAbiia i ke keiki a Maʻaka i luna ma waena o kona poʻe hoahānau, no ka hoʻāliʻi aku iā ia.

²³ A hana maʻalea ihola ʻo ia, a hoʻonoho liʻiliʻi ia i kāna poʻe keiki ma nā ʻāina a pau o Iuda a me Beniamina, a i loko o nā kūlanakauhale a pau i paʻa i ka pā, a hāʻawi aku ʻo ia iā lākou i ka ʻai a nui. Makemake ihola ia i nā wāhine he nui loa.