KA BUKE ʻALUA O KA ʻOIHANA ALIʻI 10 - Ka Baibala Hemolele

1 Haʻalele ʻo Rehoboama i ka ʻōlelo aʻo a ka poʻe ʻelemākule. 16 Kipi kā ʻIseraʻela i ke aliʻi. 18 Mahuka aku ʻo Rehoboama i Ierusalema.

MOKUNA X.

¹ ¶ Hele akula ʻo Rehoboama i Sekema; no ka mea, ua hiki mai kā ʻIseraʻela a pau i Sekema e hoʻonoho iā ia i aliʻi.

² Lohe aʻela ʻo Ieroboama ke keiki a Nebata, e noho ana ia ma ʻAigupita kahi āna i mahuka aku ai mai ke alo aku o Solomona ke aliʻi, a hoʻi mai ʻo Ieroboama mai ʻAigupita mai.

³ A hoʻouna akula lākou a kāhea aku iā ia; a hele mai ʻo Ieroboama a me kā ʻIseraʻela a pau, a ʻōlelo maila lākou iā Rehoboama, ʻī maila,

⁴ “Ua hoʻokaumaha kou makua kāne i kā mākou ʻauamo, ʻānō hoʻi, e hoʻomāmā iki i ka hana hoʻoluhi a kou makua kāne, a me ka ʻauamo kaumaha āna i kau mai ai ma luna o mākou, a e hoʻokauā aku mākou nāu.”

⁵ ʻŌlelo akula ʻo ia iā lākou, “A hala nā lā ʻekolu, e hoʻi hou mai ʻoukou i oʻu nei.” A hele akula nā kānaka.

⁶ ¶ A ʻahaʻōlelo pū ihola ʻo Rehoboama ke aliʻi me ka poʻe ʻelemākule, ka poʻe i kū i mua o Solomona, kona makua kāne i ka wā o kona ola ʻana, ʻī akula, “He aha kā ʻoukou e manaʻo ai i mea e haʻi aku i kēia poʻe kānaka?”

⁷ ʻŌlelo lākou iā ia, ʻī maila, “Inā e noho ʻoe i mea e pono ai kēia poʻe kānaka, a e hōʻoluʻolu aku, a ʻōlelo i nā mea maikaʻi iā lākou, a laila, e noho mau lākou i poʻe kauā nāu.”

⁸ Akā, haʻalele aʻela ia i ka ʻōlelo aʻo a ka poʻe ʻelemākule, ka mea a lākou i aʻo mai ai, a ʻahaʻōlelo pū ihola me ka poʻe kānaka uʻi, ka poʻe i noho pū me ia a nui, a e kū ana hoʻi i mua ona.

⁹ ʻĪ akula ʻo ia iā lākou, “He aha ko ʻoukou manaʻo i mea e ʻōlelo aku ai kākou i kēia poʻe kānaka, ka poʻe i ʻōlelo mai iaʻu, me ka ʻī ʻana mai, ‘E hoʻomāmā iki i ka ʻauamo a kou makua i kau mai ai ma luna o mākou’?”

¹⁰ ʻŌlelo maila ka poʻe kānaka uʻi, ka poʻe i noho pū me ia a nui, ʻī maila, “Penei kāu e ʻōlelo aku ai i ka poʻe kānaka i ʻōlelo mai iā ʻoe, ʻī mai ana, ‘Ua hoʻokaumaha kou makua kāne i kā mākou ʻauamo, ʻānō hoʻi e hoʻomāmā iki i kā mākou ʻauamo;’ penei ʻoe e ʻōlelo aku ai iā lākou, ‘E ʻoi aku ka mānoanoa o koʻu manamana lima iki i ka pūhaka o koʻu makua kāne!

¹¹ ‘Ua kau maila koʻu makua kāne i ʻauamo kaumaha ma luna o ʻoukou; akā hoʻi, e hoʻonui au i kā ʻoukou ʻauamo; ua hahau mai koʻu makua kāne iā ʻoukou i ka huipa; akā hoʻi, e hahau au iā ʻoukou i nā moʻo huelo ʻawa!’”

¹² ¶ A hoʻi mai ʻo Ieroboama a me ka poʻe kānaka a pau i o Rehoboama lā i ka pō ʻakolu, e like me kā ke aliʻi i ʻōlelo aku ai, “E hoʻi mai ʻoukou i oʻu nei i ke kolu o ka lā.”

¹³ ʻŌlelo kalaʻea akula ke aliʻi iā lākou; haʻalele ke aliʻi ʻo Rehoboama i ka ʻōlelo aʻo a ka poʻe ʻelemākule;

¹⁴ a ʻōlelo akula iā lākou e like me ka ʻōlelo aʻo a ka poʻe kānaka uʻi, ʻī akula, “Ua hoʻokaumaha koʻu makua i kā ʻoukou ʻauamo; akā, e hoʻonui au ia mea; ua hahau koʻu makua kāne iā ʻoukou i ka huipa; akā, ʻo wau hoʻi e hahau iā ʻoukou i nā moʻo huelo ʻawa!”

¹⁵ Pēlā i hoʻolohe ʻole aku ai ke aliʻi i nā kānaka; no ka mea, no ke Akua mai kēia i hoʻokō ai ʻo Iēhova i ka ʻōlelo āna i ʻōlelo mai ai ma o ʻAhiia lā no Silo iā Ieroboama i ke keiki a Nebata.

¹⁶ ¶ A ʻike aʻela kā ʻIseraʻela a pau, ʻaʻole i hoʻolohe ke aliʻi iā lākou, ʻōlelo nā kānaka i ke aliʻi, ʻī maila, “He aha ko mākou kuleana i loko o Dāvida? ʻAʻohe o mākou hoʻoilina i loko o ke keiki a Iese. E hoʻi nō kēlā kanaka kēia kanaka a pau i kona halelewa, e kā ʻIseraʻela; ʻĀnō, e nānā ʻoe i kou hale iho, e Dāvida.” Pēlā i hoʻi ai kā ʻIseraʻela a pau i ko lākou mau halelewa.

¹⁷ A ʻo ka poʻe mamo a ʻIseraʻela e noho ana i loko o nā kūlanakauhale o Iuda, noho aliʻi ihola ʻo Rehoboama ma luna o lākou.

¹⁸ Hoʻouna akula ke aliʻi ʻo Rehoboama iā Hedorama i ka mea ma luna o ka ʻauhau ʻana, a hailuku nā mamo a ʻIseraʻela iā ia, a make ia. A laila, wikiwiki aʻela ke aliʻi ʻo Rehoboama e piʻi ma luna o kona hale kaʻa, a e holo i Ierusalema.

¹⁹ Pēlā i kipi ai ʻo kā ʻIseraʻela i ka ʻohana a Dāvida a hiki i kēia lā.