ʻO KA ʻEPISETOLE MUA A PAULO KA LUNAʻŌLELO IĀ TIMOTEO 2 - Ka Baibala Hemolele

1 Kā Paulo kauoha iā Timoteo.

MOKUNA II.

¹ ¶ Ke kauleo mua aku nei au i nui ka pule ʻana, a me ka hoʻomana ʻana, a me ka nonoi ʻana, a me ka hoʻomaikaʻi ʻana, no nā kānaka a pau loa;

² no nā aliʻi hoʻi, a me nā luna a pau; i malu ko kākou ola ʻana me ka noho mālie, a me ka manaʻo nui i ke Akua, a ma ka pono nō hoʻi.

³ ʻO ka maikaʻi nō ia me ka pono i mua i ke alo o ke Akua ʻo ko kākou Ola;

⁴ nona ka makemake e ola nā kānaka a pau, a e hōʻoiaʻiʻo hoʻi i ka ʻōlelo ʻoiaʻiʻo.

⁵ No ka mea, hoʻokahi nō Akua, hoʻokahi nō mea ʻuao, i waena o ke Akua, a me kānaka, ʻo ke kanaka Kristo Iesū;

⁶ ka Mea i hāʻawi iā ia iho i kalahala no nā mea a pau, e hōʻike ʻia hoʻi i ka manawa pono.

⁷ Nona wau i hoʻokaʻawale ʻia aʻe i kahuna haʻi, i lunaʻōlelo hoʻi, a (he ʻoiaʻiʻo kaʻu e ʻōlelo aku nei i loko o Kristo, ʻaʻole oʻu wahaheʻe,) i kumu aʻo hoʻi i ko nā ʻāina ʻē, ma ka manaʻoʻiʻo a me ka ʻōlelo ʻoiaʻiʻo.

⁸ ¶ ʻO koʻu manaʻo hoʻi ia, e pule nā kānaka ma kēlā wahi kēia wahi, e hāpai ana i nā lima hala ʻole, me ka huhū ʻole a me ka hoʻopaʻapaʻa ʻole.

⁹ Pēlā hoʻi e kāhiko nā wāhine iā lākou iho i ka ʻaʻahu kohu pono, me ka maka hilahila a me ka noho mālie; ʻaʻole me ka lauoho hoʻōniʻoniʻo, a me ke gula, a me nā momi, a me nā kapa komo he nui ke kumu kūʻai;

¹⁰ akā, me nā hana maikaʻi, he mea kohu ia i nā wāhine i hōʻoiaʻiʻo i ko lākou manaʻo i ke Akua.

¹¹ E aʻo ʻia aku hoʻi ka wahine me ka noho mālie a me ka hoʻolohe wale mai.

¹² ʻAʻole au e ʻae aku i ka wahine e aʻo aku a e hoʻoaliʻi aku ma luna o ke kāne; akā, e noho mālie ia.

¹³ No ka mea, ua hana mua ʻia ʻo ʻAdamu, a laila hoʻi ʻo ʻEva.

¹⁴ ʻAʻole hoʻi ʻo ʻAdamu i puni; akā, ua puni ka wahine, a lilo i ka hewa.

¹⁵ Akā hoʻi, e hoʻōla ʻia nō ia ma ka hānau keiki ʻana, ke noho paʻa lākou ma ka manaʻoʻiʻo, a me ke aloha, a me ka hemolele, a me ka manaʻo malu.