KA BUKE ʻALUA O KA ʻOIHANA ALIʻI 1 - Ka Baibala Hemolele

1 No ka mōhai nui a Solomona i mōhai aku ai i ke Akua ma Gibeona. 8 ʻO ko Solomona noi ʻana i ka naʻauao. 13 No ka lehulehu o kona mau kaʻa a me nā holoholo lio.

MOKUNA I.

¹ ¶ Ua paʻa iā Solomona, ke keiki a Dāvida, kona aupuni, a me ia pū ʻo Iēhova kona Akua, a hoʻokiʻekiʻe nui maila iā ia.

² ʻŌlelo akula ʻo Solomona i kā ʻIseraʻela a pau, i nā luna o nā tausani a me ko nā haneri, a me nā luna kānāwai, a me kēlā luna kēia luna o kā ʻIseraʻela a pau, ka poʻe koʻikoʻi o nā mākua.

³ A hele akula ʻo Solomona, a me ia pū ka ʻaha kanaka a pau, i kahi kiʻekiʻe, aia nō ma Gibeona; no ka mea, ma laila nō ka halelewa o ke anaina kanaka o ke Akua, ka mea a Mose ke kauā a Iēhova i hana ai ma ka wao nahele.

⁴ Akā, ʻo ka pahu berita o ke Akua, ua lawe mai ʻo Dāvida mai Kiriata Iearima aku, i kahi āna i kūkulu ai no ia mea; no ka mea, ua kūkulu nō ia i halelewa no ia mea ma Ierusalema.

⁵ A ʻo ke kuahu keleawe ka mea a Bezaleʻela ke keiki a ʻUri, ke keiki a Hura, i hana ai, ma laila ia i mua o ka noho o Iēhova. A ʻimi pinepine ʻo Solomona a me ke anaina kanaka i laila.

⁶ A mōhai akula ʻo Solomona ma laila ma luna o ke kuahu keleawe i mua o Iēhova, aia ma ka halelewa o ke anaina kanaka. A mōhai akula ʻo ia ma luna o laila, i nā mōhai kuni hoʻokahi tausani.

⁷ ¶ Ia pō nō ʻikea maila ke Akua e Solomona, ʻōlelo mai iā ia, “E noi mai ʻoe i ka mea aʻu e hāʻawi aku ai iā ʻoe.”

⁸ ʻĪ akula ʻo Solomona i ke Akua, “Ua hōʻike mai ʻoe i ke aloha nui iā Dāvida i koʻu makua kāne, a hoʻāliʻi ʻoe iaʻu ma hope ona.

⁹ “ʻĀnō hoʻi, e Iēhova, e ke Akua ē, e hoʻokō mai i ka ʻōlelo āu i ʻōlelo mai ai iā Dāvida, i koʻu makua kāne; no ka mea, nāu nō i hoʻāliʻi mai iaʻu ma luna o ka poʻe kānaka i like ka nui me nā huna lepo o ka honua.

¹⁰ “ʻĀnō, e hāʻawi mai iaʻu i ka naʻauao, a me ke akamai i puka aku au i waho i mua o kēia lāhui kanaka, a komo mai nō hoʻi; no ka mea, iā wai lā e hiki ai ke mālama i kēia poʻe kānaka nui ou?”

¹¹ ʻŌlelo maila ke Akua iā Solomona, “No ka mea, aia nō ma kou naʻau kēia, ʻaʻole ʻoe i noi mai i ka waiwai a me ka hanohano, a me ka make ʻana o kou poʻe ʻenemi, ʻaʻole nō hoʻi ʻoe i noi mai i nā lā he nui loa; akā, ua noi mai ʻoe nou i ka naʻauao, a me ke akamai, i hiki iā ʻoe ke hoʻomalu i koʻu poʻe kānaka ma luna o lākou i hoʻāliʻi aku ai au iā ʻoe;

¹² no laila, ua hāʻawi ʻia iā ʻoe ka naʻauao, a me ke akamai, a e hāʻawi aku nō hoʻi au iā ʻoe i ka waiwai, a me ka hanohano; ʻaʻole pēlā kekahi o nā aliʻi ma mua, ʻaʻole nō hoʻi he mea like ma muli aku.”

¹³ Hele maila ʻo Solomona mai kahi kiʻekiʻe mai, ma Gibeona, a hiki i Ierusalema, mai mua mai o ka halelewa o ke anaina kanaka, a noho aliʻi ihola ia ma luna o kā ʻIseraʻela.

¹⁴ ¶ A hōʻuluʻulu ʻo Solomona i nā kaʻa, a me nā hoʻoholo lio; aia nō iā ia nā kaʻa hoʻokahi tausani, a me nā haneri ʻehā, a me nā hoʻoholo lio he ʻumikumamālua tausani. A waiho ʻo ia ia mau mea ma nā kūlanakauhale no nā kaʻa, a ma kahi o ke aliʻi ma Ierusalema.

¹⁵ A hoʻolilo aʻela ke aliʻi i ke kālā a me ke gula ma Ierusalema e like me nā pōhaku; i kona ʻimi ʻana nō hoʻi, nui ihola nā lāʻau kedera e like me nā lāʻau sukomorea ma ke awāwa.

¹⁶ A ua kaʻi ʻia mai nā lio no Solomona mai ʻAigupita mai, a na nā huakaʻi kālepa a ke aliʻi i lawe ma ke kumu kūʻai.

¹⁷ A kiʻi akula lākou a kaʻi mai, mai ʻAigupita mai, i ke kaʻa hoʻokahi, no nā haneri sekela kālā ʻeono, a i ka lio no ka haneri me kanalima. A pēlā nō lākou i lawe mai ai no nā aliʻi a pau o kā Heta, a me nā aliʻi o Suria ma ko lākou lima.